133 Kəlamınla addımlarımı möhkəmləndir, Qoy heç bir təqsirim mənə hakimlik etməsin.
134 Məni insanların zülmündən qurtar, Qoy Sənin qayda-qanunlarına bağlı qalım.
135 Üzün qulunun üstünə nur saçsın, Sən mənə qaydalarını öyrət.
136 Gözlərimdən sellər kimi yaş axır, Çünki insanlar qanununa bağlı qalmırlar.
137 Ya Rəbb, adilsən, Hökmlərin doğrudur.
138 Buyurduğun göstərişlər ədalətlidir, Onlar tamamilə etibarlıdır.
139 Qeyrətim məni yandırıb-yaxıb, Çünki düşmənlərim Sənin sözlərini unudub.
140 Sənin kəlamın çox safdır, Bu qulun onu sevir.
141 Kiçik sayılsam da, mənə xor baxsalar da, Qayda-qanunlarını unutmamışam.
142 Salehliyin əbədi salehlikdir, Sənin qanunun həqiqətdir.
143 Başıma sıxıntı və məşəqqət gəldi, Amma Sənin əmrlərin mənə zövq verdi.
