ZĨRINƆ 21:20-27

²⁰Kɛ̀ aↄ̃ yã pì mà, aↄ̃ Luda sáabu kpà. Ben aↄ̃ bènɛ: Ǹ yã pì gwa, wa gbɛ̃. Yudanↄ Yesu náanɛ kɛ̀ bↄrↄ ũgbangba, ben aↄ̃ píngi aĩa vĩ Musa doka musu.

²¹Aↄ̃ↄ mà kɛ̀ nɛ́ɛ yã daa Yuda kɛ̀ aↄ̃ↄ kú bori pãndenↄ tɛ́nↄnɛ aↄ̃ kpɛɛ li Musa dokanɛ, aↄ̃ton bã̀ngu kɛ ń nɛ́nↄnɛro aↄ̃tongↄ̃ ń fɛɛakaarayãnↄ kũnaro.

²²Wé kɛ diaa? Zaakɛ aↄ̃é gí n mↄna maziro.

²³Ǹ kɛ lán wé onnɛ nà. Wa tɛ́ gↄ̃ↄn siigↄ̃ kenↄ lù sɛ̀ Ludanɛ.

²⁴Ǹ ń sɛ́ à gá gbãsĩ bↄ a zĩndan, ǹ ń fĩa bo lɛ aↄ̃ e wà mì bo, baade píngi gↄ̃ dↄ̃ kɛ̀ yã kɛ̀ aↄ̃ↄ mà n musu nɛ́ yãpuranlo. Aↄ̃é e kɛ̀ mpi sↄ̃ ń tɛ́ Musa dokazi.

²⁵Bori pãnde Yesudeenↄ sↄ̃, wa takada kɛ̃̀ wá òńnɛ wa zɛo aↄ̃ mì kɛ̃ nↄ̀bↄ kɛ̀ wà saa òo tãaa kↄ̃n aruo kↄ̃n nↄ̀bↄ kòtokpasaio kↄ̃n pãpãkɛnao.

²⁶Ben Pↄlu gbɛ̃ pìnↄ sɛ̀ à tàńyo. Kɛ̀ guu dↄ̀, aↄ̃ gbãsĩ bↄ̀ ń zĩndan, ben à gɛ̃̀ Luda ua lɛ à gbãsĩbↄgurↄ lɛ́ dìɛ kↄ̃n saa kɛ̀ weé o ń baadenɛo.

²⁷Kɛ̀ gbãsĩbↄna gurↄ swɛɛplaa beee kà yãana, Asia bùsu Yuda kenↄ Pↄlu è Luda ua. Aↄ̃ tɛ́ kà pariin, ben aↄ̃ à kũ̀.