Yuhanis 21:1-9

¹Hidi nal lelo ila lo kon, Yesus tulu-balang Un apa ka pait se tubu Tiberias suut ta. Un dehet ta elia:

²Dedeng na Yesus ima-ii las at iut nakbua. Nas: Simun Petrus, Tomas, man oen noken noan, ‘aan hduan’, Natanel deng iung Kana, ne propinsi Galilea, Sabadeus anan nas duas, (Yakobus nol au, ima-ii man Lamtua Yesus in namnau ka), nol Yesus ima-ii at dua pait.

³Simun Petrus tek noan, “Auk le laok nahu pukat.” Kon oen siut noan, “Hao! Kaim kon lako.” Tukun nam oen lakos se tubu ka suut ta, le saek lui lakos nuting ikan. Mo duman na oen pukat nal ikan mes lo kon.

⁴Ola oskaong nga kon, Yesus dil se tubu ka suut ta. Mo Un ima-ii las taan lo, molota na Yesus.

⁵Un haman le keket oen noan, “Kaka-pali me! Haup ikan tam lo ka?” Oen siut noan, “Ase Kaka! Kaim nal bubuit lo kon.”

⁶Kon Un haman tekas pait noan, “Olan nahu pukat ta laok se lui la blapas kanan na. Tiam mi nala.” Tiata oen tao mudin. Tukun nam, oen haup ikan mamo. Mo ikan nas mamo isi, didiin oen pel sakeng nal pukat ta lako lui la dapa lo.

⁷Auk kon baab se na, ta auk tek Petrus noan, “Inaah! Un nam kit Lamtuan na!” Ming auk in aa ela ka kon, Simun Petrus pake un kado la pait, hidim pitin taam lako tubu ka dalen, le nangen lako tuu kua.

⁸Lui la katang deng tuu ka, nataka le suma meter ngatus sii. Ta un tapan nas tuku-bes lui la pait lakos tuu ka, nol pel pukat man ikan in inu na, deng lui la ulin na.

⁹Oen lakos lius se tuu ka lam, oen ngat net ai opon bua mes kaloe nabael se la. Se ai opon na dapa, muik ikan. Nol ruti kon muik se na.