Yuhanis 1:10-24

¹⁰Totoang in muik ne apan-kloma ki ngias, Un koet le dadis, mo dedeng Un in maa se apan-kloma kia ka, atuli li taan Un lo.

¹¹Un maa daad nol Un atulin nas esan, mo oen dai sium Un lo.

¹²Mo totoang atuil man in sium Una, nol parsai se Una ngas, Ama Lamtua beles hak le daid Un anan.

¹³Na banansila el in hua ulang oen pait son le daid atuil balu ka. Mo in hua oen balu pait na ka, banansila el atuli li in hua ana ka lo. Nol banansila el biklobe mes man kom le muik in hua-koet ta lo. Ta oen daid Ama Lamtua anan, undeng Ama Lamtua man beles in nuli balu na.

¹⁴Hidim, ‘Ama Lamtua in Teka-teka’ ngas, huan daid atuli son. Un nuli ne kit hlala kia. Kit ngat net Un in muun-tes sa. Un muun-tes ela, undeng Un na mo Ama Lamtua Allah Ana Baun siing nga. Un kom in tulu Un dalen banan na bel kita, undeng Un nam meman ela. Nol totoang man Un in tek deng Ama Lamtua Allah ngas, tom baktetebes.

¹⁵Yuhanis in Sarain Atuli ka, man tek deng Atuling nia. Un aa niin mumuun le tek noan, “Hii ke! Un niam, Atuling man auk in nahdeh son noan, ‘Mam Atuli mes le maa. Un uhu dui deng au. Hua auk bii kam, Un muik lo-lolo hmunan nu son!’”

¹⁶Yuhanis aa ela, lole Atuling na kom isi le tulu Un dalen banan na. Un tulu dalen banan na tutungus ela bel kit totoang.

¹⁷Hmunan nu kit upun Musa, man niung Ama Lamtua Atorang ngas bel kit upu kia-kaon nas. Mo halas nia lam, Yesus Kristus uhu dui, undeng Un man tulu Ama Lamtua dalen banan na bel kita. Nol totoang man Un in tek deng Ama Lamtua Allah ngas, meman toma.

¹⁸Muik tahan atuli mes lo kon, man net Ama Lamtua Allah nol baktetebes, ela kon nol Musa. Mo Un Ana Baun siing man Un in neka-namnau isi ka, man tulu bel kit Ama Lamtua Allah dalen na. Aan na, muik tutungus ne Ama ka halin na. Ta Un nam kon Ama Lamtua Allah.

¹⁹Oe mesan na, tene-tene deng atuil Yahudi man in se Yerusalem mas, nutus tulu agama dehe, nol atuli at ila lo deng ngaal Lewi la, man taom tutan-lau se Um in Kohe-kanas Tene ka, le lakos se palun Yordan halin na, halin ketan Yuhanis in Sarain Atuli ka noan, “Ku niam Kristus man Ama Lamtua hid son le tunang maa ka le?” Kon nam un tekas deng un apa ka.

²⁰Un siut langa-langa noan, “Lo. Auk niam mo Kristus lo.”

²¹Kon oen ketan un pait noan, “Etan ela lam, ku nia mo asii la? Upung Elia le?” Un situs noan, “Lo.” Oen ketan napiut un noan, “Tamlom ku niam mo, Ama Lamtua mee-baah man Un hid le belen maa ka la?” Un situs pait noan, “Lo.”

²²Hidi na kon oen ketan un pait noan, “Etan ela lam, ku nia mo asii la? Tek kaim le! Ta kaim musti pait laok tek tene-tene in nutus kaim le maa ngias. Tulung nge!”

²³Kon nam un aa muid asa man upung Yesaya in dul son noan, “Auk niam atuling man in aa niin mumuun se epe in ete tuun nuas, le tek noan, ‘Totoang atuli li mana-koet lalan na babanan, le sodo-sium Ama Lamtua in maa kia! Tao titu lalan na le sium Una.’”

²⁴Se atuil in maa deng Yerusalem mas, muik atuli at ila lo, kon deng partei agama Farisi.