1Qinée Yudeesa maa-pasána ákara rídaqa. Qinée Yísuna aináinira faiqi Yameesana ákaqa máridaqa. Qinée qeeqá qífasaanara Ánutuna ásauku mundírana Yísuna eedóo qímasee rumbára faiqiara foora aináini marúnna faiqisa máridaqa ákara rídaqa.
2Ánutufa náaramásee qinée únnannai ániaqee qufaqa eedóo qímariasa ínni ákara rúmannimaqaidaqa. Ínnee Yísuna ásauku mundírana mandaaqée maríasa maa-pasána ákara rúmannimaqaidaqa. Ínnee maasá qíkoona Ánutuna ámuqusiranaki máriasa ínni ákara rúmannímaqaidaqa. Ánutuna nífauarafa faqa aundurákinaa asooárana faqa firaaqóo ínniara ámuqusirana faqa firaaqóo ínni naunduráki máridanoo irairaaíani.
3Óo qiní qifaaqasáa qíqoondiuqa. Ánutufa maasá innaarúna ásumu márirana moodáa qimiqaifaqa minakí quqáqisáinara ákara rúani qímaseeqa minníseeqa moo úfa ákara ruanáura. Ánutufa moodáa kari nímu ufana maasá qímuna mi-ufána rákira ufara foora afeekaikámasee uqéera aindúsuaqa minára ínni afeekaikámandee ákara rúmannimaqaidaqa.
4Faiqí akaqáusa Ánutunara sía fee qímariasa qumeé ínniki kéeqafiqa dapikídaqa. Misá Ánutuna áfaariranara káqi nímiranara faqa iriséeqa quándakiqa mi-ufána eendaándi iséeqa minánnai faiqí ánaaseeki narí úmmuari narí úmmuari maríana faqa óosana óosana mandainaina faqa únna qímasee Yísunufa fee qímasaidaqa uqéeraseea. Misá maasá ásauku mundírana Yísunara maasá úriqararana maasá karaambáiqara qáoo qídaqa rukíaidaqa. Óoqai tamummáqara fasiqauqa ákarakinaa ufa misá firaa mandainaina ákiaqa árirana áqufuaqee qufaqa dóo maqee áqufidaqa.
5Ínni moo áinainara náaqoo áuqaidaqa. Óoqai Ánutufa Isaraee máqannaa Isipa máqusaindaraana rafíamareenoo aadána maqa maaqaki quqánau. Quqásoofaqa akaqáusa quándaki Ánutuna ufa rukíasee káqirúnna ubeekaqáu. Miqíufanoo Ánutufa sía nífauanau káqi nárinau.
6Ínnee Ánutuna qangiroouqára faqa sía fee íridee. Óoqai misá firaa uriqaranaki márufaqa miná minnísee nári qímaqoomau akaqáusa fufanóo Ánutufa sía nífauanau káqi qumáraseenoo sáinandannai ruúmbeeqeenoo náaru rumbáranaki maqá ámeemaanai asukunaki quqáqaifaqa máridaqa muánni Ánutuna ufa írira faasaanara áfeesida máridaqa. Mi-faasaannásaa náríra ufa qímannimiannoo minára áfeesidaqa.
7Ínnee Soodooma máqusa faqa Koomoora máqusa faqa misaqá máru maqusanaasa faqa ínnee íridee. Misá mandá qángiroo naanna réeqa nári qímaqoomau fíqa faiqí ánaasee narí úmmuari narí úmmuari íqa faiqí narí aqoónna fasiqa úmmuariqa óosana óosana mandainaina faqa mároofanoo Ánutufa aiqámausa mi-oosanná qáfeeqa rufíaaqee qímasee náaru márira idáki misá quqánau.
8Miqíkai másee máa̱ maqee ínniki mandóosana uqéeree mariasa óoqeenáasa naanna ráidaqa. Maqee ínniki maríasa qainámaseeqa Ánutuna ufámmifoo qímasee mi-maú fíqa áaqamaki náriqa nárídaqa. Misá Ánutuna áanoora sía rufíaidaqa miná ufa rukíaseeqa nári qímaqaa áatata fídaqa. Mi-mandoosanná máree máriasa innaarúnai ámiqirausa márianara mandúfa qímannimaqaidaqa.
9Ánutuna ámiqira qangiroouqa rirímma óoqai Mooseefa kuqufufanoo Sadannafa miná irí qumaráanee qufanoo ámiqira qangiroouqakiqari úriqararafa moó fannoo miná áuqu Mikaraafa mifá Sadanna faqa ufa rainánau. Ufa raináidanoo sía ínniki ani máriasa naanna ranau. Sía áqira ufa mandúfa Sadannara qinau. Ánutuna ufara iriséenoo káqi maaqí qímasee reendeenámasee qímaminau. Óo Sadanna Ánutufa aníara qáoo qídanoo.
10Máa̱ ínniki mandóosana uqéeree maríasa sía ámiqira qángiroo aanna ráidaqa níranaqarufa óonumafi irisée káqi qídaqa. Nári sía qáfee maría ainainnara qímasaidaqa níqidaqa. Misá káasau aandau aanna ráidaqa. Misá nári írirana irisée aandáu̱ oosanamau fídaqa. Mi-maú fímariafanoo nári mandóosana fannoo nári nárídanoo.
11Misá nárírafa firaaqóo máriannoo. Minára írifanoo náaquqaani. Misá Kaina aatáta fídaqa. Kainafa Ánutuna ufa rukíee marúfa máridanoo narí ákaqa árinau. Misá kafáa Baraamana mandá aatata fídaqa minakí kéeqararee qímaseeqa narí rarisée narí rarisée mámaree fídaqa. Baraamafa munnimmará rúmammareenoo únna qímasee Isaraee máqannaasa rarisámeeqee mandáinainaki quqée marínau. Misá moo fásiqa óoqeenáa fasiqa Kooraana aanna ráidee qímasee Mooseenasáaqari rakéemaku áadumarunna naríara moo káraambaiqee qímasee fufanóo Ánutufa miná faqa miná áiku ásauku miná faqa fusá faqa nárínau. Máa̱ ínniki mandóosana uqéeree maríasa náriqa kai nári nárírana maréeqee Ánutuna náriranaki quqáseeqa minakí máridaqa.
12Ínnee Ánutunara qoomáqa sakasée náidaqa néemarifaqa mée ínniki mandóosana uqéeree maríasa nári mandáinaina námufaqa aniréeqa sía moosára óonumafi íridaqa nifaaqa quqáseeqa káqi náriaraa kai firaaqóo nárana náidaqa. Misá ufídaina áukuana aandaróo áukuana oonámuara foora aniraifaqa óo aaku asooára ainaina ániannoommifoo qímariafanoo káqi áiqareenoo fifanoo úfai fannoo misá maréeqeenoo áqidanoo aaku sía márisa máridaqa, sía andeeqára óosana uqaqífiqeenoo aupúrarana kai uqaqífiqeenoo. Mi-fasiqáusa sía qaqamma írai sáqari fára foora máridaqa, írai aukuanna óosana rarákusee qáfaafanoo aadána kai máridanoo sía nammári nammáridanoo.
13Mi-fasiqáusa mandáinaina fannoo nammári qáqaarara foora nári mandáinaina akooqóo mándinoo márifaqa sía nisaurídaqa éekara árinoo akooqóo máridanoo. Misá mée sandée mari fasauna aanná raidaqa, sandámammaree asukunakí múnu qimbáidaqa. Ánutufa mi-fasiqáusa maqa máaqa miqí kai másee firaa asukunakí meemái afeedamá nímaqaifanoo máridanoo.
14Óoqai Eenookafa mi-manda fasiqáusara tamummaqaséenoo ákara rúmaqoofa máridaqa. Ádanasáaqari moodáannai qísauku óosana taikáfufanoo dínni ani moodáa máreenoo qaaraikínoo Eenookafa kambíqanau. Mi-Eenookáfa maaqí qímasee tamummaqaséenoo ákara rínau. Ínnee íriaqa Ánutufa narí náaquqara andeeqara qangiroouqa moómoosa faqa qumuréenoo aiqáma maqásaa qaraasa suqúsee ufa nímiannoo, mandóosana máree maríasa Ánutunara sía írimariasa misá Ánutuna ufa rukíasee mandáinaina óosana óosana máree maríanara Ánutufa faqa narí qangiroouqá faqa nárírara qúmuannoo. Mi-manda fasiqáusa Ánutunara mandúfa óosana óosana qíranara Ánutufa nárírara qúmuannoo. Dóo Eenookana tamummáqara ufa miqíminoo máridanoo. Eenookafa misára miqí qímasoofaqa qinée máa̱ ínniki mandóosana uqéeree maríasara mi-maú fímariafaqa maaqí qídaqa.
16Mi-fasiqáusa maqee maqee aiqáma ainainara náundaufa náundaufa qída máridaqa. Misá aiqáma ainainara ámiqira ainainara faqa sía maasá dídifaqa mandáinaina fee kai qídaqa. Misá nári mandóosanara nídirana áandi̱ áususeeqa náriqa mi-maú fídaqa. Misá firaaqóo naríara naríara nimooqímariasa máridaqa. Misá nári mandóosanara nídirannai ubeekárara faiqí akaqáusa marasée nímooqaidaqa ámiqi ámiqidaqa misá maasá mandóosanamau fídaqa maasá dúqu uqéereefaree qídaqa miqídaqa.
17Óo qiní qíqoondiuqa karaambáiqa Yísufa ásauku mundírana miná faiqi námu ufa qímannimiqoona sía aunúaqa.
18Misá maaqí qímasee ínni qímannimiqau. Taikára áukuana aniráinaqa faiqí moómoo kooroomáfiqa nári mandóosanara nídiramau fídaqa ínniara naanaidara qifáranoo.
19Mi-fasiqáusa faiqí qámbaana aniréeqa rainée maríasa. Miqí máriasa sía Ánutuna maraquna náakirausa máridaqa náriqa faiqí faiqi nídiramau kai fímariasa máridaqa.
20Ínnee qiní qíqoondiuqa sía miqímariasa máriafanoo. Ínnee Yísuna náaquqara ufakí máriasa máriafanoo máaqara foora áuqiqa fífi inaqa minakí afeekaíkiaqa. Ínnee Ánutuna náaquqara maraqunannái maqee maqee innaaru qiaqa.
21Maasá karaambáiqa Yísufa ásauku mundírafa narí nífauarana firaanákiqari maasá sía dáruannoo náaru náaru márirana maasá qímiannoo. Ínnee Yísuna qúmiranara áfeesidaqa Ánutufa ínniara nídimarinaki minakí kai máriaqa sía moósaa fínana kurídia.
22Ínniki faiqí akaqáusa Yísuna mandaaqáranara marammara rídaqa qaara irirana máree maríasa, sía ínnee miqímariasa áanoománnimaqaaqa nífauamásaifaqa máriaqa. Náaru márira idákinaana Yísuna ufannai kárí qínaqa qumáreeqee Ánutuna afeeka ququsaki quqáaqa. Akaqáusa mandóosana máree maríasa faqa nífauarana faqa rufíara ufa faqa qímannimisee qumáreeqee Ánutuna quqúsaki quqáaqa. Ínnee miqí márifaqa misá mandóosana qáfamasee sía minára ruaqa ínnee faqa minakí fifáara. Misá mandóosana ikairíara rufíasee fídiaqaa iaqa.
24Ánutufa ínnee mandáinainaki áqufirarifanoo mifá amaná ínni ititánnisainaqa sía áqufifaranoo. Mifá amaná ínni maréeqeenoo ámiqimmandee nínukamásee asasírana ínni nimisée narí afaaqa aréenaranaki naróorisaa amaná quqáaninafa.
25Moodáa Ánutufa maasá asumu máree marífa. Maasá karaambáiqa Yísufa aní ásauku mundírafa minánnai maasá amooqírana qímamidaqa afaaqa aréenarana faqa úriqararana faqa afeeka faqa aiqámausa aníara náaquqarana faqa aníndi máridanoo fee qídaqa amooqídaqa. Óoqai indaarú aníndi márinau maqee aníndi máridanoo náaru náaru aníndi máriani. Kúqaa.
