Yowane 7:23-40

²³Mayadai Sabati unai tamowai kwa hepelitomedi, na yomi nuwatu bena tabu Mose yona laugagayo kesega kwa utusi. Na yau meta mayadai Sabati unai tamowai hesau yaluwana yo tauna ya henamwanamwadi. Na ye saha to kwa koipiliyegau?

²⁴Tabu ginauli kadi kao udiyedi kwa kitadi na yomi hekasa kwa ginaginaulidi, na bena nuwanuwatu mamohoidi mo udiyedi yomi hekasa kwa ginaulidi.”

²⁵Na Yelusalema tamowaidiyao hekadi se hedede se wane, “Teina tamowai ta meta se wasewasenei bena taba se unui.

²⁶Na ye laoma ede boda matadiwai ye hedehedede, na idohagi to tauwoyaeda nige saha hesau se ginauli kalinawai? Nuwana kabina se kata meta iya Keliso?

²⁷Na teina tamowai ta yona kabalaoma meta kabina ka katako. Taba iya Keliso meta yona kabalaoma nige gonowana tamowai hesau kabina ye kata.”

²⁸Yesu sola numa tabuna bakubakuna wa unai ye laulauhekata na ye kalinalakilaki ye wane, “Komiu yomi nuwatu meta kabigu kwa kata yo yogu kabalaoma hinage kabina kwa katako. Iyamo ya laoma ta meta nige yau ya bom yogu nuwatuwai, na tauhetamaligauma ne meta iya mamohoina. Na iya nige kabina kwa kata,

²⁹na yau meta kabina ya kata, matawuwuna ede iya unai ya laoma yo iya hinage ye hetamaligauma.”

³⁰Kabo Yesu bena se kabihekahini, na iyamo nige tamowai hesau ye kabilau unai, matawuwuna yona huya sola nige ye lage.

³¹Na boda wa luwadi ne unai meta tamowai gwaudi Yesu se sunumaei na se wane, “Ka nuwatui teina tamowai ta meta iya Keliso. Matawuwuna ede tamowai hesau nige gonowana laulau gigigigibwalidi ye ginaulidi doha teina tamowai ta.”

³²Bodalakilaki wa Yesu yona gigibwali wa se hetahetala, na Paliseya tamowaidiyao yodi hedehedede wa se lapui ede maiyadiyao kaitalasam tauwoyaidi kabo numa tabuna kedana taukitahetetena hekadiyo se hetamalidi se lau bena Yesu se hai na se laeyama kalidiwai.

³³Yesu yona lauhekata ye tubei ye wane, “Huya kubwakubwa mo yau kabo maiyamiu na kabo ya uyo tauhetamaligauma wa unai.

³⁴Komiu kabo kwa waseneigau, na taba nige kwa lobaigau; yo komiu nige gonowana kwa laoma yogu kabamiya ne unai.”

³⁵Dius tauwoyaidi se bom se henahenamaiꞌuyoidi se wane, “Teina tamowai ta kabo haedi ye laulau, unai taba nige ta lobai? Nuwana kabo ye lau kehadao se haimiyamiyaidi Giliki tamowaidiyao luwadiyena wa udiyedi, na menai kabo Giliki tamowaidiyao ye hekatadi?

³⁶Yona hedehedede ta kaniyodi ede saha, doha ye wane, ‘Komiu kabo kwa waseneigau, na taba nige kwa lobaigau. Yo komiu nige gonowana kwa laoma yogu kabamiya ne unai.’?”

³⁷Gwau Miyaidi Henuwaisinina mayadaina gehegehena yo saesaena unai kabo Yesu ye tolo na kalinana lakilakina unai ye wane, “Ena tamowai hesau gadona ye magu, meta bena ye laoma kaliguwai kabo waila ye numa.

³⁸Doha peloweta hesau kulikuli tabuna unai ye kuliyako ye wane, ‘Ena kaiteya ye sunuma kaliguwai, kabo iya unai waila maumaulina ye bonobonowasima.’”

³⁹Teina hedehedede ta “waila maumaulina” meta Yesu Yaluwa Tabuna hedehededena ye hedehededei. Na kaiteyadi Yesu se sunumaei kabo Yaluwa ne se hai. Huyana ne unai meta Yaluwa wa sola nige se hai, matawuwuna ede Yesu kana kao saesaena mamohoina Yaubada sola nige ye hemasalaha.

⁴⁰Boda wa teina hedehedede ta se lapui ede hekadi se wane, “Mamohoi, teina tamowai ta meta iya Peloweta wa.”