Yowane 20:3-31

³Kabo Petelo yo hekahekata hesauna wa se heloi se lau bwayabwaya wa unai.

⁴Taudi labui se heloi na hekahekata hesauna wa Petelo ye heloigabaei na ye lagebaguna bwayabwaya wa unai.

⁵Ye dunedobi ye kitalau kaleko posiposidi tupwadi lohalohadi wa ye kitadi se bawabawa, na nige ye lusae kalo ne.

⁶Na Simona Petelo ye mulitama wa ye lage meta ye lusae kalo wa yo suma kaleko posiposidi tupwadi lohalohadi wa ye kitadi se bawabawa,

⁷yo hinage Yesu kuluna kana suma kalekona wa ye kita meta nokunokuna, na sinale kana suma kaleko tupwadi lohalohadi wa tupwa hesau unai na kuluna kana suma wa hinage tupwa hesau unai.

⁸Na kabo hekahekata hesauna taulagebaguna wa hinage ye lusae bwayabwaya wa unai. Na ginauli maudoidi wa ye kitadi ede ye kawamamohoi.

⁹Na siya sola nige kulikuli tabuna se nuwatulobai meta Yesu kabo boita unai ye toloꞌuyo.

¹⁰Kabo hekahekatao wa se uyo yodi numa.

¹¹Na Maliya iya bwayabwaya wa dagelana unai ye totolo na ye doudou. Iya ye doudou na ye dune ye kitalau bwayabwaya kalona wa unai,

¹²na anelu labui ye kitadi. Kadi kwama posiposidi, na se tutuli Yesu yodi kabahekenona wa unai, hesau kulubawa unai ye tuli na hesau kaegigi unai ye tuli.

¹³Maliya se henamaiyei se wane, “Waihiu, matawuwuna saha to ku doudou?” Maliya ye wane, “Yogu guiyau se hai se laeyako, na nige kabina ya kata haedi se tole.”

¹⁴Teina hedehedede ta mulina ne unai Maliya ye tolobui, meta Yesu ye kita ye totolo, na nige ye nuwatulobai meta iya Yesu.

¹⁵Yesu ye wane, “Waihiu, saha sabina ku doudou? Yo kaiteya ku wasewasenei?” Maliya yona nuwatu bena koya taupaisowaina, ede ye wane, “Taubada, ena ku hai ku tolehesuwalayako meta taba ku hededehemasalaha haedi ku toleyako, na kabo gonowana ya lau ya hai.”

¹⁶Yesu ye hededelau unai ye wane, “Maliya.” Ede Maliya ye kitalau Yesu unai na ye wane, “Laboni!” Kalina Alamaiki unai kaniyona ede taulauhekata.

¹⁷Yesu ye hededelau unai ye wane, “Tabu ku kabikabilaoma kaliguwai, matawuwuna yau sola nige ya sae tamagu unai. Na ku lau kagu kahao yodi ku hedehedede meta yau ya seuseuyo Tamagu iya ede Tamamiu, yo yogu Yaubada iya ede hinage yomi Yaubada unai.”

¹⁸Maliya Magadala waihiuna ye lau ede hekahekatao wa yodi ye hedehedede ye wane, “Guiyau wa ya kita!” Yo saha Yesu ye hedededi kalinawai wa hinage ye hedededi.

¹⁹Tenem mayadai bagubagunana ne unai na boniyaina unai kabo hekahekatao wa se tupagogoi numa hesau unai na kawakedana se gudui, matawuwuna ede Dius tauwoyaidi se matausiyedi. Na Yesu ye laoma ede luwadi wa unai ye tolo na ye wane, “Nuwamiu se talu!”

²⁰Ye hedede, na mulinawai kabo nimana yo lisilisina wa ye hekitadi. Yona hekahekatao wa yodi guiyau se kita meta se gwauyalakalili.

²¹Yesu ye hedehededeꞌuyo ye wane, “Nuwamiu se talu! Yau Tamagu ye hetamaligauma, unai komiu hinage kabo ya hetamaligomiu.”

²²Na kabo ye yahuwalau udiyedi na ye wane, “Yaluwa Tabuna kwa hai.

²³Ena tamowai hesau yona baꞌaya kwa nuwatugabaei, kabo nuwatugabae ne ye hai, na ena tamowai hesau yona baꞌaya nige kwa nuwatugabaei, taba nige nuwatugabae ne ye hai.”

²⁴Na Tomasi, hesana hesau Didimasi yo iya saudoudoi labui wa hesauna, huyana Yesu ye taumasalaha wa iya nige maiyadi.

²⁵Ede hekahekatao hekadi wa se hededelau unai se wane, “Kai Guiyau ka kita!” Na Tomasi ye hededelau hekahekatao hekadiyo wa udiyedi ye wane, “Ena yau nige nimana udiyedi pawati gaidi ne ya kitadi, yo nimagigigu nige ya tole pawati gaidi ne udiyedi, yo nimagu nige ya tole iya lisilisina gaina ne unai, meta taba nige ya kawamamohoi.”

²⁶Sabati kesega mulinawai, hekahekatao wa numa wa unai se tupagogoiꞌuyo na Tomasi meta maiyadi. Keda wa se guduyako, iyamo Yesu ye laoma luwadi wa unai ye tolo na ye wane, “Nuwamiu se talu!”

²⁷Kabo ye hededelau Tomasi unai ye wane, “Nimagigim ne inai ku tole, na nimagu gaidi ta ku kabitonogidi. Yo nimam ne ku heleleyama na lisilisigu ta unai ku kabi. Na tabu ku nuwalabulabui na ku sunuma mo.”

²⁸Tomasi ye hededelau unai ye wane, “Kowa yogu Guiyau yo yogu Yaubada.”

²⁹Ede Yesu ye hededelau unai ye wane, “Ku kitagau, na unai ede ku kawamamohoi. Kaiteyadi nige se kitagau na iyamo se kawamamohoi, meta kabo Yaubada yona kabinamwaena se miya.”

³⁰Yesu kabikabi gigigigibwalidi gwaudi ye ginaulidi yona hekahekatao wa matadiwai, na teina buka ta unai nige maudoidi ya kulidi.

³¹Na saha ya kulidi ta, udiyedi bena kabo kwa kawamamohoi meta Yesu iya Keliso, iya Yaubada natuna. Na yomi sunuma debadiwai kabo iya hesanawai mauli kwa hai.