5 Ngan ye kene yo ayepe ye tana i nga, ngan au i la be ayei ben sul pang di tooltool ke tana i.”
6 Yesu iwete nen a imot, motong la ikoronai ngoonoo du ye tana, inbe isaraii ye baene le iyei ben tingi, motong ikap a isirimi tool mata kis tani, in matana ye.
7 Inbe iwete panga nen, “Kula le la kupusu matam ye ran kelingi yo ene Siloam ni.” (Ngan betanga yo Siloam i, in punu ben Tiwanga). Le nga tool tani in ila la ipusu matana, motong la ye kene yo be imulu a ila pang rumu ki ye in nga, ngan le matan galanga a ikamata ni ye dook mata.
8 Motong la di tooltool yo tiyepe potai ye nga, ngan tiye di tooltool kapala yo muku ngan tikamata igaugau pat le so ye di tooltool nga, ngan tikamata le tipartortor nen, “Ai, i tool tani yo muku ngan iwurur a igaugau pat le so in naii, too?”
9 Ngan di tooltool kapala tiyei ne, “E, ya tani naii.” Bong di kapala tiyei ne, “Tiap, ya in matana dawa ben tool tani in leu, bong in tool san.” Ngan tiwete nen, motong la tool tani iyei ne, “Ai, i au tani naii.”
10 Le nga di tooltool tina ngan titoru. Tiyei ne, “Nga kuyei belei a le matam rere, inbe kumata ni ye nga?”
11 Motong la iwete pang di nen, “Tool yo tipootoo ene ye Yesu i, in iyei tana le iyei ben tingi, motong la isirim matak ye, inbe iwete pau be la apusu matak ye ran kelingi yo Siloam i. Le nga ala la apusu matak ye ran tani, ngan la le matak rere a akamata ni ye nga.”
12 Iwete nen, motong la di tooltool tina ngan titoru. Tiyei ne, “Ngan tool tani in iyepe ngai?” Ngan iyei ne, “Atoo, au i lok galanga ye tiap.”
13 Motong la tikaua tool tani yo muku ngan matan kis i, in a tila pang ye di Paresi.
14 Yesoo, ye kene yo Yesu iyei tana le ben tingi a ikarata tool tani in matana le dook mata ye i, in ye lal kidi Yuda ke sungunu.
15 Motong la di Paresi tina ngan titoro tool tani. Tiyei ne, “Ai, matam nga yelei a le dook mata nga?” Ngan tool tani in iwete pang di nen, “Isirim matak ye tana yo iyei le ben tingi nga, motong la apusu matak ye ran, ngan la le nookoot nga matak rere a akamata ni ye nga.”
16 Iwete pang di nen, motong la di Paresi kapala tiyei ne, “Tool in Maro iwanga la isi, nga tiap, yesoo ikap tutu lal kiidi Yuda yo ke sungunu, in tiap.” Bong di Paresi tina kapala tiyei ne, “Nga yelei, tool yo ke yeingi noonoo i, in ke be iyei mos yo nen nga?” Ngan nen le di tapdi tiparpoto.
17 Motong la di Paresi tina ngan tiportak be titoro tool mata kis tani, in mulu nen, “Lom tar be tool tani yo iyei ong le matam rere i, in tool belei?” Ngan iraua betanga kidi nen, “Ya in Maro koonoo atu.”
18 Muku ngan tool tani in matan kis, motong la nookoot nga matan rere nga, bong di kuto maimai ke di Yuda titara lodi medana ye yo nen, ngan tiap. Le nga tiwanga pang tamana le tinana a timan.
19 Timan, motong la titor di nen, “Ai, i angru natumim tani yo kawete be ye kene yo tinana ipasuiu ye in nga, ngan matan kis, in naii, too? Ngan nga yelei a le nookoot ngan ikamata ni nga?”
20 Ngan tamana le tinana tiyei ne, “Amru nga lomam galanga ben i natumam, inbe kene yo tinana ipasuiu ye in nga, ngan matan kis.
21 Bong yelei a le nookoot nga ikamata ni, inbe sei tool iyei matana nga le irere i, in amru nga lomam galanga ye tiap. Le be nen ngan katoru. Ya in tool maiyoko, le ole ya taunu iwete pang.”
22 Ngan tool tani in tamana le tinana titattadai di Yuda, ngan la le tiwete betanga nen nga. Titattadai di nen, yesoo muku ngan di kuto maimai ke di Yuda tiraua betanga be kumata le tool sa iwete a ipapos ben Yesu in Kirisi nga, ngan ole tigunkala le ke be ilo rumu kidi Yuda ke gaongo in lono lo iye di tigaua mulu tiap.
23 Ngan ye punu in la le tool tani tamana le tinana tiyei ne, “Katoru. Ya in tool maiyoko oo.”
24 Motong la di Yuda tina ngan tikiui tool tani yo matan kis in paru ki man tiwete panga nen, “Nookoot nga kuyitmaka Maro ene, inbe kuwete betanga moolmool pam ye matana. Oo kuwete, am nga lomam galanga be tool yo kuweta i, in tool ke yeingi noonoo.”
25 Tiwete nen, motong la iraua betanga kidi nen, “Au i lok galanga tiap be ya in tool ke yeingi noonoo, too tiap. Bong so ataleu yo lok galanga ye, in nen, muku ngan matak kis, bong nookoot nga matak rere le akamata ni ye.”
