18 Ɩsɔ wɛnɑ yoou kɛɛkɛnɑɑ kɛ iyisi iyisi kɛ́, Tɑcɑɑ wɛ pɑ hɛkʋ, nɑ Sinɑyi nɑ́ɑ́ wɛ Ɩsɔ təsɛɛlɛ tɑɑ.
19 N kpɛŋnɑ yəlɑɑ mpɑ pɑ kpɑwɑ tɔ nɑ ń kpɑɑnɑ, yəlɑɑ kɛ pɑ lɑpɑ-ŋ kʋcɔɔʋ*fɑ*. Tɔɔ kʋllɑɑ mɑɣɑmɑɣɑ kɑ́ cɑɣɑ nyɑ́ kiŋ.
20 Tɑcɑɑ kɛlɛ sɔsɔ kɛ pɑɑ kʋyɑkʋ ŋku, ɩnɩ ɩ pɑɑsəɣənɑnɑ tʋ nɑ ɩ́ wɑɑsəɣɩ-tʋɣʋ sɑɑ wei pɑ ŋmɑkələɣɩ-tʋ tɔ.
21 Ɩsɔ kɛ́ wei ɩ wɑɑsəɣɩ-tʋ tɔɣɔ. Tɑcɑɑ Ɩsɔ ɩnɩ ɩ wɛnnɑ tomɑ sɩ ɩ́ fiti-tʋɣʋ səm tɑɑ.
22 Amɑ Tɑcɑɑ kɑ́ yɔkɩ ɩ kolontunɑɑ nyɔɔŋ, ɩ kɑ́ yɔkɩ mpɑ pɑ wɛ ɩsɑɣɑtʋ tɑɑ tɔ pɑ nyʋmpɔɣɔlɑsɩ.
23 Tɑcɑɑ yɔɣɔtɑɑ sɩ: Mɑɑ ləsɩ mɑ kolontunɑɑ kɛ Pɑsɑŋ pʋɣʋ tɑɑ nɑ mɑ́ kɔnɑ. Mɑɑ ləsɩ-wɛɣɛ teŋku lʋm tɛɛ nɑ mɑ́ kɔnɑ.
24 Nɑ ń fɛlɩ pɑ cɑləm tɑɑ kɛ́ nɔɔhɛɛ, nɑ nyɑ́ hɑsɩ tɔɣɔ-wɛ.
25 Hɑɩ, mɑ Ɩsɔ, mɑ wulɑʋ, pɑ nɑwɑ nyɑ́ cɑŋɑ kɛ nyɑ́ təyɑɣɑ tɑɑ.
26 Yonyoolɑɑ ntɛ́ nɔɣɔ tɔɔ, pɑ wɑɑləɣɩ wontu mɑtɑɑ, hɛkʋ tɑɑ kɛ́ ɑlʋpiyɑ mpɑ pɑ mɑkɩ ɑkilimisi tɔ.