2Epapeleye ya꞉tapo utula꞉la Yesu hala dla puame ya꞉ watle epo atlaiyo, “Labai, dimalamana, wa꞉ye Godta tane dle imalalo oplami wa꞉po. Adipalati, oplamitapo isikimi meyelo ulugiyemale koko ipapele pohalomsela꞉lowa. Amasiyama Godtapo ya꞉ mate hallepiye, eta ya꞉ ulugiyemale koko ipapeleye halomelepe,” diyo.
3Epapalati Yesuta asiyama ya꞉ watle epo atlaiyo, “Na꞉ ikadepe koko wa꞉ watle atlema. Oplamita mamisika꞉ pohamalalo wekelepiye, ya꞉ God ya꞉ mo koko dla po-ulatuluwa,” diyo.
4Amasiyama Nikodimasta asiyama epo atlaiyo, “Oplamitapo mo-ta꞉po halemama ma-adipammama ya꞉ waita mamisika꞉ hampa꞉? Ya꞉ po-ala꞉na, ma yimka꞉mala dlati ya꞉ waita ma hamoloweye,” diyo.
5Amasiyama Yesuta ma epo atlaiyo, “Na꞉ ikadepe koko wa꞉ watle atlema. Oplamitapo yú tle epo Hela꞉dle Soko tle ma po-amko dlalo hallepiye, ya꞉ God ya꞉ mo koko dla po-ulatuluwa.
6Ta꞉lamo sotapo ta꞉lamo yimlala hatitimdepo. Amasiyama Hela꞉dle Sokota pasakalo hapimhala soye God ya꞉ akimlala demha꞉ha꞉po.
7Epapedeme wa꞉ na꞉ta wa꞉ watle atlemama, ma amko dene dle yu dalemama ase sikemte yelemiya.
8Wa꞉ mosisita ya꞉ta solotamale dla hotlomde yuye me-dalemdepo. Amasiyama wa꞉ ya꞉ta pumde api mate epo tamde api mate powa꞉malamana. Epedeme Hela꞉dle Sokota pasakalo hapimha꞉ha꞉ so dla ma epamhalapo.”
9Epalati Nikodimasta epo atlaiyo, “Koko iye adipo woyapa꞉?” diyo.
10Epapalati Yesuta ya꞉ watle epo atlaiyo, “Wa꞉ Isalael so dulu dla imalalo oplami hala metlo, ma ala koko iye pomalamalalo halapa?
11Epedeme na꞉ ikadepe koko wa꞉ watle atlema. Na꞉ta momalamale mate epo na꞉ta tlamale koko mateye Yu so wua꞉ dla atlamsela꞉po. Epapele tlope wua꞉ na꞉ yu hala allipo.
12Epedeme na꞉ta wua꞉ watle ta꞉lamo hema koko hapuloma hutiyeye wua꞉ dla atlamalati wua꞉ pomikadepe dlalo wekelepo. Epapele dulu dla wua꞉ ma adipo na꞉ta Pepele dimo dla hutiye koko wua꞉ dla atlati mikadepe depa꞉?
13Epapedeme hatlo Opa Yamitapo Pepele di tle ta꞉lamo hema maluwapo. Epame hatlo ya꞉tapo ma ilame Pepele dimo dla hetlepe.
14Epedeme Mosesta dalupa dulu dla olita mita꞉ple ilama hame ta꞉duwaye, epammama opata Opa Yami mape epo hamame ta꞉dlepe.
15Epapedeme opa anawolotapo ya꞉ dla mikadepe dlepiye, yia꞉ye kokó halepo hallalo pasakalo halepe.
16Godtapo di ta꞉la so sikemte bokotiyapo malapame Yami hatlope tulune duwapo. Epedeme opa anawolotapo ya꞉ dla mikadepe dlepiye, yia꞉ popalliwa, amasiyama yia꞉ye halepo halepo pasakalo halepe.
17Epapedeme Godtapo Yami ta꞉lamo hema tulune duwaye, ta꞉lamo so batalimale asiyama hamilipo depo po-apena. Amasiyama ta꞉lamo sota ya꞉ tle pasakalo gadle halepo depame tulune duwapo.
18Epedeme opa anawolotapo God Yami dla mikadepe depo ha꞉ha꞉ma꞉, yia꞉ watle batalimale asiyama pohamilowa. Amasiyama opa anawolotapo ya꞉ dla pomikadepe dlalo ha꞉ha꞉ma꞉, yia꞉ye yia꞉ bobtalimale asiyama mo-halomolowedeme ha꞉ha꞉po. Adipalati, yia꞉ God Yami hatlo dla pomikadepe dena.
19Epedeme hela꞉dletapo ta꞉lamo hema mo-puwapo. Amasiyama ta꞉la sotapo hela꞉dle eye posolotamalalo wekepame ma amtuwale tlo sikemte solotamuwapo. Adipalati, yia꞉ta moto mate koko halomha꞉ha꞉leye pta batalimana. Epapele koko tle Godtapo yia꞉ batalimale asiyama hamilipe.
20Epapedeme batalimale koko halomha꞉ha꞉lalo soye hela꞉dle allimama hela꞉dle dla puluweye sikemte wowota꞉mdepo. Adipalati, hela꞉dletapo yia꞉ta batalimale koko halomha꞉ha꞉leye haliyamale dla nati-ilala depame.
21Epedeme opa anawolotapo ikadepe koko halomha꞉ha꞉ma꞉, yia꞉ hela꞉dle dla matiloweye powowota꞉semde. Adipalati, eta yia꞉ta Godta solotamale koko halomha꞉ha꞉ye nati-ipo.”
Yon 3
Yon 3:2-21