Yon 3:17-31

¹⁷Epapedeme Godtapo Yami ta꞉lamo hema tulune duwaye, ta꞉lamo so batalimale asiyama hamilipo depo po-apena. Amasiyama ta꞉lamo sota ya꞉ tle pasakalo gadle halepo depame tulune duwapo.

¹⁸Epedeme opa anawolotapo God Yami dla mikadepe depo ha꞉ha꞉ma꞉, yia꞉ watle batalimale asiyama pohamilowa. Amasiyama opa anawolotapo ya꞉ dla pomikadepe dlalo ha꞉ha꞉ma꞉, yia꞉ye yia꞉ bobtalimale asiyama mo-halomolowedeme ha꞉ha꞉po. Adipalati, yia꞉ God Yami hatlo dla pomikadepe dena.

¹⁹Epedeme hela꞉dletapo ta꞉lamo hema mo-puwapo. Amasiyama ta꞉la sotapo hela꞉dle eye posolotamalalo wekepame ma amtuwale tlo sikemte solotamuwapo. Adipalati, yia꞉ta moto mate koko halomha꞉ha꞉leye pta batalimana. Epapele koko tle Godtapo yia꞉ batalimale asiyama hamilipe.

²⁰Epapedeme batalimale koko halomha꞉ha꞉lalo soye hela꞉dle allimama hela꞉dle dla puluweye sikemte wowota꞉mdepo. Adipalati, hela꞉dletapo yia꞉ta batalimale koko halomha꞉ha꞉leye haliyamale dla nati-ilala depame.

²¹Epedeme opa anawolotapo ikadepe koko halomha꞉ha꞉ma꞉, yia꞉ hela꞉dle dla matiloweye powowota꞉semde. Adipalati, eta yia꞉ta Godta solotamale koko halomha꞉ha꞉ye nati-ipo.”

²²Epame matle koko ita tame gudlati Yesutapo ya꞉ alotle tlalo so mate Yelusalem meleme ma Yudiya mo seme dla tamalaiyo. Yia꞉ edla tame ha꞉ha꞉mama opaye yú dla ka꞉ka꞉timaiyo.

²³Amasiyama Yon ya꞉ ala amtuwale aya dulu dla poka꞉stlalo hallati Salim mo mateka꞉pi Ainon dla opaye yú dla ka꞉ka꞉timhalaiyo. Adipalati, mo edla yú pato halaiyo.

²⁵Epapele oloma edla Yon ya꞉ alotle tlalo sotapo Yu sota yia꞉ toto koko dolumama do mate epo hete mate howahalomde koko dla Yu oplami hale mate yu topuloliyo.

²⁶Epame yia꞉ puame Yon watle epo atlaiyo, “Labai, wa꞉ta ka꞉yapa Yoden aloma seme dla di watle oplami hale koko atlemama ya꞉ye Kelisopo duwaye, oplami etapo wata ma opaye yú dla ka꞉ka꞉timhalema. Epalati opa hapulomatapo ma ya꞉ hala dla tamhalapo,” diyo.

²⁷Amasiyama Yonta epo atlaiyo, “Oplamitapo isikimi meyelo koko pohalowa. Amasiyama Godta ya꞉ watle itiyamale hamilipiye, ya꞉ eta koko e halepe.

²⁸Epedeme wua꞉ na꞉ta atlemama na꞉ye po-Keliso duwa kokoye ma-daluwapo. Amasiyama na꞉ye isikimi ya꞉ api dinapolowe koko dla tane dle oplamipo.

²⁹Epapedeme oplamitapo a꞉ya halepiye, ya꞉ gadlalo oplamitapo ya꞉ mateka꞉pi dla halemama ya꞉ yu dalepame sikemte siyemdepo. Epapele api tle na꞉ mape wata sikemte siyele mate halapo.

³⁰Epedeme ka꞉dena, Kelisota di ikadepe dla hallati asiyama na꞉ta isili ikadepe dla hallowe ka꞉pi.

³¹Epedeme Pepele di tle puale oplamitapo opa hapuloma tla꞉mtame halapo. Amasiyama ta꞉lamo tle puale oplamiye e ta꞉lamo oplamipo. Adipalati, ya꞉ isikimi ta꞉lamo hema koko hutiye hapuloma tlo atlamdepo. Epapedeme Pepele di tle puale oplamitapo di ikadepe dla halapo.