Yon 1:3-21

³Ina naga Urana xap axamang longgalo masok mana. Axamang longgalo disok, disok mana daxanga tela te. Disok mana ing sibuna.

⁴Walinga namua wa rangua, saing walinga ba sina lulianoa na lipu longgalo.

⁵Lulianoa saxaxangia labianoa, ne labianoa sanga ba dali te.

⁶Lipu tela Urana soxi ma, yanoa Yon.

⁷Ma bila lipu baxangangam, bu baxanga luliana ba, bu lipu longgalo sanga ba dilungu dahatum haringina mana.

⁸Ing sibuna luliana ba te, ne ma bu baxanga luliana ba.

⁹Baing luliang sibuna sina lulianoa na lipu longgalo ba, ri ma titiauba.

¹⁰Ma wa titia. Ina naga Urana xap axamang longgalo duwa titia masok mana. Baing tegu. Lipu titiamdi dibagu daxabia te.

¹¹Ila yabania, ne bakbagindi daxap te.

¹²Ne lipu gaxarea daxap, lipu gaxarea dahatum haringina mana yanoa, lipuadi ba ina libudi disok Urana garandi.

¹³Disok Urana garandi mana baudingtibudingdi sibidingdi te, kimbo mana lipu tela murunganoa te, kimbo mana namua lipu tela bo ba xap garadi disok bila ina te. Tegu. Urana ing sibuna libudi disok garandi.

¹⁴Baing Haruanga sok lipu, saing ma wa liwe mam. Am gabagu ralanoa ba, ralanoa mana Gara taininau baguli, ma rangua Tibuna. Baxagi mana kubolua atin dimoti xaung haruanga maxunama.

¹⁵Yon baxanga mana. Wagi saing harua ba, “Lipua naga ngaharua mana ba, ‘Lipu tela ma kimu manga, yanoa dali ngayua namua na wa muga mana bungina ngasok teguyu.’ ”

¹⁶Kubolua atin dimoti baxagi sibuna mana. Saing mana kuboluna li kira longgalo taxap guxam tela, saing tela, saing ila.

¹⁷Namua na hanaunaungua ma Moses rimania, ne kubolua atin dimoti xaung haruanga maxunama ma Yesu Kristo rimania.

¹⁸Waleu ma lipu tela bagu Urana te, ne Urana Taininau ba, wa Tibuna rubinia, ing ganina baxanga Urana nakira.

¹⁹Yon baxanga bungina Yudadi yanamidingdi disoxi lipu hananiangamdi xaung Libaidi duwa Yerusalem mala rangua bu duxusunga ba, “Ung gaxarea?”

²⁰Baing tula maringina nadi, yamengina te, harua sabasabia ba, “Nga ba nga Urana Lipuxing Mogunganama te.”

²¹Baing duxusunga ba, “Ne ung gaxarea? Ung Elaitsa?” Baing harua ba, “Nga te.” Baing duxusunga ba, “Ung Urana Lipuxing Suxunguxunguama am garagu mana ba?” Haxuya ba, “Tegu.”