Yohani 5:29-46

²⁹Na veni davafumi musembi shawu. Vala yivagolili findu fya usangi davashukuki na kuva vanofu na vala vagolili wafu davashukuki na kuhighiwa.

³⁰“Nenga mweni ng'weshi ha kugola chindu chochosi. Nenga nguhigha kucha wang'ombela Chapanga na highilu yangu ya nakaka. Ngugola ha kucha wudayilili nenga, ila kucha wadayilili yula yanayishili.

³¹“Pandiyijuma nimweni, utovileli wa nenga wuva nakaka ha.

³²Lakini kuna wingi yandovilela na nenga manya kucha kila chatovilela chiva nakaka.

³³Yumwi mwavalayishili vandu kwa Yohani mbatisha na mweni avawombilili utovileli.

³⁴Nenga ngudayila ha utovileli wa mundu, ila ngudeta filongu afi ili mulowuliwi.

³⁵Yohani aveli kucha luliku luyaka na kulangasha na yumwi Mwasekilili lwengi lwaki kwa chipindi chidokwa.

³⁶Nenga ndina utovileli mkomi pitu wula wutawuliwili na Yohani mbatisha. Kwanongwa chichuku shanyimbili Tati ndisimalili, fichuku figola fikulangusha kucha Tati ndi yanayishili.

³⁷Tati, mweni yanayishili akundovelela. Yumwi mukalihela kupikanisha lishu lyaki wala mukalihela kuwona wushu waki chipindi chochosi.

³⁸Yumwi mukuchivika ha chilongu chaki mugati yenu, kwanongwa yumwi mukumjumila ha yula yalayishiwili na mweni.

³⁹Yumwi mkusoma Mayandiku Vang'alili kwanongwa mukuyihola kucha mugati yaki damupati unofu wa jola. Mayandiku vavava ndi yivandovilela!

⁴⁰Lakini yumwi mukulema kwisa kwa nenga mupati unofu.

⁴¹“Ndadayilagha ha kuyanga ukomi kufuma kwa vandu.

⁴²Lakini manya kucha yumwi mumutama ha Chapanga mundima shenu.

⁴³Nenga nyisa kwa litawa lya Tati wangu, mumbokela ha. Lakini payiva mundu wingi akwisa kwa litawa lyaki mweni, yumwi damumupokeli.

⁴⁴Mukudayila kuyijuma mwaveni, wala mkusaka ha ukomi wa Chapanga weka hela! Ponopa damuweshi wuliwuli kujumila nenga?

⁴⁵Mkotoo kuyihola kucha nenga dandivagotoleli kwa Tati. Musa, yumwi yimushuvilileyi ndi davagotoleli.

⁴⁶Leki nakaka mungamjumilili Musa, mungajumilili wuwowu na nengapa, nongwa Musa ayandikili milandu ya nenga.