Yohanes 4:39-52

³⁹Fu di a frow go ferteri den sma tak' Yesus taigi en ala sani san a ben du, meki furu Samariasma fu a foto dati bribi na ini Yesus.

⁴⁰So den kon na Yesus, dan den begi En fu tan na den. Dan A tan tu dei drape.

⁴¹Furu tra sma kon na bribi di den yere san Yesus srefi taki.

⁴²Dan den taigi a frow taki: “Un no e bribi moro nomo fu di yu kon ferteri unu. Now un yere nanga un eigi yesi èn un sabi trutru tak' disi na a Ferlusuman fu heri grontapu.”

⁴³Baka den tu dei dati A kmoto fu drape go na Galilea.

⁴⁴Yesus srefi ben taki tak' sma no e lespeki wan profeiti ini a foto pe a kweki.

⁴⁵Ma di A doro ini Galilea, den sma drape teki En nanga opo anu. Bika den ben de na a Paskafesa ini Yerusalem èn den ben si san A du drape.

⁴⁶So A kon doro baka na Kana ini Galilea, pe A ben meki a watra tron win. Drape wan man fu Kafarnaum ben de di ben e wroko gi kownu. A boi fu a man disi ben e siki.

⁴⁷Di a man yere tak' Yesus kmopo fu Yudea kon baka na Galilea, a go na En. Dan a begi En fu A kon dresi a boi fu en, bika a ben de fu dede.

⁴⁸Yesus taigi en taki: “Solanga unu no si marki nanga wondru, un no e bribi.”

⁴⁹Ma a man piki En taki: “Masra, kon nanga mi fosi mi boi dede.”

⁵⁰Dan Yesus taigi en taki: “Yu kan go, a boi fu yu kon betre.” A man bribi san Yesus taigi en, dan a gwe.

⁵¹Di a ben de na pasi ete, den knekti fu en waka kon miti en nanga a nyunsu tak' a boi fu en kon betre.

⁵²Dan a man aksi den olati a boi ben kon betre. Den piki en taki: “Na esde brekten wan yuru so, a korsu wai.”