Yohana 9:12-38

¹²Wamuza, “Uyo ekuhi?” Awahitula, “Miye simanyize!”

¹³Akaheza wamwigala uyo mntu endaga tuntu kwa Mafalisayo.

¹⁴Zuwa idyo Yesu adamanye ntagata na kumfumbula ameso mntu uyo nendile ni zuwa dya Kuhumula.

¹⁵Mafalisayo niyo wamuza mntu uyo, “Kutenda vivihi niyo wawona?” Mntu uyo awagamba, “Kanihaka ntagata mwa meso, miye nami niyo nahaka haluse nawona.”

¹⁶Mafalisayo watuhu wagamba, “Mntu yuno adamanye ivyo halaile kwa Chohile, kwaviya hakutoza sigilizi ya zuwa dya Kuhumula.” Mna watuhu wagamba, “Mntu mta masa adaha vivihi kudamanya vilagiso savino?” Niyo kwatenda na mahigano mgati mwawo.

¹⁷Mafalisayo wamuza vituhu uyo mntu endaga tuntu, “Weye wamgaze mntu uyo akufumbule ameso yako?” Mntu uyo awagamba, “Mntu uyo ni muwoni!”

¹⁸Vilongozi wa Wayahudi hawakuzumila kugamba mntu uyo endaga tuntu aho nkongo vino haluse awona, kubula hadya weze wawetange welesi wakwe.

¹⁹Ivyo wawauza awo welesi, “Togolani, yuno nuyo mwana wenyu mkugamba nakelekwa tuntu? Haluse katenda vivihi awona?”

²⁰Welesi wakwe wahitula, “Suwe chimanya ni mwanetu, naho nakelekwa tuntu.

²¹Mna hachimanyize kawona vivihi, naho hachimmanyize yudya amfumbule ameso. Muzeni mwenye, uyo ni mntu mjima, adaha kwelongela mwenye.”

²²Welesi wakwe walonga ivyo kwaviya nawakawogoha vilongozi wa Wayahudi kwaviya vilongozi awo nawevana kugamba mntu yoyose nazumile Yesu ni Kulisito nabalazwe kuse kwe nyumba yo kumvikila Chohile.

²³Nivyo vilekile welesi wakwe walongaga kugamba, “Uyo ni mntu mjima, muzeni mwenye.”

²⁴Niyo wamwitanga vituhu yudya endaga tuntu, wamgamba, “Mtogole Chohile! Suwe chimanya kugamba mntu yuno ni mta masa.”

²⁵Mntu uyo niyo ahitula, “Uneva ni mta masa, miye simanyize. Mna chintu chimwenga nimanyize, nendaga tuntu, haluse nawona!”

²⁶Wamuza, “Kakudamanya chibwani? Kakufumbula vivihi ameso yako?”

²⁷Uyo mntu awahitula, “Siwagambilani kale, nyuwe nanywi hamkwiva. Ni mbwani hamkunga kwiva vituhu? Togolani nyuwe nanywi mwaunga mtende wanampina wakwe?”

²⁸Mna wowo niyo wamhitula wakagamba, “Weye wi mwanampina ywakwe, suwe chi wanampina wa Musa.

²⁹Suwe chimanya kugamba Chohile alongaga na Musa, mna mntu yuno hachimmanyize kalawahi!”

³⁰Mntu yudya awahitula, “chino ni chilozo! Nyuwe hammanyize uko alaile, mna kanifumbula ameso yangu!

³¹Chivimanya kugamba Chohile hakuwetegeleza wantu wata masa, mna amwetegeleza yoyose mta kumzumila na kudamanya viya akunga.

³²Kukongela kumbwa kwe isi hainati kwivika kugamba mntu kamhonya meso mntu elekwa tuntu.

³³Uneva mntu uyo halaile kwa Chohile, nahekudaha kudamanya chochose!”

³⁴Wowo wamhitula, “Weye kwelekwa na kukwila mwe masa. Vino wadaha vivihi kuchihinya suwe?” Niyo wambalaza mwe nyumba yo kumvikila Chohile.

³⁵Yesu eva kugamba wambalaza mwe nyumba yo kuvikila yudya mntu amhonyize. Eze amwone, amuza, “Togola, weye wamzumila Mwana ywa Mntu?”

³⁶Uyo mntu ahitula, “Zumbe, nigambila ni yuhi chani nimzumile!”

³⁷Yesu amgamba, “Kuheza kumwona, uyo akulonga na weye haluse nuyo.”

³⁸Uyo mntu agamba, “Zumbe, nazumila!” Niyo amvikila Yesu.