34 Fyo idyo niyo dyamhitula, “Suwe chagambilwa ni sigilizi yetu kugamba Kulisito nekale mazuwa yose, haluse wadaha vivihi kugamba Mwana Mntu aungwa enulwe? Uyo Mwana Mntu ni yuhi?”
35 Yesu awagamba, “Ung'azi uchei na nyuwe kwa chipindi chiguhi, talamkani mche mnanawo uwo ung'azi chani chilo chise kuwabwila, kwaviya akutalamka mwe chiza hamanyize uko akwita.
36 Umo mnanawo uwo ung'azi uzumileni chani mtende wantu wa ung'azi.” Eze alonge imilosi iyo, Yesu niyo ahalawa hekumanya aita hekukumanyika.
37 Hatahegu Yesu na kadamanya mpituko ino yose mwa meso yawo, wowo hawamzumile.
38 Ivyo milosi alongile muwoni Isaya niyo yalaila; “Zumbe ni yuhi auzumile ulosi wetu? Naho udahi wa Zumbe ugubulwa kwa yuhi?”
39 Ivyo hawadahile kuzumila kwaviya Isaya nakalonga vituhu,
40 “Chohile kajela utuntu ameso yawo, kazibalanga izifanyanyi zawo, wasekuwona kwa meso yawo, wasekumanya kwa fanyanyi zawo, naho wasekunihitukila, alonga Zumbe, chani niwahonye.”
41 Isaya kalonga imilosi ino kwaviya kauwona ukulu wa Yesu, niyo alonga mbuli zakwe.
42 Mna vilongozi walozize Wayahudi niyo wamzumila Yesu, mna kwachausa cha Mafalisayo, hawalongile holumpe kwa kogoha kugamba na wasentwe ne nyumba yo kuvikila.
43 Nawaungisa kutogolwa ni wantu kujinka kutogolwa ni Chohile.
44 Aho Yesu aguta, “Mntu akunizumila miye, hakunizumila miye du, mna amzumila yudya anisigile.
45 Akuniwona miye amwona na uyo anisigile.
46 Miye ni ung'azi nami siza mwe isi chani wose wakunizumila wasekusigala mwe ichiza.
