Yoan 6:20-30

²⁰Eemoghon Yesu isaav padi ighaze: “Amatughez malep! You nanepneep.”

²¹Ghoro lolodi poia, ve tighami iza waaŋ. Rikia moghon ve tila tilooŋ naari to tighaze tila pani.

²²Ival tiina to tineep izi ya naliu paŋa ite, tisaŋan Yesu mboŋ le ndugizau. Ghoro tigham ŋgar naol pani. Pasa, noor tighita waaŋ ee moghon to taghoniiŋa toni tighami ve tila. Waaŋ ite paam maau. Eemoghon Yesu ila toman di maau. Taghoniiŋa toni moghon to tivot tila. Ival tiina tonowen tinepneep tonowe, ve waaŋ geegeu pida to ndug Tiberias tilooŋ tigharau ndug to noor moghon Tiina toit ineep pani, ve ipait Maaron pa aniiŋ, ve igham pa ival tiina ve tighan.

²⁴Ival tiina to tisasaŋan Yesu, tighita Yesu toman taghoniiŋa toni naghodi maau, tovenen tiza waaŋ geegeu tonowen, ve yesŋa waaŋ tamtoghonadi tiraav tivool tila pa Kapernaum. Leso tikaal Yesu tonowe.

²⁵Ival tiina tonenen tila tilooŋ ya naliu paŋa ite, ve tindeeŋ Yesu tonowe. Tovenen tighasoni tighaze: “Mos Tau, unum sualen ŋeez?”

²⁶Yesu ipamuul aliŋadi ighaze: “You nasaav payam. Onoon kat, yam agham ŋgar pa mbeb gharatooŋadi tintina to nagham di tinim ghilalooŋ payam, ve akaal ghou anim ne maau. Yam ataghon ghou anim pasa, aghan katin aniiŋ le apomim isuŋ!

²⁷Alooŋ, aniiŋ to isami rikrikia, yam arab taumim pani malep. Yam irau azuaria gham pa aniiŋ to pale igham gham aneep matamim iyaryaar le alok. Aniiŋ tonowen, Tamtoghon Natu irau igham payam. Pasa, Tama Maaron igham mbeb gharatooŋa inim ghilalooŋ pani, tauto ipatooŋa ighaze ye iza pa ghamuuŋ uraat tovene.”

²⁸Tovenen yes tighasoni: “Ighaze venen, pale nigham sa, leso nigham uraat to Maaron lolo pani?”

²⁹Yesu ipamuul aliŋadi ighaze: “Uraat to Maaron ighaze yam aghami, nene vene: Yam irau aghur ila to ŋgeu to ye imbaaŋa inim.”

³⁰Tovenen tighasoni muul: “Venen, pale ugham sa mbeb ivot inim ghilalooŋ payei, leso nighita ve nighur ila nighaze Maaron ineep toman ghom pa uraat tiom? Ughita. Yei nighur ila saveeŋ to Mose pasa, muuŋ sawa to nditimbumai tilaghlaagh izi ndug balim, ye igham aniiŋ manna padi, ve tighanghan. Saveeŋa timbooda pataghaaŋ wa. Ighaze: ‘Ye igham aniiŋ to sambam izi padi ve tighan.’”