Yabura 68:14-35 in Susu

¹⁴ Wo fama wo malabude wo xa xurusee fɛ ma. Ala mɛɛnima nɛ a xa ɲama ma alɔ a mɛɛnima ganbɛe ma ki naxɛ. E gabutenyi luma alɔ gbeti nun xɛɛma nan na e ma.»

¹⁵ Ala Xili Xungbe Kanyi bara mangɛe rayensen Salamon geya ma balabalanyi saabui ra.

¹⁶ Basan geya, Ala naxan daaxi, konde wuyaxi naxan bɛ,

¹⁷ wo na Ala xa geya sugandixi matofe tɔɔnɛ ra munfe ra, a bara a xa hɔrɔmɔlingira ti dɛnnaxɛ? Ala luma nɛ mɛnni tɛmui birin.

¹⁸ Alatala xa geresoe xa gisee wuya dangi wulu fu ra. A xa geresoe fan dangi wulu wulue ra. Ala na e ya ma. Sinayi geya na yire sɛniyɛnxi kui.

¹⁹ N Marigi Alatala, i bara te koore ma. I bara geelimanie xanin. Adamadie bara i buɲa, matandilae fan bara wa sofe i xɔnyi.

²⁰ Tantui na i bɛ lɔxɔɛ birin, a won ma kote xaninfe lɔxɔ yo lɔxɔ. Won ma marakisima na Ala nan na.

²¹ Won Marigi Alatala won nakelima nɛ faxɛ ma. Won ma marakisima na Ala nan na.

²² Ala a yaxuie xunyi kanama nɛ. Naxee ɲɛrɛ kira ɲaaxi xɔn ma, a nee fan xun xɔri bɔɔma nɛ.

²³ Marigi naxɛ, «N fama nɛ e ra kelife Basan, n fa e ra kelife baa ma,

²⁴ alako wo xa fa e wuli to wo sanlaabe ra. Wo xa baree fan e donma nɛ.»

²⁵ Ala, muxu bara i to fa ra ɲama ya ma. Ala nun a xa mangɛ sugandixi na sofe hɔrɔmɔlingira kui.

²⁶ Bɛɛtibae na yare, kɔra bɔnbɔɛe na e fɔxɔ ra, ginɛe na maxase ramaxafe e rabilinyi.

²⁷ Wo xa Ala tantu malanyie, Isirayila xa die, wo xa Alatala tantu.

²⁸ Bunyamin nan ya, naxan barixi dɔnxɔɛ ra. A tan nan findixi e xa mangɛ ra. Yudaya mangɛe nan ya, e nun e xa mixie. Sabulon mangɛe nan ya, Nafatali mangɛe nan ya.

²⁹ Ala, i xa masenyi ti sɛnbɛ ra. I xa i sɛnbɛ masen alɔ tɛmui dangixi.

³⁰ I xa banxi na Darisalamu. Mangɛe fama i buɲade naa.

³¹ I xa xaaɲɛ Misira ma, naxan maniyɛ mali xungbe ra naxan na ye xɔɔra. A luma alɔ tuura gali, ninge yɔrɛe biraxi naxee fɔxɔ ra. Na ninge yɔrɛe luma alɔ si gbɛtɛe naxee duuti fima Misira ma. Si gbɛtɛe naxee wama gere xɔn, i xa e rayensen yɛ.

³² Misira xɛɛrae, a nun Kusi xɛɛrae, xa fa duuti ra Ala bɛ.

³³ Mangɛ naxee birin na duniɲa, nun a rabilinyi, wo xa bɛɛti ba Ala bɛ, wo xa Alatala tantu,

³⁴ naxan ɲɛrɛma nuxui fari koore ma kabi a rakuya, naxan galanyi xui raminima sɛnbɛ ra.

³⁵ Wo xa a kolon, Ala sɛnbɛ gbo. A Isirayila yamarima a sɛnbɛ ra, sɛnbɛ naxan kelima koore ma.

¹⁴ وٌ قَمَ وٌ مَلَبُدٍ وٌ شَ شُرُ سٍيٍ قّ مَ. عَلَ مّينِمَ نّ عَ شَ حَمَ مَ عَلْ عَ مّينِمَ فَنبّيٍ مَ كِ نَشّ. عٍ فَبُتٍنيِ لُمَ عَلْ فبٍتِ نُن شّيمَ نَن نَ عٍ مَ.»

¹⁵ عَلَ شِلِ شُنفبٍ كَنيِ بَرَ مَنفّيٍ رَيٍنسٍن سَلَمٌن فٍيَ مَ بَلَبَلَنيِ سَابُي رَ.

¹⁶ بَسَن فٍيَ، عَلَ نَشَن دَاشِ، كٌندٍ وُيَشِ نَشَن بّ،

¹⁷ وٌ نَ عَلَ شَ فٍيَ سُفَندِشِ مَتٌقٍ تْونّ رَ مُنقٍ رَ، عَ بَرَ عَ شَ هْرْ مْلِنفِرَ تِ دّننَشّ؟ عَلَ لُمَ نّ مّننِ تّمُي بِرِن.

¹⁸ عَلَتَلَ شَ فٍرٍ سٌي شَ فِسٍيٍ وُيَ دَنفِ وُلُ قُ رَ. عَ شَ فٍرٍ سٌي قَن دَنفِ وُلُ وُلُيٍ رَ. عَلَ نَ عٍ يَ مَ. سِنَيِ فٍيَ نَ يِرٍ سّنِيّنشِ كُي.

¹⁹ ﭑ مَرِفِ عَلَتَلَ، عِ بَرَ تٍ كٌورٍ مَ. عِ بَرَ فٍيلِمَنِيٍ شَنِن. عَدَ مَدِيٍ بَرَ عِ بُحَ، مَتَندِلَيٍ قَن بَرَ وَ سٌقٍ عِ شْنيِ.

²⁰ تَنتُي نَ عِ بّ لْشْي بِرِن، عَ وٌن مَ كٌتٍ شَنِنقٍ لْشْ يٌ لْشْ. وٌن مَ مَرَكِسِمَ نَ عَلَ نَن نَ.

²¹ وٌن مَرِفِ عَلَتَلَ وٌن نَكٍلِمَ نّ قَشّ مَ. وٌن مَ مَرَكِسِمَ نَ عَلَ نَن نَ.

²² عَلَ عَ يَشُييٍ شُنيِ كَنَمَ نّ. نَشٍيٍ حّرّ كِرَ حَاشِ شْن مَ، عَ نٍيٍ قَن شُن شْرِ بْو مَ نّ.

²³ مَرِفِ نَشّ، «ﭑ قَمَ نّ عٍ رَ كٍلِقٍ بَسَن، ﭑ قَ عٍ رَ كٍلِقٍ بَا مَ،

²⁴ عَلَكٌ وٌ شَ قَ عٍ وُلِ تٌ وٌ سَنلَابٍ رَ. وٌ شَ بَرٍيٍ قَن عٍ دٌنمَ نّ.»

²⁵ عَلَ، مُشُ بَرَ عِ تٌ قَ رَ حَمَ يَ مَ. عَلَ نُن عَ شَ مَنفّ سُفَندِشِ نَ سٌقٍ هْرْ مْلِنفِرَ كُي.

²⁶ بّيتِبَيٍ نَ يَرٍ، كْرَ بْنبْييٍ نَ عٍ قْشْ رَ، فِنّيٍ نَ مَشَسٍ رَ مَشَقٍ عٍ رَبِلِنيِ.

²⁷ وٌ شَ عَلَ تَنتُ مَلَنيِيٍ، عِسِرَيِلَ شَ دِيٍ، وٌ شَ عَلَتَلَ تَنتُ.

²⁸ بُنيَمِن نَن يَ، نَشَن بَرِشِ دْنشْي رَ. عَ تَن نَن قِندِشِ عٍ شَ مَنفّ رَ. يُدَيَ مَنفّيٍ نَن يَ، عٍ نُن عٍ شَ مِشِيٍ. سَبُلٌن مَنفّيٍ نَن يَ، نَقَتَلِ مَنفّيٍ نَن يَ.

²⁹ عَلَ، عِ شَ مَسٍنيِ تِ سّنبّ رَ. عِ شَ عِ سّنبّ مَسٍن عَلْ تّمُي دَنفِشِ.

³⁰ عِ شَ بَنشِ نَ دَرِ سَلَمُ. مَنفّيٍ قَمَ عِ بُحَدٍ نَا.

³¹ عِ شَ شَاحّ مِسِرَ مَ، نَشَن مَنِيّ مَلِ شُنفبٍ رَ نَشَن نَ يٍ شْورَ. عَ لُمَ عَلْ تُورَ فَلِ، نِنفٍ يْرّيٍ بِرَشِ نَشٍيٍ قْشْ رَ. نَ نِنفٍ يْرّيٍ لُمَ عَلْ سِ فبّتّيٍ نَشٍيٍ دُوتِ قِمَ مِسِرَ مَ. سِ فبّتّيٍ نَشٍيٍ وَ مَ فٍرٍ شْن، عِ شَ عٍ رَيٍنسٍن يّ.

³² مِسِرَ شّيرَيٍ، عَ نُن كُسِ شّيرَيٍ، شَ قَ دُوتِ رَ عَلَ بّ.

³³ مَنفّ نَشٍيٍ بِرِن نَ دُنِحَ، نُن عَ رَبِلِنيِ، وٌ شَ بّيتِ بَ عَلَ بّ، وٌ شَ عَلَتَلَ تَنتُ،

³⁴ نَشَن حّرّ مَ نُشُي قَرِ كٌورٍ مَ كَبِ عَ رَكُيَ، نَشَن فَلَنيِ شُي رَ مِنِمَ سّنبّ رَ.

³⁵ وٌ شَ عَ كٌلٌن، عَلَ سّنبّ فبٌ. عَ عِسِرَيِلَ يَمَرِ مَ عَ سّنبّ رَ، سّنبّ نَشَن كٍلِمَ كٌورٍ مَ.