Yabekbi 15:15-31

¹⁵Piŋkop da Amɨn Ŋwakŋwarɨ Kabɨ don tɨmɨtdɨsak dakon geni uŋun kombɨ amɨn da kalɨpsigwan kɨlɨ yawit. Gen uŋun yaŋ tosok:

¹⁶‘Amɨn Tagɨ da yaŋ yosok, “Dewit dakon dɨwatni uŋun yut kɨnda yombem. Uŋun yut da maŋ tuwɨl kɨgɨt, mani nak da aeno don abɨŋ aŋmɨlɨp aŋek wɨtjɨkeŋ.

¹⁷Yaŋ abo Amɨn Ŋwakŋwarɨ Kabɨ morap naga do kɨlɨ manjɨgɨm uŋun da Amɨn Tagɨni nak wɨsɨni.” ’

¹⁸Gen uŋun Amɨn Tagɨ da kalɨpsigwan kɨlɨ yagɨt.”

¹⁹Jems da saŋbeŋek yaŋ yagɨt, “Do nak yaŋ nandɨsat, Amɨn Ŋwakŋwarɨ Kabɨ but tobɨl aŋek Piŋkopmon kwaŋ uŋun nin da jɨgɨ dɨma yomneŋ do nandɨsat.

²⁰Kalɨpsi da wɨŋ abɨsok on ekwamaŋon kokup pap morap taŋ aŋaŋ kwaŋon Moses dakon gen yaŋ teŋteŋawit. Sabat bɨsap morapmon Juda amɨn dakon muwut muwut yutnon Moses dakon gen manjɨŋ manjɨŋ awit. Do yum but pɨso papia kɨnda yaŋ mandaŋ yomneŋ. Ji kokup kɨdat do paret abi uŋun dakon jap dɨma noni. Jap uŋuden Piŋkop da pɨndakban dɨma noknogɨ aŋ. Ae mɨŋat wɨliyo yumabi mibɨlɨ mibɨlɨ dɨmasi ani. Ae bɨt kɨlapyo si tɨpba kwoŋ gat ae yawiyo kɨsi dɨmasi noni.”

²²Yabekbi kabɨ gat ae kɨla amɨn gat ae paŋmuwukbi morap gat da iyɨkon amɨn bamorɨ pɨndakba Pol Banabas gat Antiok kɨni do yawit. Yaŋ yaŋek Judas mani kɨnda Basabas gat ae Sailas gat yaŋ manjɨwit. Uŋun amɨn paŋmuwukbi dakon kɨla amɨn bamot egɨpgumal.

²³Amɨn bamot do papia yomgwit uŋungwan gen yaŋ mandawit, “Nin yabekbi kabɨ ae paŋmuwukbi dakon kɨla amɨn, nin ji dakon notji da papia on mandamaŋ. Amɨn Ŋwakŋwarɨ Kabɨ Yesu nandaŋ gadaŋ ɨmaŋ amɨn Antiok ae Siria ae Silisia Provinskon ekwaŋ ji gɨldat tagɨ yaŋ dayamaŋ.

²⁴“Nin da kabɨkon amɨn dɨwarɨ da kɨŋ ji dakon nandak nandak paŋupbal awit dakon geni kɨlɨ nandagɨmaŋ. Nin da yaŋ yoyɨni yaŋ dɨma yoyɨŋapno kɨŋ dayɨwit.

²⁵Nin ɨdon muwuk but kaloŋ aŋek amɨn bamot ji do kɨni do manjɨgɨmaŋ. Manjɨŋ yopno notnin bamot galagɨsi nandaŋ yomamaŋ Pol ae Banabas uŋun gat kɨni do yaŋ yomgumaŋ.

²⁶Amɨn bamot uŋun egɨp egɨpni dɨma paŋkutnaŋek Amɨn Tagɨnin Yesu Kristo dakon man yoyɨŋ teŋteŋagɨmal.

²⁷Nin da Judas gat Sailas gat gen on mandamaŋ uŋun naŋ gɨn dayɨnjil do yabekgamaŋ.

²⁸Telagɨ Wup da nandɨsak, ninyo kɨsi yaŋ gɨn nandaŋek yaŋ dayamaŋ, jɨgɨ morapmɨ dɨma damneŋ. Gen teban onjok baŋgɨn yolni.

²⁹Ji bɨt kɨlapyo kokup kɨdat do dapmaŋ paret aŋ uŋun dɨma noni. Ae yawi dɨma noni. Ae si tɨpba kwoŋ uŋunyo kɨsi dɨma noni. Aŋek mɨŋat wɨliyo yumabi mibɨlɨ mibɨlɨ dɨma ani. Ji kaŋ kɨmagek uŋun aŋpak morap yapni kaŋ uŋun tagɨsi. Nin dakon gen yaŋ gɨn. Do ji tagɨsi egɨpni.”

³⁰Amɨn bamot yabekba Antiok pɨgɨ paŋmuwukbi kabɨ yaŋ yobal muwukba papia uŋun yomgumal.

³¹Yobal paŋmuwukbi da papia uŋun manjɨŋba uŋun da burɨ paŋteban aban but galaksi nandawit.