14 Gbɛ̃kenↄ kuu aↄ̃ swaa dɛ lán fɛ̃ɛdaa bà, aↄ̃ swaa sↄ̃ntɛnↄↄ dɛ lán fɛ̃ɛnↄ bà, aↄ̃è anduna takaasideenↄ kↄ̃n gbɛ̃ntee wɛ̃ndadeenↄ kɛo gyaigyai.
15 Mìsi nɛ́nↄgbɛ̃nↄ vĩ gↄ̃ↄn plaa, aↄ̃è be: Ǹ wa gbaa, ǹ wa gbaa. Pↄ́ mɛ̀n aagↄ̃ kuu kɛ̀ aↄ̃è kãro, à kà siigↄ̃ se, aↄ̃è be pↄ́ mↄ̀ḿmaro:
16 Gɛ̀wãa kↄ̃n pãa nɛ́'isↄo kↄ̃n tↄↄtɛo zaakɛ í è mↄ́aro kↄ̃n tɛ́o zaakɛ è be a kãro.
17 Wɛ́ɛ kɛ̀ nɛ́ è a de faboo bensↄ̃ è kyakao a dan, swawɛɛ gbáa kãnkãnanↄ é à wɛ́ɛ pì bↄ, yeberekunↄ é à gɛ̀ ble.
18 Yã mɛ̀n aagↄ̃ kuu kɛ̀ aↄ̃ↄ dɛ ma dↄ̃nala, à kà mɛ̀n siigↄ̃ se má ń mì dↄ̃ro:
19 Zɛ́ kɛ̀ kúu ègↄ̃ tɛ́o musu, zɛ́ kɛ̀ mlɛ̃̀ ègↄ̃ táa oon gbɛ̀ sàraa, zɛ́ kɛ̀ góro'itɛ ègↄ̃ tɛ́n ísiaa dagura kↄ̃n zɛ́ kɛ̀ gↄ̃gbɛ̃ ègↄ̃ yeo nↄkparɛzio.
20 Nↄ zinakɛri yãkɛnan yɛ̀: È pↄ́ ble à ↄ ma a lɛ́a à be ée yã zaaa kɛro.
21 Yã mɛ̀n aagↄ̃ bé è tó tↄↄtɛ lugaluga, à kà siigↄ̃ se, tↄↄtɛ é yã pìnↄ fↄ̃ro:
22 Zↄ̀ kɛ̀ à kpata blè, yↄ̃nkↄↄ kɛ̀ pↄ́ blè à kã̀,
23 nↄgbɛ̃ kɛ̀ wà zàn ben à zã kɛ̀ kↄ̃n zↄ̀ nↄkparɛ kɛ̀ gↄ̃̀ a dii zã nↄↄ ũuo.
24 Pↄ́ nɛ́ngonↄↄ kú tↄↄtɛ mɛ̀n siigↄ̃, mↄde aↄ̃ ↄ̃ndↄ̃ↄ vĩ maamaa:
25 Babannɛnↄ kuu pↄ́ gbãaanↄ ũro, mↄde aↄ̃è blɛ zi di kwɛɛmɛ.