3 Ɔ̃ndↄ̃n òdi bɛ pɛ́tɛo, laakarii dì tó àgↄ̃ arubarika vĩ.
4 Dↄ̃naan òdi pↄ́ káo kpɛ́nↄ pa kũ aruzɛkɛ mana bɛ̀ɛrɛdeo.
5 Ɔ̃ndↄ̃de gbãna dìgↄ̃ karamɛ, dↄ̃̀ri ikoo dìgↄ̃ gɛ́ arɛmɛ.
6 Baaruu dì tó ò zĩ̀ asãnsĩni dↄ̃, tó yãkɛkɛrinↄn dasi, àdi tó ò zĩ̀ ble.
7 Ɔ̃ndↄ̃ lei de fayasaridela, lakutu kↄ̃kakaranaa gũn a lɛ́ dìgↄ̃ nakↄ̃anamɛ.
8 Gbɛ̃ kũ àdigↄ̃ vãnikɛnnɛna laasun vĩn òdi a sísi manafikide.
9 Yãfayasari wàaripana bi durunnamɛ, gbɛ̃ke dìgↄ̃ ye lalandikɛriiiro.
10 Tó n mɛ̀busɛɛ kɛ̀ warikɛgↄrↄa, n gbãna zↄ̃kↄ̃ro.
11 Ǹ gbɛ̃ kũ ò mìi pɛ̀ gaanↄ sura ba, ǹ gí gbɛ̃ kũ ò sòro òtɛn si kakatɛnannↄnɛ.
12 Tó n pì: O'o, ó dↄ̃ yãro fá, Luda kũ à nɛ̀sɛgũnyã dↄ̃ ni eroo? N wɛ̃̀ndi Gwàri a yã dↄ̃, ani fĩna bo baadinɛ a yãkɛnaaamɛ.
13 Ma nɛ́, ǹ zↄ́ ble, zaakũ à mana, zↄ́sa dì kɛ lɛ́nɛ nna.
14 Lɛn ↄ̃ndↄ̃ dì kɛ gbɛ̃nɛ nna a nɛ̀sɛn lɛ. Tó n ↄ̃ndↄ̃ kũ̀, ĩnigↄ̃ zia vĩ, tãmaa ni n nɛro.
15 Dàde, ǹsun gbɛ̃ mana ↄn kpákparo, ǹsun a bɛ pↄ́nↄ wararo.
16 Bee tó gbɛ̃ mana lɛ̀tɛ gɛ̃̀n suppla, àdi ɛra à futɛmɛ, yãvãnikɛrinↄ sↄ̃, kisira dì ń fu.
17 Tó n ibɛrɛ lɛ̀tɛ, ǹsun pↄnna kɛro, tó à fù, ǹsun à yáa dↄro.
