3 aↄ̃ gↄ̃ wɛ́ɛzɛ̃ri làakarideenↄ ũ maakɛna kↄ̃n yãzɛdeeo kↄ̃n náanɛo yã guu.
4 Yáasi kɛ̀nↄ è nↄ̀sɛdodee gba làakari, è tó ↄ̀wazi gↄ̃ kú à dↄ̀rↄa kↄ̃n dↄ̃nao.
5 Làakaridee é ma, à yãdadana e à kaara, nↄ̀sɛdee é lɛ́damma e à guu,
6 eé yáasi kↄ̃n yãlɛkↄ̃zinao mì dↄ̃ kↄ̃n ↄ̃ndↄ̃rinↄ yã'onao kↄ̃n ń gara gbooto yãnↄ.
7 Vĩakɛna Diinɛn dↄ̃na kãsãa ũ, yↄ̃nkↄↄ bé è kya ká ↄ̃ndↄ̃ↄn kↄ̃n lɛ́dammanao.
8 Ma nɛ́, ǹ n de yã'onnɛna ma, ǹton pã kpá n da lɛ́dammaziro.
9 Eégↄ̃ dɛ fùra maaa ũ n mìa, eégↄ̃ dɛ kã̀mbɛɛ ũ n waalɛ.
10 Tó durunkɛrinↄↄ e ↄ̃ndↄ̃ↄ daɛnzi, ǹton wero, ma nɛ́.
11 Aↄ̃è be: Ǹ mↄ́ wà gá gbɛ̃nↄ dãdã wà ń dɛdɛ, wà taarisaideenↄ kpákpa wà ń kũkũ.
12 Wà ń mↄ́mↄ bɛ̃ɛ lán mira è ń mↄ́mↄ nà, wà ń mↄ́ zaa lán gɛ̀wãa è ń mↄ́ zaa nà,
13 wé pↄ́ ↄↄde bori sãnda píngi e, wa kpɛ́nↄ é pa kↄ̃n pↄ́ kɛ̀ wá nàkↄ̃anↄ.
14 Ǹ mↄ́ wà wa baka kakↄ̃a, wa píngi wa ↄↄsↄ̃ↄ égↄ̃ dↄ̃nkↄ̃.
15 Ma nɛ́, ǹton gáńyoro, ǹton zɛ́ sɛ́ńyoro.
16 Zaakɛ aↄ̃ègↄ̃ wãa kↄ̃n yãzaakɛnao, aↄ̃ↄ kpaa kↄ̃n gbɛ̃dɛnao.
17 Bàkpakpana bãanↄ wáa nɛ́ yã pãamɛ.
