7 Ɔ̃ndↄ̃de lɛ́ dì dↄ̃na fã, yↄ̃nkↄnↄ sↄ̃, ò nɛ̀sɛ vĩro.
8 Dikiri tɛ̃̀ɛmɛ gbɛ̃ vãninↄ sa'ona ũ, ama gbɛ̃ mananↄ wɛ́kɛnaa dì káagu.
9 Dikiri zã̀ gbɛ̃ vãni yãkɛnan, à ye gbɛ̃ kũ ò tɛ́ yãzɛdeinↄi.
10 Foru pãsĩmɛ gbɛ̃ kũ à pã̀ zɛ́nɛ pↄ́ ũ, gbɛ̃ kũ à ye lɛ́dammairo sↄ̃ ani gamɛ.
11 Lákũ Dikiri gyãwãn kũ kakatɛnaao yã dↄ̃ nà, oni bisãsiri swɛ̃̀ pↄ́ o dↄ yá?
12 Lalandide dìgↄ̃ ye ò a gba laakariro, àdi gɛ́ ↄ̃ndↄ̃rinↄ kĩnaaro.
13 Nɛ̀sɛ nna dì tó ãn gↄ̃ werena, nɛ̀sɛ yakanaa dì gbɛ̃ mɛ̀ dɛ.
14 Laasunde dì dↄ̃na wɛtɛ, yↄ̃nkↄ dì yãfayasari mↄ́mↄ.
15 Gↄrↄ sĩnda pínki dìgↄ̃ pãsĩ wɛ̃ndadenɛmɛ, pↄnnade dìgↄ̃ kú dikpɛ gũn.
16 Pↄ́ vĩna fíti vĩnakɛna Dikirinɛɛ gũn mana de aruzɛkɛ zↄ̃kↄ̃ kũna wari gũnla.
17 Dò pã blena yenyĩ gũn mana de nↄ̀bↄ níside sona kũ zãnguola.
18 Pↄfɛ̃rii dì fìti da, nɛ̀sɛyĩdade dì zuka mì dɛ.
19 Ma'ãde zɛ́ dìgↄ̃ denɛ lɛ̀kara ũmɛ, gbɛ̃ mana zɛ́ bi zɛ́damɛ.
20 Nɛ́ ↄ̃ndↄ̃de dì tó a de pↄ kɛ nna, bisãsiri yↄ̃nkↄ dì a da gya bo.
21 Yãfayasarii dì kɛ laasunsaridenɛ nna, laasunde dì zɛ́ sɛ́ súsu.
22 Lɛ́kpakũsũnasari dì yã gboro, lɛ́dammari dasinↄ dì tó yã kɛ.
23 Yãwemmanaa dì a òri pↄ kɛ nna, yã'ona a gↄrↄaa dìgↄ̃ nna fá!
24 Wɛ̃̀ndi zɛ́ dì gɛ́ kũ laakaridenↄ musu de òsun sí gyãwãnnlo yãi.
25 Dikiri dì zĩdabiri ↄn wí, àdi gyaanↄ gulɛzɛki dãkpã.
26 Dikiri zã̀ laasun vãnin, yãnna'onaa dì kɛnɛ gbãsĩro.
27 Ɔgↄvãniwɛtɛrii dì wari dↄ a ↄnnwa, gbɛ̃ kũ à zã̀ gusarɛgban nigↄ̃ kun aafia.
28 Gbɛ̃ mana dì laasun lɛ́ yã kũ ani weḿmaa, yã vãni dì bo gbɛ̃ vãninↄ lɛ́n gↄ̃̀nↄ.
29 Dikiri zã̀ kũ gbɛ̃ vãninↄ, àdi sã kpá gbɛ̃ mananↄ aduakɛnaai.
30 Ãnwerenaa dì ń pↄ kɛ nna, baaru nna dì ń wá were.
31 Gbɛ̃ kũ àdi sã dↄ aafia lɛ́dammai nigↄ̃ bede ũ ↄ̃ndↄ̃rinↄ tɛ́.
32 Gbɛ̃ kũ à gì foruii zã̀ a zĩdan, lɛ́dammamari sↄ̃ àdi gↄ̃ laakaride ũ.
