Yáasiↄ 28:3-20 in Boko (Benin)

³Kía pↄ́ ì ĩada yɛ̃̀ɛɛsaideↄwa dɛ lán lou pↄ́ ì kwɛ à blɛ ↄ̃̀ↄkpawaɛ.

⁴Ikoyãdansaiↄ ì gãga vãikɛnaↄnɛ, ikoyãdanaↄ sↄ̃ aaì bↄ ń kpɛɛ.

⁵Gbɛ̃vãiↄ yã́zɛde gbadↄ̃o, gbɛ̃́ pↄ́ lɛ́ Dii aɛyaↄ dↄ̃ wásawasa.

⁶Taaside tàaesaide maa dɛ ↄde yãkpaanlakɛnala.

⁷Nɛ́ ikoyãdana wɛ́ kɛ̃a, lalasideↄ gbɛ̃na ì wida a maewaɛ.

⁸Gbɛ̃́ pↄ́ ì a àizɛɛ kã́fĩ ↄ'igbaa ń àiwɛɛlɛa zↄ̃ↄo guu lɛ́ pↄ́ kãaa gbɛ̃́ pↄ́ ì taasideↄ wɛgwaɛɛ.

⁹Gbɛ̃́ pↄ́ ì ikoyã kpá swã́a, Lua líↄ ye aà wabikɛawa gĩyãio.

¹⁰Gbɛ̃́ pↄ́ ì gbɛ̃maaↄ da zɛ́ vãiwa, a lɛ́lɛ da azĩa baiuɛ, tàaesaideↄ sↄ̃ aa bↄ maa.

¹¹Ɔde ì azĩa dilɛ ↄ̃nↄna ũɛ, kási taaside wɛzɛ̃na ì aà ↄ̃nↄ dↄ̃wàɛ.

¹²Tó gbɛ̃maaↄ kúkua dↄ, gbɛ̃́pii ìↄ ĩ́anadãɛ, tó vãikɛnaↄ gbãakũ̀, baade ìↄ mikpaguiɛ.

¹³Tó n n tàaeↄ ùlɛ, ńyↄ̃ gɛ́ aɛo, tó ń ò mɛ́ ń tò, Lua a n wɛ̃nagwa.

¹⁴Báaaden gbɛ̃́ pↄ́ Dii vĩa vĩ ũ. Swã́gbãade sↄ̃ ì lɛ́lɛ da taasiu.

¹⁵Gbɛ̃vãi pↄ́ ì kible yɛ̃̀ɛɛsaideↄwa dɛ lán nↄ̀ↄmusu pũnaawaɛ, lán gbɛaana kusiamáwa.

¹⁶Dↄaana pↄ́ ì gbɛ̃́ wɛtã wɛ́ kɛ̃ao, gbɛ̃́ pↄ́ za ↄvãi'eau wɛ̃ni ìↄ gbã̀a.

¹⁷Gbɛ̃dɛna pↄ́ a làasoo lɛ́ ĩadawa aↄ bàalɛ e a gɛ gaòɛ. Gbɛ̃e su kpaɛ̀o.

¹⁸Gbɛ̃́ pↄ́ ì yãkɛ a zɛ́wa aↄ aafiaɛ, yãdↄↄsaikɛna sↄ̃ a ɛɛ kã́ndoɛ.

¹⁹Gbɛ̃́ pↄ́ ì laaidↄ a buazĩwa ìↄ kãa, gugiiyana sↄ̃ ìↄ ku pↄ́kɛ̃sãma guuɛ.

²⁰Lua a báaada náaidegu maamaaɛ, gbɛ̃́ pↄ́ lɛ́ wã à kɛ ↄde ũ a bↄ pão.