Yáasiↄ 1:1-19 in Boko (Benin)

¹Yáasi pↄ́ Davidi nɛ́ Salomↄↄ, Isailiↄ kía kɛ̀,

²kɛ́ gbɛ̃́ↄ e ↄ̃nↄkũ, aaↄ laai vĩ, aai dↄ̃ayã dada,

³aai gↄ̃ wɛzɛ̃n làasoodeↄ ũ, maakɛa ń yã́zɛdeo ń náaio yã́ musu.

⁴Yáasipiↄ ì nↄ̀sɛdoũde gba laai, ì to ɛ̀waaso àↄ ku a dↄ̀ↄwa ń dↄ̃ao.

⁵Laaide i ma, aà yãdadaa i gɛ́ aɛ, nↄ̀sɛde i lɛdama e a guu,

⁶i yáasi ń yãlɛɛũanɛo midↄ̃ ń ↄ̃nↄdeↄ yã'oao ń ń faai yã́ↄ.

⁷Vĩakɛa Diiɛ mɛ́ dↄ̃a zĩ́na ũ, gbɛ̃́ pↄ́ ì saka ↄ̃nↄ ń yãdadaaoguá sↄũɛ.

⁸Ma nɛ́, nìli n mae yã'onɛ ma, ńsu pãkpa n da lɛdamaio.

⁹Aↄ dɛ fùa kɛfɛna ũ n miwa, aↄ dɛ yàbaa ũ n nↄɛ.

¹⁰Tó duunkɛnaↄ lɛ́ kↄ̃nikɛnɛ, ńsu weio, ma nɛ́.

¹¹Aaì mɛ: Mↄ wà gɛ gbɛ̃́ↄ dã́dã wà ń dɛdɛ, wà yãesaideↄ kpákpa wà ń kṹkũ.

¹²Wà ń mↄ́mↄ bɛ̃̀ɛ lá mia ì kɛwa, wà ń mↄ́ ĩ́i lá bɛda ì kɛwa,

¹³wí pↄ́ ↄde bui píi e, wá kpɛ́ↄ i pa ń pↄ́ pↄ́ wá nàaapiↄ.

¹⁴Mↄ wà wá baa daaa, wápii, wá mↄkpɛ iↄ doũ.

¹⁵Ma nɛ́, ńsu gɛ́ńnↄo, ńsu zɛ́sɛńnↄo.

¹⁶Asa an kɛ̀sɛ lɛɛũ ń vãikɛaoɛ, aa wãa ń gbɛ̃dɛao.

¹⁷Bakpaa bãↄ wáaá pãɛ.

¹⁸Aalɛ baikpá ńzĩaɛɛ, an tòe mɛ́ a ń pui.

¹⁹Ɔvãi'enaↄ zian we ḿpii, an luaa pↄ́i mɛ́ ì ń wɛ̃ni bↄ.