Yáasiↄ 15:13-30 in Boko (Benin)

¹³Nↄ̀sɛna ì oa tɛkɛ, nↄ̀sɛ ↄ̃̀ↄkpaa ì ń kúsu kwɛ́.

¹⁴Làasoode ì dↄ̃a wɛɛlɛ, sↄũ ì yãfaasai mↄ́mↄ.

¹⁵Gↄↄpii ìↄ ĩ́i wɛ̃nadeɛɛ, pↄnade ìↄ ku dikpɛ guu láasai.

¹⁶Pↄvĩa yↄↄna vĩakɛa Diiɛ guu maa dɛ àizɛɛ zↄ̃ↄ kũa gili guua.

¹⁷Dò sau blea yeakↄ̃i guu maa dɛ nↄ̀ↄ níside soa ń zaakↄ̃uoa.

¹⁸Pↄkũmade ì sòle da, nↄ̀sɛniɛde ì zↄa midɛ.

¹⁹Màade zɛ́ ìↄ dɛɛ̀ lɛkaa ũɛ, gbɛ̃maa zɛ́ ìↄ daaĩaɛ.

²⁰Nɛ́ ↄ̃nↄde ì to a mae pↄ kɛ na, gbɛ̃nazĩn sↄũ ì saka a dau.

²¹Yãfaasai ì kɛ ↄ̃nↄkɛ̃sãmadeɛ na, làasoode ì zɛ́sɛ súsu.

²²Lɛkpaaĩsai ì yã́ gboo, lɛdamade dasiↄ ì to à kɛ.

²³Yãwea dↄ̃ ì a òna pↄ kɛ na, yã'oa a gↄↄwa ìↄ na fá!

²⁴Wɛ̃ni zɛ́ ì gɛ́ ń laaideↄ musu, kɛ́ aasu si bɛdauo yã́i.

²⁵Dii ì káakuna ua wí, ì to gyaa kↄↄↄ ku a gbɛu.

²⁶Dii za làasoo vãiu, yãna'oa gbãsĩ vĩɛ̀o.

²⁷Gbɛ̃wɛtãna ì ĩada a uawa, gbɛ̃́ pↄ́ za gbagusaɛu aↄ ku aafia.

²⁸Gbɛ̃maa ì làasookɛ yã́zãsiawa, yãvãi ì bↄlɛ gbɛ̃vãiↄ lɛ́u gↄ̃̀ↄ.

²⁹Dii zã̀ ń gbɛ̃vãiↄ, ì swã́kpa gbɛ̃maaↄ wabikɛai.

³⁰Oa weea ì ń pↄ kɛ na, baona ì ń wá wee.