Yáasiↄ 12:9-28 in Boko (Benin)

⁹Gbɛ̃́ kpɛɛ pↄ́ ì a zĩkɛ maannↄ dɛ zĩadilɛngbia pↄ́ blɛ ì kɛ̃́sãwàla.

¹⁰Gbɛ̃maa a pↄtuoↄ gwaa dↄ̃, ãma gbɛ̃vãiↄ sósobi pãsĩ.

¹¹Zↄ̃ɛ ãiade ìↄ kãa, gugiiyana sↄ̃, ↄ̃nↄ ì kɛ̃́sãwaɛ.

¹²Gbɛ̃vãi ì ↄvãi nidɛ, kási gbɛ̃maa zĩ́na mɛ́ ìↄ mↄ̀sɛ vĩ.

¹³Gbɛ̃vãi lɛ́ vãi ì aà kṹ, gbɛ̃maa sↄ̃ ì bↄ yãkeleu.

¹⁴Lɛ́ maa ì ń ká pↄmaawa, zĩ pↄ́ gbɛ̃́ kɛ̀ ài a suwà.

¹⁵Sↄũ yãkɛa ì kɛɛ̀ maa, ↄ̃nↄna sↄ̃ ì lɛdama ma.

¹⁶Sↄũ ì to wà a pↄfɛ̃ dↄ̃wa gↄ̃̀ↄ, laaide sↄ̃ ìli sↄ̃́sↄ̃a dao.

¹⁷Sĩan'ona ì yã́zɛde o, seelade vãi yã́ ìↄ mↄafili vĩ.

¹⁸Yãbↄlɛna yã́ ì gbɛ̃́ sↄ̃ zↄ̃ lán fɛ̃nawa, ↄ̃nↄna lɛgbɛ'i ì mↄ́ ń aafiao.

¹⁹Sĩana pↄ́ wa ò ìↄ zɛdↄa, ɛgɛ sↄ̃ ì gɛ̃zɛa lán wɛdɛawa.

²⁰Mↄafili kú vãi wàaipanaↄ sↄ̃u, gbɛ̃'aafiawɛɛlɛnaↄ mɛ́ pↄna vĩ.

²¹Vãie lí gbɛ̃maa leo, gbɛ̃vãiↄ sↄ̃, taasi ì dańla.

²²Dii ye ɛɛde gĩyãio, aà pↄ ìↄ na sĩandewa.

²³Laaide ìↄ a dↄ̃a kũa a sↄ̃u, sↄũ ì yãfaasai kpàwakɛ.

²⁴Zĩkɛa ↄplapla ì to gbɛ̃́ kible, màa ì gbɛ̃́ da zↄbleu.

²⁵Kua bíli guu ì gbɛ̃́ kúsu kwɛ́, yãna'oanɛ ì ń pↄ kɛ na.

²⁶Gbɛ̃maa ì a gbɛ̃na dazɛwa, gbɛ̃vãiↄ yãkɛa ì ń sã́sã.

²⁷Màade lí nↄ̀ↄ sãsã maamaao, ãiade ì laaidↄ a pↄ́ↄwa.

²⁸Kua yã́zɛde zɛ́u wɛ̃ni vĩ, zɛ́pi sɛa lí ń kpá gaio.