Xoão 4:40-51

⁴⁰Ininiã ninoa Samaria auakani apoka Xesosimoni. —Atekata paua —itxarina Xesosi. Ininiã Xesosi kaikota ipi õti ninoakata.

⁴¹Xesosi sãkire ikenakotakasaakina, apikomoni ninoa auikapiretari.

⁴²Ninoa misãkiretaro oa sito: —Uatxa ate auikapiretari Xesosi sãkire, kona pite sãpirenaãnanini, ate auikapiretari. Ateka kenakotapekari iua sãkire, ininiãkara ate auikapiretari iua sãkire. Uatxa ate imarotari atão inini Teoso mereẽkiti ininiua Xesosi. Kãkiti itixi auakani maerekani makatxaãkari itxaua iua —itxarona.

⁴³Iuaã ipi õti inapaka atoko Xesosi sipeka. Kariréia tõpa isa.

⁴⁴Mitxi Xesosi sãkire: “Teoso sãkire sãpiretakari paxitaãka, txamari Teoso sãkire sãpiretakari itixineẽ auakasaaki, kãkiti iuaãtaã kona auikari iua sãkire,” itxapeka Xesosi.

⁴⁵Iuaritika Kariréia tõpa apokasaaki, kãkiti iuaã auakani ipoxokoniritika apakapari Xesosi, kotxi ninoa apaka sari iua Páskoa kiiniriti Xerosareẽ sitatxitiã. Iuaãtaã itikarina Xesosi posotiire. Ininiãkara ipoxokoniritikana apakaparina Xesosi.

⁴⁶Xesosi iuaĩkana sari Kanaa sitatxitimoni, Kariréia tõpa. Mitxi Xesosi inoãkapekari ãparaã iãriã ininiua iuaã. Xesosi apokasaaki Kanaa, auĩtetxi ãkiri amianata Kapanaoõ sitatxitikiri.

⁴⁷Iua auĩtetxi kenakopiretari Xesosi Kariréia tõpa apokini, Xotéia tõpa osipikini. Inakasaaki Xesosimoni isa, aõkita itxari Xesosi. Aiatari: —Masa Kapanaoõmoni, naapokomoni. Namarite amianata. Pimakananitari iua. Ipinanapanoka —itxari Xesosi.

⁴⁸Ininiã Xesosi: —Nimakamakaniãri posotiiretxi, kona hĩte nirekari auikiniri nisãkire. Posotiiretxi hĩtikasaakinani, hĩte nirekari nisãkire hãuikini. Teoso takaõtxikare hĩtikasaakinani, hinirekari nisãkire hãuikini —itxa Xesosi iuamoni.

⁴⁹—Masapoka naapoko. Pimasikanisaaki, namarite ipinapitikako —itxari.

⁵⁰—Pisa paapokomoni. Pamarite kona ipina —Xesosi txari iua. Iua kiki auikari Xesosi sãkire, ininiã isipeka.

⁵¹Ipixinipokoriti aõkitana initiriakori. —Pamarite auapitikako —itxarina.