Wotet 15:19-25

¹⁹“Mapuna akaleiwag, awoum youd moumouvit bitasekes vena babaw gimgilis, tasiyas mwana nitouvins inekes Yowbad.

²⁰“Deisa takaleiwags wasigeis tasiyas va̱gan bipiyaves kan nimgwavis silma̱nin tobwag yowbad; awoum bisubwans; awoum beikams viniyonan man bo niskwen kayon neimat nanawan, o viniyonan man sona buya̱vin. Misinak.

²¹“Peinan nagwa̱diven ivnivins Moses nakaleiwag Sa̱dad katanok katanok, vena babaw wasigeis. E, vena babaw sisinagog wasigeis tageiguys ivinis Moses nakaleiwag, igeiguys.”

²²Takaweins liva̱nen Yeisuw, sisiyas tayakelesiys situwa̱vek, sisiyas tayakelesiysa babaw, idokes bikayabes sigamag mwasanin, sisiy Pawl o Ba̱nabas bikawes silet binawes Antiyok. E, ikayabes tayakelesiys guyawaw asteiy, teitan Yudas, yagan kwayuwein Ba̱sabas, tayuwein yagan Saylas.

²³Let towen nikawes nakalelel mamagina: “Kalin nuwem budimayas yakamiy, Antiyok gimgilis, o Siliy gimgilis, o Silisiy gimgilis, tobwag ven gimgilis tayakelesiys yakamiy. Yakamey takaweins liva̱nen daGuyaws Yeisuw, simayas tayakelesiys situwa̱vek ven Yelusalem waseg.

²⁴“O peinan nakaligen simayas mwasanin bo iva̱ges moumouvit wasigeis yakamiy, o ibol ninoumiy yakamiy asilivan waseg. O yakamey nag kakayabes tasiyas, nag; ninousa tasiyas niweis.

²⁵“Mapuna ninom yakamey bo katanok-wan va̱gan bakakayeb tawaw mwasanin biwekeimiy, sisiyas Ba̱nabas son Pawl. O yakamiy o yakamey, babaw ya̱kids ikalin nuwads tawaw tasiyas Ba̱nabas son Pawl, peinan tuta babaw inounas abkanig waseg, daGuyaws Yeisuw Kelis silma̱nin.