1Geka ginoulihi u mulihi tu winoyanoya magouhi wohepali a gagalehi hipuli tupo wohepali uyahihi hi towotowolo. Tu winoyanoyahi togowa matana wohepali hai ani togo mai hi luguduhi yaka dumola baneina i geleta hoi hipuli po hoi boga po mayau luguluguhi ega hita idagudagu.
2Yaubada i baha ipa tu winoyanoyahi hipuli ma boga hina wiapapoenihi. Apoma tu winoyanoya gehouna a gagaleya kabudala anani geleta uyahinei i nenei naka u nimana Yaubada lauyagohanana a wekiwekilala ani’mgiluma lawa u tepahi ina gilumihi. Tu winoyanoyana i otu a lawa wohepali uyahihi
3i pa, ‘Hei, ega hipuli po boga po mayau ona iapapoenihi, ma ata Yaubada a tu bagibagi hai wekiwekilala u tepahi ta houna tahaehi.’
4Ega yaka wekiwekilala mi Isalaela gehouhi u tepahi hi hounihi ma u mulina a noonoli mi Isalaela hai maga tausana 144 naka Isalaela googana uyahihiyei.
5Yuda gugunina uyahinei lawa magouhi tausana 12 hai wekiwekilala u tepahi hi hounihi. Naka pitenana Isalaela googana atapuhi uyahihiyei hai wekiwekilala hi hounihi. Lubena a guguni uyahinei tausana 12 ma Gada a guguni uyahinei tausana 12
6ma Asa a guguni uyahinei tausana 12 ma Napatali a guguni uyahinei tausana 12 ma Manase a guguni uyahinei tausana 12
7ma Simiyona a guguni uyahinei tausana 12 ma Libai a guguni uyahinei tausana 12 ma Isako a guguni uyahinei tausana 12
8ma Sebuloni a guguni uyahinei tausana 12 ma Yosepa a guguni uyahinei tausana 12 ma Beniyamina a guguni uyahinei tausana 12.
9Geka u mulina a itotolana po patala banei dumana a gagaleya ega emoemotana a hiyawa pahi. Geka lawahi naka tupo hayana wohepali hai ani taniwaga emosi po emosi uyahihiyei, guguni emosi po emosi uyahihiyei, po tupo emosi po emosi uyahihiyei po pona emosi po emosi uyahihiyei, atapuhihi hi wootalagae ani mae wasawasana uyahina. Yaubada ma Sipi Natuna u matahi hi towotowolo hai kaleko wakewakekehi ma beda luguluguhi hi wogowogohi.
10Ponahi hi lata ma hi wootalagae hi pa, ‘Yaubada, tam ani mae wasawasa uyahina e duhuduhuna tam ma Sipi Natuna to wootalagiyemi babana luyagohana uyahimiyei he nenei.’
11Ma tu winoyanoya atapuhi, tanitaniwaga, mimituwa wohepali, Yaubada mitehi hi towolo wiiwilehi ma hi polou po Yaubada u matana hi wootalagae,
12hi pa, ‘Moina, tam wotalagae po wasawasa po hanapu po wimaamala po wiyateyate po manini po kadidili atapuhi geka Yaubada tam galimgei houga tuwetuwenai. Moina.’
13Ega yaka tanitaniwagahi uyahihiyei emosi i lubayadeu i pa, ‘Iyawoi geka hai kaleko wakewakekehi? Ma miyei hi nei?’
14Ega yaka tau uyahina a pa, ‘Bada tam u hanapugehi. Tau eega.’ Yaka i paliweleu i pa, ‘Geka lawahi hipuli a wiyuwa baneina hi wialoni ma hai kaleko Sipi Natuna talanei hi ogahi po hi wakeke meme.
15Naka binei Ma Yaubada anani mae wasawasa u matana he memae iyeta po ididibala ma wotalagae bagibagina he dewadewaya a numa dalabu u hinena. Ma Yaubada anani mae wasawasa uyahina e duhuduhuna tauna apo ina galena itetehi.
16Lolowa om hi hilage, geka hougana apega om hina hilage, lolowa uyopopohi hi haleyanihi ma geka hougana apega uyopopohi hina haleeyana mehi, lolowa kabudala a wipoya i lalanihi ma geka houga apega kabudala mayana hina waya.
17Matababana Sipi Natuna ani mae wasawasana u tipolina e memae, tauna hai tu galena itete yaka apo ina tahaehi goila huuhulana uyahina yautuhi binei, ma Yaubada apo mata diligwegwehi ina hamaga halehi.’
