Uraata Kizin Ŋgoŋana 2:6-24

⁶Timbotmbot mi tileŋ la pa, to timokor la pataaŋa. Mi zin wal ta Bubuŋana Potomŋana izeebe zin na, sua kizin ikam ma iwal biibi tau ŋgar kizin imap. Pa tileŋleŋ kat la pa zitun kalŋan tau.

⁷Tabe kwon itaanda mi tikamam ŋgar boozo. Tiso: “Wai, a niom, wal tiŋgi tikam parei kembei? Zin iŋgi sa Galilea kan men.

⁸Mi parei ta iti tomtom tataŋa teleŋleŋ zin tizzo sua lala itundu kalŋanda kat kembei?

⁹Iti tamar pa lele pakaana ki Partia, Midia, mi Elam, mi Mesopotamia, Yudea mi Kapadosia, mi Pontus ma Asia,

¹⁰mi Pirigia ma Pampilia, mi Aikuptu, mi lele pakaana ki Libia ta kolouŋana pa Kairini na, mi Krit mi Arabia. Mi tomtom kiti pakan timar pa Rom tomini. Mi zin Rom kan na, pakan zin Yuda ŋonoono. Mi pakan na, zin wal ta titooro zin ma tiwe Yuda i. Tamen sua ta wal taiŋgi tikamam pa Anutu uraata kini bibip, ta iti tamap teleŋleŋ la itundu kalŋanda.”

¹²Tana zin iwal tana kwon taanda lup. Pa tikankaana pa mbulu tiŋgi. Mi tiparwwi zin ma tiso: “Wai, iŋgi parei?”

¹³Mi pakan na, tikam seŋge pizin ma tiso: “Ou, niom iwal, iŋgi sa tiwin na.”

¹⁴Petrus ziŋan zin ŋgoŋana laamuru mi ta timbotmbot, mi imaŋga na iso ma kalŋaana biibi. Iso: “Niom Yuda mi niom wal boozomen ta kombotmbot Yerusalem i, kuŋgun talŋoyom pio, mi nio ko aŋso yom pa mbulu tiŋgi ka uunu.

¹⁵Niom koso zin wal tiŋgi tiwin. Mi iŋgi zoŋ ise zen. Lak, winŋana sa, tiwinin pa mazwaana ta kembei? Som.

¹⁶Keleŋ. Mbulu ti ka sua, ta Anutu kwoono Yoel iso ta muŋgu kek. Mi iŋgi buri iur ŋonoono i. Sua ta kembei:

¹⁷Anutu iso: Indeeŋe mazwaana kaimer kana ma uraata tio iso ipet kat mat, na nio kola aŋkam Bubuŋoŋ ma isalakaala tomtom ta munŋaana men. To lutuyom bizin ma lutuyom moori bizin ko tiwe nio kwoŋ mi tiso kalŋoŋ pizin tomtom. Mi zin naŋgaŋ kaibiim ko tikeenetondo. Mi Anutu ko iswe koroŋ pakan pizin kolman ila miuŋana.

¹⁸Mi zin mbesooŋo mi mbesooŋo moori tio ta kembena. Indeeŋe mazwaana tana na, nio ko aŋkam Bubuŋoŋ ma isalakaala zin.

¹⁹Mi nio ko aŋkam uraata bibip ma ipet sala maŋaanaŋana, mi aŋkam mos mburanŋan isu toono tomini. Ko kembei ta siŋ, you, mi you kakoi ta buk ma ise i.

²⁰Pa zoŋ kola iyaara mini som, mi lele zugut. Mi puulu mataana ko isiŋsiŋ. Uraata tana kola ipet muŋgu, mana nol biibi ki Merere be iswe mburaana ma ipet kat mat.

²¹Mi wal boozomen ta so titaŋroro Merere be iuulu zin, na ni ko ikamke zin ma timbot ambai.

²²“Tana niom tomtom ki Israel, keleŋ sua tiŋgi. Uraata mburanŋan mi mos bibip ta Yesu ki Nasaret ikam la mazwoyom na, niom kuute lup kek. Uraata ta Anutu ipomboli ma ikam, ina iswe i kembei: Ni Anutu iŋgo i.

²³Anutu, ni itunu ŋgar kini mi iur Yesu pataaŋa kek be ima nomoyom. Tanata niomŋan zin Rom kan tau titoto tutu som na, kupuni ma imeete sala ke pambaaraŋana.

²⁴Tamen meeteŋana irao ikisi na som. Pa Anutu itatke i pa meeteŋana mburaana, mi iwiti ma burup ma imaŋga pa naala.