Titus 3

1

2

3

¹KATAMAN kin irail ren peiki ong monsap o me manaman akan, o ren apwali wiawia mau karos.

²Der lalaue amen, der akamai, a en kamantik, o opampap ong aramas akan karos.

³Pwe kitail pil pweipwei mas o, o sopeik, o salongala, o papa song en inong o madong sued akan, kokoa me sued, o peirin, pakailok, o kailongki amen amen.

⁴A kalangan o limpok en Kot atail Saundor lao pwarado,

⁵A kotin dore kitail la kaidin pweki pein atail wiawia pung, a pein a kupur ki paptais en kaipwi kap o kawilia kap ren Ngen saraui.

⁶Me a kotin kupura dong kitail kaualap ren Iesus Kristus atail Saundor.

⁷Pwe kitail en pung kila a mak, pwen sosoki maur soutuk duen at kaporopor.

⁸Melel padak pot et o i men, koe en nantiong kaweweda, pwe irail, me posonla Kot, en kadoke kin ir wiawia mau, mepukat me mau o kon ong aramas akan.

⁹A liki sang peidok mal akan, o padok en tiak kan, o akamai, o akamai ki kapung, pwe mepukat sota kadepa o me mal.

¹⁰Aramas likin panau amen, panaui pan mepak de riapak ap muei sang i.

¹¹Pwe koe asa, me i me sapung o kin wia dip, a kadeikada pein i.

¹²I lao kadar wong uk Artemas de Tikikus, koe madang dong ia, Nikopolis, pwe i kileledier me i pan kauson wasa o ni ansaun kapau.

¹³Saunkawewe Senas o Apolos kadara dong ia madang. Sauasa ira, pwe ira de anane meakot.

¹⁴O naitail akan en porisok o koiokki ong wiawia mau, pwe ren der so wa ’rail.

¹⁵Karos, me mi re i, kin ranamau wong uk. Ranamau wong karos, me kin pok ong kit ni poson. Mak o en mi re omail karos!