1Go dâŋ heɋâre‐jarehuc jazatec ŋic jaŋe kia gawaman â fekicne araŋ bajarehuc dâŋjeŋic reŋkenʒepieŋ, erâ gie biaŋne fuŋne fuŋne fokac irec afeckerâ banʒepieŋ.
2Erâ mumusoriŋ â dâŋ mumuc mi enʒepieŋ. Aricne, wamane juhuc ŋic maŋuruc ejare‐fârenʒepieŋ.
3Nâŋâc mârâc jaha iŋuc jaha maŋmutuc erâ râŋgeŋne juhuc qac qâsoric ejumbeneŋ. Erâ sasec fuŋne fuŋne irec kiŋaŋ qahuc sindaŋ â iiŋguuŋ bâfuarâ mamakâcne erâ kikisuec ejumbeneŋ.
4Izi ʒâhec ine bâbâpiaŋ‐nâŋec Anutu uruc jauŋ â buafec‐ticne fua tâcneme
5eki nâŋâc tiŋne juhuc gie moc bambeŋte mâcne, buuruc‐ticnere erâ juju ɋârire opâzi â Tiri Mâroraonec fufua ɋâricnezi bâpiaŋ‐nâpowec.
6E bâbâpiaŋ‐nâŋec Jesu Kristore erâ Tiri Mâro afecne mi qoŋgiŋke‐nârewec.
7I nâŋâc Kristore aki anonocte erâ kiŋnâŋec fâsâeme juju sanaŋte mamanac juku rauckenaŋte iŋuc enârewec.
8Dâŋ i jâmbomac, eme go ɋicwânʒâŋ erâ âkendâŋnetec Anutu manasiŋkeeŋgopieŋzi eehâmo gie baniŋte ʒoɋac enʒepieŋ. I wiac biaŋne, i epie ŋic jauŋ bacjopaocmu.
9Â mugufuc dâŋ jawane â fuŋne qaqa dâŋbiri â sâcmutâc dâŋte mu qaqatarac â bac bârisic ine geŋkezemec. I wiac racne â fârimâc.
10Ŋic hâme âkefâucne moc uŋdâŋ mocjaha me jajahec âzâcnetecne qikiŋneme behetec buc juzejec.
11Go manakic, ŋic iŋucne e qaqaharicne, maŋnezi mumu hehec ecne‐bipieha sâqocne baekac.
12No Atema me Tikiko sorepe gorao fâ fisime biac Nikopoli haeo ware bâfuacnuzemec, no hae ira hâcne hoemaŋko juzo mukopac.
13Sâcmutâc mamana ŋic Ʒena â Apolo jahe miti kiŋaŋ ranicte nânâ mafa wiac bâmocke‐jactetec wiac mi basahuc bititiezepirec.
14Ŋicfâc‐nâŋec jaŋe wâc eehâmo gie baku maŋjeŋic ezejec, eme sahacte dope babasa fuaocmu sâc jauŋ gie bapie miti‐jeŋiczi fârinehec ezejec.
15Ŋic nohec jueŋgopieŋ jaŋe sasawa go manasu‐gareŋgopieŋ. Mitio âgo enâreeŋgopieŋ jaŋe manasu‐jareŋgopeneŋ irec wâc jazazemec. Aki anonoczi sâcŋopa‐fârezejec.
