Tingtoeng 119:66-126

⁶⁶Na olpaek te ka tangnah dongah, omih thennah neh mingnah te kai n'tukkil lah.

⁶⁷Ka poeih uh hlanah ka taengphael cakhaw na olthui ni ka ngaithuen coeng.

⁶⁸Na then tih na voelphoeng dongah na oltlueh te kai n'tukkil lah.

⁶⁹A honghi kah thinlen loh kai n'coe thil cakhaw ka lungbuei boeih neh na olrhi ka kueinah coeng.

⁷⁰Amih lungbuei te maehtha bangla moelh cakhaw kai tah na olkhueng nen ni ka naepnoi.

⁷¹Kai ham tah m'phaep te khaw hoeikhang mai. Te nen ni na oltlueh te n'tukkil eh.

⁷²Na ka dongkah olkhueng te kai ham tah sui neh ngun thawngkhat lakah then.

⁷³י Yod Na olpaek ka awt ham ni na kut loh kai n'saii tih, kai m'picai tih kai nan yakming sak.

⁷⁴Na ol te ka ngaiuep dongah nang aka rhih rhoek loh kai m'hmuh uh vaengah a kohoe uh.

⁷⁵BOEIPA nang kah laitloeknah tah duengnah la om tih uepomnah neh kai nan phaep te ka ming.

⁷⁶Na sal taengkah na olthui bangla na sitlohnah tah kai aka hloep la om laeh saeh.

⁷⁷Na haidamnah te kai taengla ha pawk saeh lamtah na olkhueng te ka hlahmaenah la ka hing puei eh.

⁷⁸Thinlen rhoek loh a honghi neh kai n'khun sak uh te yak uh saeh. Kai tah na olrhi dongah ni ka lolmang eh.

⁷⁹Nang aka rhih tih na olphong aka ming la aka ming rhoek tah kai taengla ha mael uh saeh.

⁸⁰Kai lungbuei he na oltlueh dongah cuemthuek la a om daengah ni ka yah pawt eh.

⁸¹כ Kaf Namah kah loeihnah dongah ka hinglu a khum vaengah na ol dongah ka ngaiuep.

⁸²Na olthui te ka mik la kha coeng tih, “Me vaengah nim kai nan hloep eh?” ka ti.

⁸³Hmaikhu dongkah tuitang bangla ka om dae na oltlueh te ka hnilh moenih.

⁸⁴Na sal kah khohnin tah mebang nim? Kai aka hloem rhoek soah me vaengah nim laitloeknah na saii ve?

⁸⁵Thinlen rhoek loh kai hamla rhom a vueh uh te na olkhueng moenih.

⁸⁶Na olpaek boeih he uepomnah ni, a poeyoek la kai n'hloem he kai m'bom lah.

⁸⁷Pacilpahnai la diklai lamloh kai n'khah uh. Tedae na olrhi te ka hnoo moenih.

⁸⁸Na sitlohnah dongah kai hing lamtah na ka dongkah olphong te ka ngaithuen bitni.

⁸⁹ל Lamed BOEIPA namah kah ol tah vaan ah kumhal duela pai.

⁹⁰Na uepomnah tah diklai a soepboe lamloh thawnpuei neh cadilcahma duela cak.

⁹¹Na laitloeknah bangla na sal boeih ham khaw tahae khohnin due cak.

⁹²Na olkhueng te ka hlahmaenah pawt koinih kamah kah phacipphabaem dongah ni ka paltham eh.

⁹³Te rhoek rhangneh kai nan hing sak dongah na olrhi te kumhal duela ka hnilh mahpawh.

⁹⁴Kai he namah ham ni. Na olrhi te ka toem dongah kai he n'khang lah.

⁹⁵Kai phae ham halang rhoek loh kai n'lamtawn uh cakhaw na olphong ni ka yakming eh.

⁹⁶Boeih a soepnah he a bawtnah om dae na olpaek tah dangka tangkik tila ka hmuh.

⁹⁷מ Mem Na olkhueng te hnin takuem ka thuepnah ham bahoeng ka lungnah.

⁹⁸Na olpaek te kai taengah kumhal duela om tih ka thunkha rhoek lakah kai n'cueih sak.

⁹⁹Na laipainah te ka thuepnah coeng dongah kai aka tukkil boeih lakah n'cangbam.

¹⁰⁰Na olrhi te ka kueinah dongah patong rhoek lakah khaw ka yakming.

¹⁰¹Boethae caehlong boeih lamloh ka kho ka tuem daengah ni na ol te ka ngaithuen thai eh.

¹⁰²Namah loh kai nan thuinuet coeng dongah na laitloeknah lamloh ka phaelh moenih.

¹⁰³Na olthui he ka dang dong neh ka ka dongah khoitui lakah khaw bahoeng didip.

¹⁰⁴Na olrhi lamloh ka yakming tangloeng dongah laithae kah caehlong tah boeih ka thiinah.

¹⁰⁵נ Nun Na ol tah ka kho ham hmaithoi neh ka hawn ham vangnah la om.

¹⁰⁶Na duengnah dongkah laitloeknah te ngaithuen hamla ka toemngam tih ka cak sak coeng.

¹⁰⁷Mat ka phaep uh vaengah he BOEIPA aw na ol bangla kai n'hing sak.

¹⁰⁸BOEIPA aw ka ka dongkah kothoh he doe mai lamtah na laitloeknah te kai n'tukkil lah.

¹⁰⁹Ka hinglu he ka kut khuiah om taitu dae na olkhueng te ka hnilh mahpawh.

¹¹⁰Halang rhoek loh kai hamla pael phoh cakhaw na olrhi lamloh kho ka hmang moenih.

¹¹¹Kumhal due ka lungbuei omngaihnah ham na olphong te ka pang coeng.

¹¹²Na oltloek te kumhal a bawt bawt duela vai ham ni ka lungbuei ka maelh.

¹¹³ס Samek Cikcoknah te ka hmuhuet tih, na olkhueng te ka lungnah.

¹¹⁴Ka hlipyingnah neh ka photling tah namah tih, na ol dongah ka ngaiuep.

¹¹⁵Thaehuet rhoek te kai lamloh nong lamtah ka Pathen kah olpaek te ka kueinah eh.

¹¹⁶Na olthui bangla kai nan talong daengah ni ka hing vetih ka ngaiuepnah lamloh kai nan yah sak pawt eh.

¹¹⁷Kai nan duel daengah ni ka daem vetih na oltloeh te ka mang thil taitu eh.

¹¹⁸Amih kah a huep he a honghi la a om dongah na oltlueh lamloh aka palang rhoek boeih te suntlae.

¹¹⁹Diklai halang boeih te aek la na kangkuen sak tangloeng dongah ni na olphong te ka lungnah.

¹²⁰Na taengah birhihnah neh ka saa khaw poeng hu tih na laitloeknah te ka rhih.

¹²¹ע Ayin Tiktamnah neh duengnah ka saii dongah kai aka hnaemtaek rhoek taengla kai nan voei pawh.

¹²²Na sal kah a then te rhikhang lamtah thinlen loh kai hnaemtaek boel saeh.

¹²³Namah kah khangnah dong neh na duengnah olthui dongah ka mik kha coeng.

¹²⁴Na sitlohnah bangla na sal taengah saii lamtah na oltlueh te kai n'tukkil lah.

¹²⁵Na sal kai he kamah nan yakming sak daengah ni na olphong te ka ming eh.

¹²⁶BOEIPA aw, na olkhueng a phae uh dongah saii ham khaw a tue a pha coeng.