Tingtoeng 119:61-105

⁶¹Halang kah rhuihet loh kai n'hih cakhaw na olkhueng te ka hnilh mahpawh.

⁶²Na duengnah neh tiktamnah dongah nang uem ham khoyin pathung ah ka thoo.

⁶³Kai tah nang aka rhih tih na olrhi aka ngaithuen rhoek boeih kah a hui la ka om.

⁶⁴BOEIPA nang kah sitlohnah neh diklai khaw hah coeng tih na oltlueh neh kai n'tukkil lah.

⁶⁵Na ol bangla BOEIPA na sal taengah a then na saii coeng.

⁶⁶Na olpaek te ka tangnah dongah, omih thennah neh mingnah te kai n'tukkil lah.

⁶⁷Ka poeih uh hlanah ka taengphael cakhaw na olthui ni ka ngaithuen coeng.

⁶⁸Na then tih na voelphoeng dongah na oltlueh te kai n'tukkil lah.

⁶⁹A honghi kah thinlen loh kai n'coe thil cakhaw ka lungbuei boeih neh na olrhi ka kueinah coeng.

⁷⁰Amih lungbuei te maehtha bangla moelh cakhaw kai tah na olkhueng nen ni ka naepnoi.

⁷¹Kai ham tah m'phaep te khaw hoeikhang mai. Te nen ni na oltlueh te n'tukkil eh.

⁷²Na ka dongkah olkhueng te kai ham tah sui neh ngun thawngkhat lakah then.

⁷³Na olpaek ka awt ham ni na kut loh kai n'saii tih, kai m'picai tih kai nan yakming sak.

⁷⁴Na ol te ka ngaiuep dongah nang aka rhih rhoek loh kai m'hmuh uh vaengah a kohoe uh.

⁷⁵BOEIPA nang kah laitloeknah tah duengnah la om tih uepomnah neh kai nan phaep te ka ming.

⁷⁶Na sal taengkah na olthui bangla na sitlohnah tah kai aka hloep la om laeh saeh.

⁷⁷Na haidamnah te kai taengla ha pawk saeh lamtah na olkhueng te ka hlahmaenah la ka hing puei eh.

⁷⁸Thinlen rhoek loh a honghi neh kai n'khun sak uh te yak uh saeh. Kai tah na olrhi dongah ni ka lolmang eh.

⁷⁹Nang aka rhih tih na olphong aka ming la aka ming rhoek tah kai taengla ha mael uh saeh.

⁸⁰Kai lungbuei he na oltlueh dongah cuemthuek la a om daengah ni ka yah pawt eh.

⁸¹Namah kah loeihnah dongah ka hinglu a khum vaengah na ol dongah ka ngaiuep.

⁸²Na olthui te ka mik la kha coeng tih, “Me vaengah nim kai nan hloep eh?” ka ti.

⁸³Hmaikhu dongkah tuitang bangla ka om dae na oltlueh te ka hnilh moenih.

⁸⁴Na sal kah khohnin tah mebang nim? Kai aka hloem rhoek soah me vaengah nim laitloeknah na saii ve?

⁸⁵Thinlen rhoek loh kai hamla rhom a vueh uh te na olkhueng moenih.

⁸⁶Na olpaek boeih he uepomnah ni, a poeyoek la kai n'hloem he kai m'bom lah.

⁸⁷Pacilpahnai la diklai lamloh kai n'khah uh. Tedae na olrhi te ka hnoo moenih.

⁸⁸Na sitlohnah dongah kai hing lamtah na ka dongkah olphong te ka ngaithuen bitni.

⁸⁹BOEIPA namah kah ol tah vaan ah kumhal duela pai.

⁹⁰Na uepomnah tah diklai a soepboe lamloh thawnpuei neh cadilcahma duela cak.

⁹¹Na laitloeknah bangla na sal boeih ham khaw tahae khohnin due cak.

⁹²Na olkhueng te ka hlahmaenah pawt koinih kamah kah phacipphabaem dongah ni ka paltham eh.

⁹³Te rhoek rhangneh kai nan hing sak dongah na olrhi te kumhal duela ka hnilh mahpawh.

⁹⁴Kai he namah ham ni. Na olrhi te ka toem dongah kai he n'khang lah.

⁹⁵Kai phae ham halang rhoek loh kai n'lamtawn uh cakhaw na olphong ni ka yakming eh.

⁹⁶Boeih a soepnah he a bawtnah om dae na olpaek tah dangka tangkik tila ka hmuh.

⁹⁷Na olkhueng te hnin takuem ka thuepnah ham bahoeng ka lungnah.

⁹⁸Na olpaek te kai taengah kumhal duela om tih ka thunkha rhoek lakah kai n'cueih sak.

⁹⁹Na laipainah te ka thuepnah coeng dongah kai aka tukkil boeih lakah n'cangbam.

¹⁰⁰Na olrhi te ka kueinah dongah patong rhoek lakah khaw ka yakming.

¹⁰¹Boethae caehlong boeih lamloh ka kho ka tuem daengah ni na ol te ka ngaithuen thai eh.

¹⁰²Namah loh kai nan thuinuet coeng dongah na laitloeknah lamloh ka phaelh moenih.

¹⁰³Na olthui he ka dang dong neh ka ka dongah khoitui lakah khaw bahoeng didip.

¹⁰⁴Na olrhi lamloh ka yakming tangloeng dongah laithae kah caehlong tah boeih ka thiinah.

¹⁰⁵Na ol tah ka kho ham hmaithoi neh ka hawn ham vangnah la om.