Tingtoeng 119:109-171

¹⁰⁹Ka hinglu he ka kut khuiah om taitu dae na olkhueng te ka hnilh mahpawh.

¹¹⁰Halang rhoek loh kai hamla pael phoh cakhaw na olrhi lamloh kho ka hmang moenih.

¹¹¹Kumhal due ka lungbuei omngaihnah ham na olphong te ka pang coeng.

¹¹²Na oltloek te kumhal a bawt bawt duela vai ham ni ka lungbuei ka maelh.

¹¹³ס Samek Cikcoknah te ka hmuhuet tih, na olkhueng te ka lungnah.

¹¹⁴Ka hlipyingnah neh ka photling tah namah tih, na ol dongah ka ngaiuep.

¹¹⁵Thaehuet rhoek te kai lamloh nong lamtah ka Pathen kah olpaek te ka kueinah eh.

¹¹⁶Na olthui bangla kai nan talong daengah ni ka hing vetih ka ngaiuepnah lamloh kai nan yah sak pawt eh.

¹¹⁷Kai nan duel daengah ni ka daem vetih na oltloeh te ka mang thil taitu eh.

¹¹⁸Amih kah a huep he a honghi la a om dongah na oltlueh lamloh aka palang rhoek boeih te suntlae.

¹¹⁹Diklai halang boeih te aek la na kangkuen sak tangloeng dongah ni na olphong te ka lungnah.

¹²⁰Na taengah birhihnah neh ka saa khaw poeng hu tih na laitloeknah te ka rhih.

¹²¹ע Ayin Tiktamnah neh duengnah ka saii dongah kai aka hnaemtaek rhoek taengla kai nan voei pawh.

¹²²Na sal kah a then te rhikhang lamtah thinlen loh kai hnaemtaek boel saeh.

¹²³Namah kah khangnah dong neh na duengnah olthui dongah ka mik kha coeng.

¹²⁴Na sitlohnah bangla na sal taengah saii lamtah na oltlueh te kai n'tukkil lah.

¹²⁵Na sal kai he kamah nan yakming sak daengah ni na olphong te ka ming eh.

¹²⁶BOEIPA aw, na olkhueng a phae uh dongah saii ham khaw a tue a pha coeng.

¹²⁷Te dongah na olpaek tah sui lakah khaw suicilh lakah khaw ka lungnah.

¹²⁸Olrhi boeih he boeih ka dueng sak tangloeng dongah laithae caehlong tah boeih ka thiinah.

¹²⁹פ Pe Na olphong rhoek he khobaerhambae tangloeng dongah ni ka hinglu khaw a kueinah.

¹³⁰Na ol kah khohue loh a sae vaengah hlangyoe rhoek pataeng a yakming sak.

¹³¹Ka ka te ka ang tih na olpaek te mam ham ka rhingda.

¹³²Na ming aka lungnah rhoek taengkah laitloeknah vanbangla kai taengla ha hooi lamtah kai n'rhen lah.

¹³³Na olthui bangla ka khokan he cikngae sak lamtah boethae boeih loh kai soah taemrhai boel saeh.

¹³⁴Hlang kah hnaemtaeknah lamloh kai n'lat lamtah na olrhi te ka ngaithuen eh.

¹³⁵Na maelhmai te na sal taengah sae sak lamtah na oltlueh te kai n'cang puei lah.

¹³⁶Na olkhueng te a ngaithuen uh pawt dongah ka mik dongkah sokca tui loh long.

¹³⁷צ Tsade BOEIPA nang na dueng dongah na laitloeknah khaw thuem.

¹³⁸Na olphong kah duengnah neh uepomnah tangkik te khaw na uen.

¹³⁹Ka rhal rhoek loh na ol a hnilh uh dongah ka thatlainah loh kamah n'thah.

¹⁴⁰Na olthui he a cae payik coeng dongah na sal long khaw a lungnah.

¹⁴¹Kai canoi dongah n'hnaep cakhaw na olrhi te ka hnilh moenih.

¹⁴²Na duengnah tah kumhal ham duengnah la om tih na olkhueng khaw oltak la om.

¹⁴³Rhal neh a caeknah loh kai soah ha thoeng dae na olpaek tah kai kah hlahmaenah la om.

¹⁴⁴Na olphong kah duengnah te kumhal duela kai m'ming sak lamtah ka hing puei eh.

¹⁴⁵ק Qof Lungbuei boeih neh kang khue vaengah kai n'doo lamtah BOEIPA nang kah oltlueh te ka kueinah eh.

¹⁴⁶Nang kang khue vaengah kai n'khang lamtah na olphong te ka ngaithuen eh.

¹⁴⁷Hlaemhmah hlanah ka kun tih ka pang he na ol dongkah na ol te ni ka ngaiuep.

¹⁴⁸Na olthui dongah lolmang hamla hlaemhmah ah ka mik ca.

¹⁴⁹Na sitlohnah bangla ka ol hnatun lamtah BOEIPA aw na laitloeknah bangla kai n'hing sak.

¹⁵⁰Khonuen rhamtat aka hloem rhoek te capit uh cakhaw na olkhueng lamloh lakhla uh.

¹⁵¹BOEIPA namah na yoei dongah na olpaek boeih khaw oltak la om.

¹⁵²Na olphong lamloh kumhal duela na suen te hlamat ah ni ka ming coeng.

¹⁵³ר Resh Na olkhueng te ka hnilh pawt dongah kai kah phacipphabaem he hmu lamtah kai n'pumcum sak lah.

¹⁵⁴Kai kah tuituknah te rhoe laeh, na olthui bangla kai n'tlan lamtah kai n'hing sak lah.

¹⁵⁵Halang taeng lamloh khangnah a hla te khaw na oltlueh a toem uh pawt dongah ni.

¹⁵⁶Na haidamnah he a len dongah BOEIPA aw na laitloeknah bangla kai n'hing sak.

¹⁵⁷Kai aka hloem rhoek neh ka rhal khaw yet dae na olphong lamloh ka phaelh moenih.

¹⁵⁸Na olthui a ngaithuen uh pawt dongah hnukpoh te ka hmuh vaengah ka ko-oek.

¹⁵⁹Na olrhi ka lungnah te hmu lamtah BOEIPA aw na sitlohnah bangla kai n'hing sak.

¹⁶⁰Na ol tah oltak boeilu la om tih pai tih na duengnah dongkah laitloeknah boeih kumhal duela cak.

¹⁶¹שׂ Sin/ שׁ Shin Mangpa rhoek loh lunglilungla la kai n'hloem uh cakhaw na ol phoeikah na ol dongkah ni ka lungbuei loh a rhih.

¹⁶²Na olthui dongah tah kutbuem muep aka dang bangla ka ngaingaih.

¹⁶³Na olkhueng ka lungnah dongah laithae he ka thiinah tih ka tuei.

¹⁶⁴Na duengnah dongkah laitloeknah dongah namah te hnin at ah voeirhih kan thangthen.

¹⁶⁵Na olkhueng aka lungnah rhoek ham ngaimongnah yet tih amih taengah hmuitoel khaw om pawh.

¹⁶⁶Namah kah khangnah te ka lamso dongah BOEIPA aw na olpaek te ka vai.

¹⁶⁷Na olphong te muep ka lungnah dongah ka hinglu te a ngaithuen.

¹⁶⁸Namah hmaikah ka longpuei boeih ham na olrhi neh na olphong ni ka ngaithuen.

¹⁶⁹ת Tav Ka tamlung loh BOEIPA namah mikhmuh la ha pawk saeh lamtah na ol bangla kai n'yakming sak.

¹⁷⁰Kai kah lungmacil loh na mikhmuh la ha pawk saeh lamtah na olthui bangla kai n'huul lah.

¹⁷¹Na oltlueh te kai nan cang puei dongah ka hmuilai kah koehnah he phuet saeh.