2 Di dadadar ta ra king da ta ra kunukula kai ra leon; Nina i vakankan ia i vakaina ia iat mulai.
3 A magit na pite varpa pire ta tikai ba i ki irai kan ra varngangar; Ma ra umana lunga par dia varpuapuai.
4 Ta ra e na madoldol ra tabauma pa i ipuk; Kari na lulul ta ra e na varuruai, ma pa na vatur vake ta magit.
5 A varvateten ta ra bala i ra tarai i da ra tava i lulur, Ma ra tutana ba i kapa ra nuknukina na kulupe.
6 Mangoro na tarai diat a varkuvo ma ta tikai ba na mari diat, Ma to ia i tikan tadav valar pa ta dovot na tutana?
7 A tena takodo ba i vanavana ma ra dovot na mangamangana, A umana bul mur tana dia ti doan.
8 A king ba i ki ta ra kiki na varkurai I kavie varbaiane vue ra lavur kaina magit par ma ra matana.
9 To ia na tatike valar pa ra dari: Iau tar vagomgom ra balagu, Iau tar langalanga kan ra varpiam?
10 A ura mangana mamat ma a ura mangana valavalarina, Dir par dir milmilikuan pire ra Luluai.
11 A bul ikilik bula i vaarike ra maukuana ta kana mangamangana, Ba na dovot bar ma ba na takodo bar kana papalum.
12 A kapa na talinga ma ra kapa na kiau na mata, A Luluai i ga pait dir par.
13 Koko u ra lup va mat, kan una luveana tana; Una tavangun, ma una ti maur ma ra magit.
14 Nina i kul ra magit i biti dari: Pa i boina, pa i boina; Ma ba i tar kap ia, i langlang me.
15 A goled ma ra peal kiau na kalagi go kari; Ma ra tinata na kabinana ia ra ngatngat na magit na marmar.
16 Una tak pa ra mal kai nina i tar vavalima ure ra vaira, Una kure pi na pait ot pa kana vavalima pire ra umana vaira.
