1Âgofâc, dâŋ moc fokac mananiŋ: Nâŋere erâ numupie Wofuŋte dâŋzi fofotâc haŋ barame qâreŋ biaŋ‐ticne ŋoŋerao fuawec iŋuc jaha fua razejec.
2Erâ ŋic maŋbâiŋ bâbâfuane â sindaŋne jaŋere erâ Anutuzi ŋezic‐nâpoocte nunumuzi wâc bafic‐nâponʒepieŋ. Miti i ŋiczi furu ninic ro maŋ mi eeŋgopieŋ.
3Wofuŋzi ine mume sasanaŋ, irec hume keteŋ eŋarehuc sâqocne runere roroŋ sasapec eŋareocmu.
4Ŋoŋe dâŋ ŋâzapene reŋkerâ reŋke rahuc juniŋmu, irec Wofuŋte erâ ŋoŋere maŋjahec mi eŋgopeneŋ.
5Wofuŋzi maŋŋeŋic jowame Anuture maŋjauŋko â Kristore bumâteŋko iticnezejec.
6Âgofâc, Wofuŋ‐nâŋec Jesu Kristo ere micte ŋazapene mananiŋ, dâŋ qazu‐ŋarembeŋ i opâ ruac gâcnezi mi reŋkehuc kosa jueŋgopieŋ, ŋic i jaŋehec mi junʒepieŋ.
7Nâŋe hata fuŋkerâ âte‐ŋarembeŋ ijaha bâjâpec‐nâponiŋte kâuc mi baŋgopieŋ. Nâŋe ŋoŋerao ojoŋ mi jumbeŋ.
8Erâ ŋoŋeraonec nânâ furimâc mi nâmbeŋ, aricne, nânâ mafare micneneŋ eŋarenʒipeŋte ŋafe furec mezi gie ʒocnehec bahuc ʒâic manambeŋ.
9Erâ iŋuc enaŋte mi munârekicne, nâŋe qaŋeŋ‐ŋopahuc fuŋne ŋowatupene nâŋere mimiŋ qâjâpec juniŋte iŋuc eŋarembeŋ.
10Ŋoŋerao juhuc ʒiŋuc hâcne boc ŋazambeŋ: Ojoŋ juocmuzi nânâ mi nâzejec.
11Eme ʒi ŋoŋeraonec dâŋ ʒiŋuc wareme manambeŋ: Ŋic gâcnezi gie‐jeŋic hetârarâ qâoma erâ jueŋgopieŋ.
12Ŋic iŋucne jaŋe Wofuŋ Jesu Kristore micte uŋdâŋ ʒiŋuc jazapene mana‐jâmbâŋkenʒepieŋ: Ŋezu ŋewâneŋ erâ gie‐jeŋic bapie fârine fuame jaŋacneonec nânʒepieŋ.
13Âgofâc, ŋoŋe ine eehâmo gie tatakic tâmiric banʒepieŋ.
14Ʒi papiao dâŋ qâreŋke‐ŋareŋgopeneŋ, i ŋic moczi qikiŋneme fuŋne‐ticne mujaŋgeŋkerâ behepie buc juhuc mimiezejec.
15Râsi ecneniŋte mi mukopac, âgo‐nâŋec muhuc mu bâtiŋ ecnehuc tutuc qacnenʒepieŋ.
16Wofuŋ e wama runezi ine wama bâfua‐ŋareme ŋoŋerao dameŋ sâc sâcke‐fârerâ fozejec. Wofuŋ e ŋoŋehec jufârezejec.
17Ʒi Paulo no nahacne mezi ʒâŋe qâreŋ‐nane râekopac. Papia qâreŋkeekopac sâc ma izi fuaekac. Iŋuc hâcne qâreŋkeekopac.
18Wofuŋ‐nâŋec Jesu Kristo ere aki anonoczi ŋoŋerao fotâcnerâ fozejec.
