1Nego nabudi, ḡoere ꞌahogaꞌe ꞌahiguḡa: Emeḡe veize kuranoꞌi, zaeꞌa hari manoḡa mae ḡihiniroteꞌe teige, Zuhiꞌa Boro hari manoḡaniꞌa ḡarihe rovotifine!
2Ebu eme aduga rifiꞌeteꞌe azaḡa sauꞌa huneḡa mazaoꞌonoꞌo Badiꞌaꞌa eme biroga veize kuranoꞌi, mazaḡa mene vaze niduꞌaꞌe Badiꞌa mazao fieꞌohe!
3Rehano Zuhiꞌa Boro aniꞌe ḡoitoroneḡa mene variꞌeꞌe ahine, aniꞌa inaraziꞌuma ebu sauꞌaniꞌa za mene meifine duguziꞌuma.
4Eme hubehune ꞌahige rae zamareꞌohe: Zuhiꞌa Boroꞌa danaziꞌuma ꞌahine, emeḡeꞌa haramo ziniꞌeteꞌe haḡaiḡano zaeꞌa haḡaeꞌeteꞌe haḡaiḡaꞌe haḡae onamiꞌuma raꞌohe.
5Ebu eme ꞌahige kuratihi: Zuhiꞌa Boroꞌa zamaze ibito hanadu, Badiꞌaꞌa nouge nouge zae zamare borofeꞌeteꞌe ederoga. Zu Kerisoꞌa rahao ꞌada aduga boro zamaḡano rinede onaminuteꞌe zaeꞌa ederoga, ebu zae zuni eꞌe haḡaiḡano onamoga.
6Nego nabudi, Zuhiꞌa Boro Iesu Keriso niḡano eme ꞌahige zihi: Iesu moneo raꞌe rehano, tubuḡa azaḡa, zu emeḡeꞌa ihozidoteꞌe haḡaiḡano mene radiuꞌeteꞌe azaḡa mazaonoꞌo vaḡinoꞌi!
7Zae edeḡa, emeḡeꞌa haḡaeꞌeteꞌe teige zae zuni haḡaine manoḡa. Emeḡeꞌa zae teite radiunuteꞌe madaḡano eme mene tuboga horofinu.
8Eme vaze ogomu naeḡa mene haḡadu mene mae autauḡinu. Ebu za mazao aduga ꞌahoga mene zehoga veize, eme madai zu ohere gau boro haḡaido.
9Emeꞌe apostolo azaḡa ꞌahine, zae mazao ogomu mae tauḡoga idaḡa rehano, emeḡeꞌa gauadu ogomu hidido. Emeḡeꞌa gau ḡihau haḡaeꞌeteꞌe zaeꞌa emeḡe haḡai horonadu, zae zuni ꞌouge haḡaifine.
10Emeḡeꞌa zae teite radiunuteꞌe madaḡano zinaꞌa, ‘Iniu vaze gauoga mene uratoꞌidene, ogomu ago hanoꞌi!’ rae zido.
11Emeꞌa za hari igiꞌetene, za nuꞌe tubuḡa raꞌohe. Zeꞌe mene gauadu, vaze daꞌo dudizeꞌohe.
12ꞌUguḡa azaḡaꞌe, emeḡeꞌa Zuhiꞌa Boro Iesu Keriso niḡano ziꞌohe. Zaꞌe imuimuꞌuhi radoꞌi, ebu ogomu hidoga veize gauoꞌi!
13Ebu nego nabudi, zaꞌe haḡai manoḡa haḡaeꞌeteꞌe moneo ago fuḡozoꞌi!
14Iniu vazeꞌa emeḡeꞌa fefao ꞌada teateꞌe ḡoeꞌa rae modoꞌidene, eꞌe vazeḡaniꞌa nagini haḡaeꞌeteꞌe ekalesia azaḡa ihozoi! Ane teite ago zaꞌuoꞌi, ani mazagaronoga veize.
15Rehano ani agire vazeḡa rae ago noꞌi, rehano negoze iraduguneꞌeteꞌe teige iradugonoꞌi!
16Zama roḡeḡa rifiꞌuma Zuhiꞌaḡa Boro, aneꞌa iḡaiḡa zae radone niduꞌa zamaḡano ane zama roḡeḡa ziniꞌenoꞌi! Ebu Zuhiꞌa Boroꞌe zae niduꞌa teite radiuꞌenoꞌi!
17Ḡonaga ꞌadi ḡoeꞌaꞌe eḡe, Pauloꞌa eḡe ꞌevore hina uhiu ḡoeꞌa miriheꞌohe. Aꞌe eḡeꞌa hubehune tuḡureha rae ederifine, e ꞌahige miriheꞌohe.
18Emeḡe Zuhiꞌa Boro Iesu Keriso manoḡaniꞌa zae niduꞌa mazao radiuꞌenoꞌi!
