Te Israel me Juda Hani Sigo Tuni Bidigo Po Elalubo Buku Deli 7:6-21

⁶Tama augwaligo genuai be me deli sęnama, te nogi te tiwai polali, Te Genuai Pos Dabego Be da wali. Te bego bobage usu te 22 mita, tama te bego aga genuai usu te 13 me hap mita yai. Te bego mabo veranda me tama te veranda mabo dąų elalubo pos me elaluai.

⁷Tama augwaligo te Sia King Be, ma te Po Tų Odobo Be, me sę yani. Te Solomongo te we bidigo po tų odabo be tama sę yani. Augwaligo te bǫ ni nami dabe selama, tama te be paiali daga dabe haluali, te aiyadu plua saide gagalasa, te be peduba usu nigi holalio.

⁸Augwaligo te Solomongo be digi sę yani, te gasa obo banis tomo badu te Po Tų Odobo Be tudi badu elaluali. Augwaligo te gasa be dabe sę yani tiwai gilama naga sę yani. Tama augwaligo te Solomongo wego be me te tiwai sę yani, te Isip king bidigo wegi dao.

⁹Augwaligo te be tigidali sę yainu te gasa sawi sawi yai sagala masigi dabe naga selama, te be sę yani, te aiyadu sabo suiyame saide gagalasa, te be peduba usu nigulali, tama te bidi dabe me deliba sisinabo pesage me te obo nigilama, bagulali. Augwa te usu selama, tama te masigi dabe togwali, tama augwa te so selama, tama te me badu pedai te bugagia dodolali.

¹⁰Tama augwaligo te sawi sawi yai masigi dabego te moni moni bage todogo pedama, te nani wasilama, tama te daide te be ugwadu sę yainugo tiali. Te masigi mebago genuai usu te 3 me hap mita usu, te meba te 4 me hap mita dao.

¹¹Augwaligo te genuai moni masigi dabe nani wasila silama da, teda augwaligo te bugagia dodolali te gasa sawi yai masigi me, te bǫ tigi dabe me selama, tama augwa te be dabe sę yai dao.

¹²Tama augwaligo te kompaun tigidali bagulubo obo me deli nigali. Te obo augwa te tiwai nigali. Augwa te togolama bugagia dodolai masigi hani sela te muani. Tama augwaligo te masigi dabe daide te ni bǫ hani ni tigi deli te daide muna muna pali. Augwaligo te tiwai naga ela pidubadi, te obo bagulubo sę siligi pabo siba usu nani. Augwaligo te obo nigali deli poai kolesaga elama, augwa te bidi deliba sisinibo obo bagubo sę yali, te Genuai Bidigo tempel be gesabidi badu elaluai, tama te tiwai te be habu te Genuai Bidigo tempel be gesabidi nigai elaluali.

¹³Te Tair hanude bidi me deli bidali, aga nogi te Huram. Te bidi aga te brasgo te nai dabe nigibo sę te mu koneai bidi mu dao. Te bidi Huramgo aya aga te Tair hanu bidi, tama agai me te brasgo te nai doado bage nigibo te mu koneai bidi me deli, tiali goli te aga isali. Te Huram aga ida te Naptali hani we me deli dao. Solomongo te Huramba po ola tolobaso, tama aga aselama, tama te tigidali nai te brasgo nigila silali, te Solomongo agabolo wali po tiwai gilama te tiwai yalio.

¹⁵Te Huramgo te genuai bobage pos si te brasgo nigali. Agai te pos si te deli tobage tigi poai si tama nigali. Te pos sigo bobage usu te 8 mita, tama te pos sigo tigi genuai usu te 5 mita me 30 sentimita dao.

¹⁶Tama agai te pos sigo tobolu me te brasgo nigai, te augwali si te bobage pos dabe daiba ugwadu muainu tialio. Te pos tobolu dabe aiyadu ugwaba gagalasa nedali usu, te 2 mita me 20 sentimita dao.

¹⁷Tama agai te brasgo sen dabe nigilama, tama te wego nigibo wa tiwai kęnama, te pos si tobolu dagede walali, te pos si au iliyu tama tialio. Te deli deli posde te tobage au ilali te a naga nogo me si elaluali.

¹⁸Tama agai te bras selama, tama te ni wai pomigranet piksa hauwa nigilama, tama agai te pomigranet piksa dabe te wa tiwai sen dabede walama, te pos si bagulama elaluali. Deli deli posde te au yabo pomigranet hani si elalua palio.

¹⁹Te deli deli pos tobolude te gasa sawi yai plaua me deli te dinigalubo tiwai tonobo ąǫ yalio, tama te plauago bobage usu te 1 mita me 80 sentimita elaluai.

²⁰Te pos dabe tobolu te bagua sai tama Huramgo te nai dabe te wa tiwai te dwasianu ugwanu gana te bagua salide kęnama walali. Tama te daide ugwadu, agai te pomigranet piksa te hani si walali. Te deli deli posde te 200 pomigranet elalua pali.

²¹Huramgo te pos dabede sę yali silibaso, tama te pos si augwaligo te Genuai Bidigo tempel be sunumi pąde te ugwaba dodolama muani. Te saut badu elaluali sunumi pedai badu dodolama muani pos, te nogi augwa te Jakin nogi yali, tama te not pedai badu muani gasa pos, te nogi augwa te Boas nogi yai dao.