Te Israel me Juda Hani Sigo Tuni Bidigo Po Elalubo Buku Deli 2:11-32

¹¹Aga te Israel tǫde te king bidibadi, te kibu be bidi sese si, te 40 yia bidai. Aga hasia bolo te Hebronde king bidibadi, te kibu be a naga olama, me si elama, tama nosali te Jerusalemde king bidibadi, te 33 kibu be bidali.

¹²Devit isibaso, tama aga ogwa Solomongo te aga bidali pesage hasegelama, tama te king pedelai. Tama Solomon te bomai king pedelali, tama bidi mego aga aiyaba elalueinu ebo te usu meni yai dao.

¹³Me sogo deli Adoniya, te Hagitgo ogwa, aselama, te Batseba suagasali, te Solomongo ida dao. Tama Batsebago agaba hanalu wali, “Nago te wiegi yai po me wagasiyu asai dawe?” Tama Adoniyago po wei ponoyu, te tiwai po wai, “Awe, te dolo dao.”

¹⁴Tama agai po te ma weyu, te tama po wali, “Eno te po me deli dwasianu elalubao.” Tama Batsebago agabolo te tama po wai, “Te usu da, nago te po enaba wao,” po wali.

¹⁵Tama Adoniyago te po wali, “Nago koneani, te hasia bolo te Israel bidi tigidaligo te ena king pedelaiba homu yai. Tama ena te king pedaligi digi, te Genuai Bidigo homugo digi te eno ama king pedalumainu elama, tama ena meni yanio.

¹⁶Tialima, megi da, eno hanalubo po deli naga elalubao. Tama eno homugo nago eno te hanalubo pode usu da po omainu homu ebao.” Tama Batsebago te po wai, “Nago enaba olama, tama eno odaibao,” te po wai.

¹⁷Tialima, Adoniyago agabolo te po wali, “Eno homugo nago te king Solomonba hanalugi pomainu elama, tama agai enabolo te Sunem bulu we, te Abisak, somainu usu da po omainogo te homu yai. Eno koneani, te kingo nago po sela sągobe da homu yai.”

¹⁸Tama Batsebago te Adoniyaba te tiwai po wai, “Te usu da, te ena pelama, te agaba hanalugi paibao,” wali.

¹⁹Batseba pelama, te king Solomon sugi pelama, te agaba hanaluyu, te Abisak te Adoniyago sabo po hanalugi pai. Kingo te Batseba asobo sulama, tama aga dolugulama, tama kidu sugunu gulama, tama tobolu basi gulama, te aga idaba genuai nogi mayu te tama tiali. Tama aga te king dulalubo sia saiba ma duagulama, tama te sę bidi dabeba weyu, te augwaligo sia sai me deli sela asao olama, tama aga te king dugulalubo sia sai pąde te aga dolo nogo badu munama, tama Batseba te sia saiba duagulali.

²⁰Tama Batsebago te tiwai po wai, “Eno homugo nageba te po me deli dwasianu hanalu wainu ebao, tama eno homugo nago eno te hanalubo pode usu da po omainu ebao.” Tama Solomongo te tiwai po wei ponani, “Ida, nago te hanaluyu bolo yao. Nago koneani, eno nago te hanalubo pode te po olamo po me wagobeo.”

²¹Tialima, Batsebago te tama po wali, “Eno homugo te nago ama, Adoniyago, te we Abisak somainu homu ebao.”

²²Kingo te hanalubo po odama, tama aga wado po weyu, te tiwai po wali, “Magi baso nago enaba te Abisak te Adoniyaba mao po hanalubawe? Te tiwai ebaso da, teda nago enaba dolo hanaluyu, te agai ena hasegelama, tama te king pedalumainogo ilibewe, magi baso meni, aga te eno ama genuai bidi dao. Tama nago te pris Abiatar me Joap, te Seruiago ogwa, te augwali sigo hanalu wali po me sela asobewe?” te po wai.

²³Tialima, king Solomongo te Genuai Bidigo nogide te bomai po te tiwai wali, “Adoniyago te wali po te geda muani elalubao. Tama tibaso, eno te aga ela muaibao. Te eno te tama tisąbaso da, teda eno homugo Godigo ena ela mumainao.

²⁴Magi baso meni, Genuai Bidigo digi ena tau sobaso, tama ena dąų walama, tama eno te ena aya Devitgo sę yali pesage selama, tama ena te king bidibao, te polobadu Genuai Bidigo te enaba me te eno haniba te tiwai bomai po dąų walali. Tama te Sesemane Sogo Bidibo Genuai Bidi nogide, te mu tama, megi tama te Adoniya te isaiba,” walio.

²⁵Tialima, king Solomongo te po wali, tama Benaia pelama, te Adoniya ela muani.

²⁶Solomongo te pris Abiatarbolo te tiwai po wali, “Nage te hanu Anatotba ma pelama, tama naga tǫba bidigi pao,” wali. “Nago te dwai sę yai elalubaso, tama nage isimainu yaibao, tiali goli te eno nage me eligobeo. Magi baso meni, polobadu nage te eno aya Devit dali bidai, tama nago te dena Genuai Bidigo te Dąų Wali Bomai Po Muani Halobage tolasa bilali. Tama Devitgo te sęgę me dwai sę hauwa tolali sogo da, teda nage aga dali bidiyu, tama nago me te sęgę dabe toliyu yai dao.” Solomongo te po wai.

²⁷Solomongo te Abiatar te Genuai Bidigo pris sę yali te sela sąwani, tama te kolesagade agai te Genuai Bidigo polobadu te Silo bulude te mena sę te pris Eligo haniba pedalubode te wali poba usu niyu, tama te tiwai yai dao.

²⁸Te Joapgo te Apsalom dali me kisasiąwai, tiali goli agai te Adoniya tau salio. Tama agai te Adoniya me Abiatar dali side pedelali sę dabe po odama, aga te wi ebaso, tama te Genuai Bidigo ugwa beba wi pelama, tama te alta dage badu kisa sigi pelama, dolalugi pai dao.

²⁹Tama bidi meba pelama, te king Solomonba te tiwai po wagi pali, “Joap te udulama, te Genuai Bidigo ugwa be tomoba pelama, tama te alta sabi badu tolalubao,” po wai. Tialima, Solomongo Benaiaba te po olama, tama te Joap ela mugi pao po wali.

³⁰Tama Benaia te Genuai Bidigo ugwa beba pelama, tama Joapbolo te tiwai po wai, “Kingo te po wai, nage te pesagede bidibo tagalama, te buluba dia soa po wali.” Tiali goli, Joapgo te po wai, “Woo, menio, ena te buluba me dia soagobeo,” wai. “Nago ena ede tama ela muao,” wali. Tialima, Benaia te kingba ma begasa pelama, tama agaba te Joapgo wali po wagi pali.

³¹Tama kingo Benaiabolo te tiwai po wei ponani, “Te usu da,” wali. “Nago te agai homu wali pelama, tama aga te bidibo pesagede elao,” wali. “Tama agai tigi tolasa pelama, pubaligi pao. Joapgo te magi dwai sę me isiąwai bidi dabe te odolali ela muai, tama agai te dwai sę yali kolesaga enade me, te eno ayago hanide me elaluali. Tama nago te aga elao, tama agai te dwai sę yali sęgę dade te ma elalugobeo.

³²Genuai Bidigo te wei ponobo dwai kolesaga te Joapba me iduaibao, te aga yali dwai sęde te tama tiaibao. Joapgo te Nergo ogwa, Apner, te olo dali elali, tama te Amasa, te Jetergo ogwa me elali. Apner te Israelde ami bidi dabego polaluali ofisa bidi, tama Amasa te Juda bage ami bidi dabego polaluali ofisa bidi da. Te bidi si te wiegi yai bidi si, tama te magi dwai sę me isiąwai, tama augwali sigo kolesagago te Joapgo kolesaga aiyaba elaluali. Tiali goli, Joapgo te eno ayabolo po me wasiąma, tama agai te aga homugo digi te bidi si ela muai dao.