Taruxui 24:8-20 in Susu

⁸ A naxa a kalamulae yaamari e xa fa i xɔn ma. Xa i fan Pɔlu maxɔrin, i fama a kolonde muxu a suxuxi fe naxan ma.»

⁹ Yuwifie naxa tin na masenyi ra, e fan naxa a fala a na na ki nɛ.

¹⁰ Mangɛ naxa Pɔlu yaamari a fan xa wɔyɛn. Pɔlu naxa a masen a bɛ, «N a kolon, yi bɔxi makiitima nan i ra kabi ɲɛ wuyaxi. Na kui, n nan ma fe xunmafalama nɛ i bɛ lanlanteya kui.

¹¹ Xi fu nun firin mu dangi kabi n naxa siga Darisalamu salide.

¹² E mu nu muxu nun mixi li sɔnxɔ ra hɔrɔmɔbanxi kui, xa na mu a ra salide xunxurie kui. N mu sɔnxɔɛ ratexi taa kui, n mu gali kui isoxi.

¹³ E mu nɔma sese masende, e n kalamuma naxan ma.

¹⁴ N naxan masenma i bɛ na nan ya. N nan n benbae Marigi Ala nan batuma alɔ Isa xa kira a masenxi ki naxɛ, e a falama kira naxan bɛ a wule kira. Naxan sɛbɛxi Tawureta Munsa nun namiɲɔnmɛe xa Kitaabui kui, n la na birin na.

¹⁵ N laxi Ala xa masenyi ra naxan masenxi a tinxintɔɛe nun tinxintare birin fama nɛ kelide faxɛ ma. Yuwifie fan laxi na ra.

¹⁶ Na nan a toxi n nan n yɛtɛ karaxanma alako n xa n ma simaya radangi bɔɲɛ fiixɛ kui Ala nun mixie tagi.

¹⁷ N mu nu na be ɲɛ wuyaxi bun ma, kɔnɔ yakɔsi n faxi harige nde ra n bɔnsɔɛ bɛ. N fan faxi sɛrɛxɛ bade Ala bɛ.

¹⁸ E n lixi na tɛmui nɛ hɔrɔmɔbanxi kui, n sɛniyɛnxi, gali mu na n fɔxɔ ra, sɔnxɔɛ yo fan mu keli n saabui ra.

¹⁹ Kɔnɔ Yuwifi nde naxee keli Asi bɔxi ma, e mu tin n ma fe ra. E tan xa e yɛtɛ masen i bɛ, xa fe nde na e bɛ n ma fe ra.

²⁰ Xa na mu a ra naxee na be, e xa a masen i bɛ e n toxi fe ɲaaxi naxan xun, n to siga Yuwifi kiitisae yire.

⁸ عَ نَشَ عَ كَلَمُلَيٍ يَامَرِ عٍ شَ قَ عِ شْن مَ. شَ عِ قَن ثْلُ مَشْرِن، عِ قَمَ عَ كٌلٌندٍ مُشُ عَ سُشُشِ قٍ نَشَن مَ.»

⁹ يُوِقِيٍ نَشَ تِن نَ مَسٍنيِ رَ، عٍ قَن نَشَ عَ قَلَ عَ نَ نَ كِ نّ.

¹⁰ مَنفّ نَشَ ثْلُ يَامَرِ عَ قَن شَ وْيّن. ثْلُ نَشَ عَ مَسٍن عَ بّ، «ﭑ عَ كٌلٌن، يِ بْشِ مَكِيتِمَ نَن عِ رَ كَبِ حّ وُيَشِ. نَ كُي، ﭑ نَن مَ قٍ شُنمَقَلَمَ نّ عِ بّ لَنلَنتٍيَ كُي.

¹¹ شِ قُ نُن قِرِن مُ دَنفِ كَبِ ﭑ نَشَ سِفَ دَرِ سَلَمُ سَلِدٍ.

¹² عٍ مُ نُ مُشُ نُن مِشِ لِ سْنشْ رَ هْرْ مْبَنشِ كُي، شَ نَ مُ عَ رَ سَلِدٍ شُنشُرِيٍ كُي. ﭑ مُ سْنشْي رَتٍشِ تَا كُي، ﭑ مُ فَلِ كُي عِسٌشِ.

¹³ عٍ مُ نْمَ سٍسٍ مَسٍندٍ، عٍ ﭑ كَلَمُمَ نَشَن مَ.

¹⁴ ﭑ نَشَن مَسٍنمَ عِ بّ نَ نَن يَ. ﭑ نَن ﭑ بٍنبَيٍ مَرِفِ عَلَ نَن بَتُمَ عَلْ عِسَ شَ كِرَ عَ مَسٍنشِ كِ نَشّ، عٍ عَ قَلَمَ كِرَ نَشَن بّ عَ وُلٍ كِرَ. نَشَن سّبّشِ تَوُرٍتَ مُنسَ نُن نَمِحْنمّيٍ شَ كِتَابُي كُي، ﭑ لَ نَ بِرِن نَ.

¹⁵ ﭑ لَشِ عَلَ شَ مَسٍنيِ رَ نَشَن مَسٍنشِ عَ تِنشِنتْييٍ نُن تِنشِنتَرٍ بِرِن قَمَ نّ كٍلِدٍ قَشّ مَ. يُوِقِيٍ قَن لَشِ نَ رَ.

¹⁶ نَ نَن عَ تٌشِ ﭑ نَن ﭑ يّتّ كَرَشَنمَ عَلَكٌ ﭑ شَ ﭑ مَ سِمَيَ رَدَنفِ بْحّ قِيشّ كُي عَلَ نُن مِشِيٍ تَفِ.

¹⁷ ﭑ مُ نُ نَ بٍ حّ وُيَشِ بُن مَ، كْنْ يَكْسِ ﭑ قَشِ هَرِفٍ ندٍ رَ ﭑ بْنسْي بّ. ﭑ قَن قَشِ سّرّشّ بَدٍ عَلَ بّ.

¹⁸ عٍ ﭑ لِشِ نَ تّمُي نّ هْرْ مْبَنشِ كُي، ﭑ سّنِيّنشِ، فَلِ مُ نَ ﭑ قْشْ رَ، سْنشْي يٌ قَن مُ كٍلِ ﭑ سَابُي رَ.

¹⁹ كْنْ يُوِقِ ندٍ نَشٍيٍ كٍلِ عَسِ بْشِ مَ، عٍ مُ تِن ﭑ مَ قٍ رَ. عٍ تَن شَ عٍ يّتّ مَسٍن عِ بّ، شَ قٍ ندٍ نَ عٍ بّ ﭑ مَ قٍ رَ.

²⁰ شَ نَ مُ عَ رَ نَشٍيٍ نَ بٍ، عٍ شَ عَ مَسٍن عِ بّ عٍ ﭑ تٌشِ قٍ حَاشِ نَشَن شُن، ﭑ تٌ سِفَ يُوِقِ كِيتِسَيٍ يِرٍ.