Taruxui 19:6-25 in Susu

⁶ Pɔlu to a bɛlɛxɛ sa e ma, Ala Xaxili Sɛniyɛnxi naxa fa e ma. E naxa so xui gbɛtɛe falafe, e man nu Ala xa masenyi fala.

⁷ E birin nalanxi, xɛmɛ fu nun firin nan nu e ra.

⁸ Na dangi xanbi, Pɔlu naxa so salide kui, a kawandi ti. A nu fe tagi raba e bɛ Ala xa mangɛya niini xa fe ra kike saxan bun ma. A nu kata a xa mixie nɔ naxee tuli nu matixi a ra.

⁹ Kɔnɔ ndee xaxili nu xɔrɔxɔ, e mu la a ra. E naxa Marigi xa kira bɛxu ɲama ya i. Pɔlu naxa mini e ya ma, a naxa Isa fɔxirabirɛe tongo a xun, alako a xa e xaran lɔxɔ yo lɔxɔ Tiranusi xa xarande kui.

¹⁰ Na naxa siga han ɲɛ firin. Yuwifie nun Girɛkika naxee birin nu sabatixi Asi, e Marigi xa masenyi ramɛ na nan kui.

¹¹ Ala nu kaabanako xungbee rabama Pɔlu bɛlɛxɛe ra

¹² han e nu dugi nun xunxurie sa furemae ma, Pɔlu nu bara din naxee ra. Fure nu ba nɛ e ma, ɲinnɛ nu mini mixie i.

¹³ Yuwifie ndee naxee ɲinnɛ raminima mixie yire birin, e naxa kata Marigi Isa xili rawalide ɲinnɛ kanyie bɛ. E a fala, «N bara wo yaamari Isa xili ra Pɔlu naxan xa fe kawandima.»

¹⁴ Seba, Yuwifie sɛrɛxɛdubɛ kuntigi nde, xa di solofere nan nu na fe rabama.

¹⁵ Ɲinnɛ naxa e yaabi, «N Isa nun Pɔlu kolon, kɔnɔ n mu wo tan kolon feo!»

¹⁶ Na ɲinnɛ kanyi naxa bagan e ma, a naxa e bɔnbɔ han e naxa e gi banxi kui e rageli nun e maxɔnɔxi ra.

¹⁷ Yuwifi nun Girɛkika naxee birin nu sabatixi Efɛsɛ, e naxa na fe kolon. Gaaxui naxa e birin suxu. Marigi Isa xili dariyɛ naxa mate.

¹⁸ Danxaniyatɔɛ wuyaxi naxa fa, e naxa e ti e xa yunubie ra, e naxa e xa fe ɲaaxi birin fala kɛnɛ ma.

¹⁹ Duuree fan naxa fa e xa bukie ra, e naxa e gan birin ya xɔri. E naxa bukie sare kɔnti, kɔbiri kole wulu tongo suuli nan nu a ra.

²⁰ Marigi xa masenyi nu yiriwama na ki nɛ sɛnbɛ ra.

²¹ Yi fee to dangi, Pɔlu naxa natɛ tongo a xa siga Darisalamu. Na biyaasi kui fo a xa Masedon nun Akayi bɔxi ibolon. A naxa a fala, «N na siga Darisalamu, fo n xa Rɔma fan li.»

²² A naxa a malima firin xɛɛ Masedon, Timote nun Erasito, kɔnɔ a tan naxa lu Asi sinden.

²³ Na tɛmui sɔnxɔɛ xungbe naxa raba naa Marigi xa kira xa fe ma.

²⁴ Xabui nde, naxan xili Demetiri, a nu ala Aritemi xa salide misaali lanmadi yailanma gbeti ra. Na xabui mɔɔlie nu kɔbiri gbegbe sɔtɔma na wali kui.

²⁵ A naxa a walibooree malan, a a fala e bɛ, «Wo a kolon, won baloxi yi wali nan kui.

⁶ ثْلُ تٌ عَ بّلّشّ سَ عٍ مَ، عَلَ شَشِلِ سّنِيّنشِ نَشَ قَ عٍ مَ. عٍ نَشَ سٌ شُي فبّتّيٍ قَلَقٍ، عٍ مَن نُ عَلَ شَ مَسٍنيِ قَلَ.

⁷ عٍ بِرِن نَلَنشِ، شّمّ قُ نُن قِرِن نَن نُ عٍ رَ.

⁸ نَ دَنفِ شَنبِ، ثْلُ نَشَ سٌ سَلِدٍ كُي، عَ كَوَندِ تِ. عَ نُ قٍ تَفِ رَبَ عٍ بّ عَلَ شَ مَنفّيَ نِينِ شَ قٍ رَ كِكٍ سَشَن بُن مَ. عَ نُ كَتَ عَ شَ مِشِيٍ نْ نَشٍيٍ تُلِ نُ مَتِشِ عَ رَ.

⁹ كْنْ ندٍيٍ شَشِلِ نُ شْرْشْ، عٍ مُ لَ عَ رَ. عٍ نَشَ مَرِفِ شَ كِرَ بّشُ حَمَ يَ عِ. ثْلُ نَشَ مِنِ عٍ يَ مَ، عَ نَشَ عِسَ قْشِرَبِرّيٍ تٌنفٌ عَ شُن، عَلَكٌ عَ شَ عٍ شَرَن لْشْ يٌ لْشْ تِرَنُسِ شَ شَرَندٍ كُي.

¹⁰ نَ نَشَ سِفَ هَن حّ قِرِن. يُوِقِيٍ نُن فِرّكِكَ نَشٍيٍ بِرِن نُ سَبَتِشِ عَسِ، عٍ مَرِفِ شَ مَسٍنيِ رَ مّ نَ نَن كُي.

¹¹ عَلَ نُ كَابَنَكٌ شُنفبٍيٍ رَبَمَ ثْلُ بّلّشّيٍ رَ

¹² هَن عٍ نُ دُفِ نُن شُنشُرِيٍ سَ قُرٍ مَيٍ مَ، ثْلُ نُ بَرَ دِن نَشٍيٍ رَ. قُرٍ نُ بَ نّ عٍ مَ، حِننّ نُ مِنِ مِشِيٍ عِ.

¹³ يُوِقِيٍ ندٍيٍ نَشٍيٍ حِننّ رَ مِنِمَ مِشِيٍ يِرٍ بِرِن، عٍ نَشَ كَتَ مَرِفِ عِسَ شِلِ رَوَلِدٍ حِننّ كَنيِيٍ بّ. عٍ عَ قَلَ، «ﭑ بَرَ وٌ يَامَرِ عِسَ شِلِ رَ ثْلُ نَشَن شَ قٍ كَوَندِ مَ.»

¹⁴ سٍبَ، يُوِقِيٍ سّرّشّدُبّ كُنتِفِ ندٍ، شَ دِ سٌلٌقٍرٍ نَن نُ نَ قٍ رَبَمَ.

¹⁵ حِننّ نَشَ عٍ يَابِ، «ﭑ عِسَ نُن ثْلُ كٌلٌن، كْنْ ﭑ مُ وٌ تَن كٌلٌن قٍوٌ!»

¹⁶ نَ حِننّ كَنيِ نَشَ بَفَن عٍ مَ، عَ نَشَ عٍ بْنبْ هَن عٍ نَشَ عٍ فِ بَنشِ كُي عٍ رَفٍلِ نُن عٍ مَشْنْشِ رَ.

¹⁷ يُوِقِ نُن فِرّكِكَ نَشٍيٍ بِرِن نُ سَبَتِشِ عٍقّسّ، عٍ نَشَ نَ قٍ كٌلٌن. فَاشُي نَشَ عٍ بِرِن سُشُ. مَرِفِ عِسَ شِلِ دَرِيّ نَشَ مَتٍ.

¹⁸ دَنشَنِيَتْي وُيَشِ نَشَ قَ، عٍ نَشَ عٍ تِ عٍ شَ يُنُبِيٍ رَ، عٍ نَشَ عٍ شَ قٍ حَاشِ بِرِن قَلَ كّنّ مَ.

¹⁹ دُورٍيٍ قَن نَشَ قَ عٍ شَ بُكِيٍ رَ، عٍ نَشَ عٍ فَن بِرِن يَ شْرِ. عٍ نَشَ بُكِيٍ سَرٍ كْنتِ، كْبِرِ كٌلٍ وُلُ تٌنفٌ سُولِ نَن نُ عَ رَ.

²⁰ مَرِفِ شَ مَسٍنيِ نُ يِرِوَ مَ نَ كِ نّ سّنبّ رَ.

²¹ يِ قٍيٍ تٌ دَنفِ، ثْلُ نَشَ نَتّ تٌنفٌ عَ شَ سِفَ دَرِ سَلَمُ. نَ بِيَاسِ كُي قٌ عَ شَ مَسٍدٌن نُن عَكَيِ بْشِ عِبٌلٌن. عَ نَشَ عَ قَلَ، «ﭑ نَ سِفَ دَرِ سَلَمُ، قٌ ﭑ شَ رْ مَ قَن لِ.»

²² عَ نَشَ عَ مَلِمَ قِرِن شّي مَسٍدٌن، تِمٌتٍ نُن عٍرَ سِتٌ، كْنْ عَ تَن نَشَ لُ عَسِ سِندٍن.

²³ نَ تّمُي سْنشْي شُنفبٍ نَشَ رَبَ نَا مَرِفِ شَ كِرَ شَ قٍ مَ.

²⁴ شَبُي ندٍ، نَشَن شِلِ دٍ مٍتِرِ، عَ نُ عَلَ عَرِتٍمِ شَ سَلِدٍ مِسَالِ لَنمَدِ يَءِلَنمَ فبٍتِ رَ. نَ شَبُي مْولِيٍ نُ كْبِرِ فبٍفبٍ سْتْمَ نَ وَلِ كُي.

²⁵ عَ نَشَ عَ وَلِبٌورٍيٍ مَلَن، عَ عَ قَلَ عٍ بّ، «وٌ عَ كٌلٌن، وٌن بَلٌشِ يِ وَلِ نَن كُي.