Taruxui 12:7-20 in Susu

⁷ Marigi xa malekɛ nde naxa mini a ma tɛrɛnna ra. Yanbɛ naxa geeli kui iyalan. Malekɛ naxa Piyɛri sɛɛti mabɔnbɔ, a xa xunu, a fa a fala a bɛ, «Keli, i xulun!» Yɔlɔnxɔnyie naxa yolon a bɛlɛxɛ ra keren na.

⁸ Malekɛ naxa a fala a bɛ, «I maxiri, i xa sankirie so.» A to na raba, malekɛ man naxa a fala a bɛ, «Donma felen i ma, bira n fɔxɔ ra.»

⁹ Piyɛri naxa mini, a bira malekɛ fɔxɔ ra, kɔnɔ a mu a kolon xa na fe findixi nɔndi nan na. A nu bara a maɲɔxun, tɛmunde a findixi laamatunyi nan na.

¹⁰ E to bara dangi sɔɔrie singe e nun a firin ndee ra, e naxa wure naadɛ li naxan dɛ rabixi taa ma, na naxa rabi a yɛtɛ ra. E naxa mini. E mu nu a ikuyaxi kira xɔn ma, malekɛ naxa keli Piyɛri xun.

¹¹ Piyɛri to xaxili sɔtɔ na fe ma, a naxa a fala, «Yakɔsi, n bara a kolon Marigi nan a xa malekɛ xɛɛxi, a xa n ba Herode yi ra. A bara n natanga Yuwifie bɛlɛxɛ.»

¹² A to kolon sɔtɔ yi fe ma, a naxa siga Yaya nga Mariyama xɔnyi, Yaya naxan man xili Maraki. Mixi wuyaxi nu malanxi naa, e na Ala maxandife.

¹³ A to naadɛ kɔnkɔn, konyi ginɛ nde, naxan xili Roda, a naxa fa naadɛ rabide.

¹⁴ A to Piyɛri xui mɛ, a naxa ɲɛlɛxin han a naxa nɛɛmu naadɛ rabife ma. A naxa a gi a xa sa a fala booree bɛ Piyɛri na naadɛ ra.

¹⁵ E naxa a fala a bɛ, «I bara daxu.» Kɔnɔ a to e karaxan, e naxa a fala, «A xa malekɛ na a ra.»

¹⁶ Na tɛmui birin Piyɛri nu na naadɛ kɔnkɔnfe. E to naadɛ rabi, e naxa kaaba a tofe ma.

¹⁷ Piyɛri to e masabari a bɛlɛxɛ ra, a naxa a yaba e bɛ Marigi a raminixi geeli kui ki naxɛ. A naxa a fala, «Wo yi fe ragbilen Yaki nun ngaxakerenyie ma.» Na xanbi, a naxa mini, a xa siga yire gbɛtɛ.

¹⁸ Kuye to iba, sɔɔrie naxa lu maimaxɛ xungbe kui, a kolonfe ra Piyɛri xa fe niyaxi ki naxɛ.

¹⁹ Herode naxa a fen, kɔnɔ a mu a to. A naxa sɔɔrie makiiti, a naxa yaamari fi a e birin xa faxa. Na xanbi, a naxa keli Yudaya, a naxa goro Sesare, a xa saxanyi radangi mɛnni.

²⁰ Tirekae nun Sidɔnkae nu na lantareya kui e nun Herode ra na tɛmui. E naxa lan e bore ma, e xa siga Herode yire, e xa wɔyɛn. E to bara Bilasitu masɔtɔ, mangɛ xa batula kuntigi, e naxa Herode mayandi lanyi xirife ra e tagi, barima e xa bɔxi xaxili nu tixi Herode xa bɔxi baloe nan na.

⁷ مَرِفِ شَ مَلٍكّ ندٍ نَشَ مِنِ عَ مَ تّرّننَ رَ. يَنبّ نَشَ فٍيلِ كُي عِيَلَن. مَلٍكّ نَشَ ثِيّرِ سّيتِ مَبْنبْ، عَ شَ شُنُ، عَ قَ عَ قَلَ عَ بّ، «كٍلِ، عِ شُلُن!» يْلْنشْنيِيٍ نَشَ يٌلٌن عَ بّلّشّ رَ كٍرٍن نَ.

⁸ مَلٍكّ نَشَ عَ قَلَ عَ بّ، «عِ مَشِرِ، عِ شَ سَنكِرِيٍ سٌ.» عَ تٌ نَ رَبَ، مَلٍكّ مَن نَشَ عَ قَلَ عَ بّ، «دٌنمَ قٍلٍن عِ مَ، بِرَ ﭑ قْشْ رَ.»

⁹ ثِيّرِ نَشَ مِنِ، عَ بِرَ مَلٍكّ قْشْ رَ، كْنْ عَ مُ عَ كٌلٌن شَ نَ قٍ قِندِشِ نْندِ نَن نَ. عَ نُ بَرَ عَ مَحْشُن، تّمُندٍ عَ قِندِشِ لَامَتُنيِ نَن نَ.

¹⁰ عٍ تٌ بَرَ دَنفِ سْورِيٍ سِنفٍ عٍ نُن عَ قِرِن ندٍيٍ رَ، عٍ نَشَ وُرٍ نَادّ لِ نَشَن دّ رَبِشِ تَا مَ، نَ نَشَ رَبِ عَ يّتّ رَ. عٍ نَشَ مِنِ. عٍ مُ نُ عَ عِكُيَشِ كِرَ شْن مَ، مَلٍكّ نَشَ كٍلِ ثِيّرِ شُن.

¹¹ ثِيّرِ تٌ شَشِلِ سْتْ نَ قٍ مَ، عَ نَشَ عَ قَلَ، «يَكْسِ، ﭑ بَرَ عَ كٌلٌن مَرِفِ نَن عَ شَ مَلٍكّ شّيشِ، عَ شَ ﭑ بَ هٍرٌدٍ يِ رَ. عَ بَرَ ﭑ نَتَنفَ يُوِقِيٍ بّلّشّ.»

¹² عَ تٌ كٌلٌن سْتْ يِ قٍ مَ، عَ نَشَ سِفَ يَيَ نفَ مَرِيَمَ شْنيِ، يَيَ نَشَن مَن شِلِ مَرَكِ. مِشِ وُيَشِ نُ مَلَنشِ نَا، عٍ نَ عَلَ مَشَندِقٍ.

¹³ عَ تٌ نَادّ كْنكْن، كٌنيِ فِنّ ندٍ، نَشَن شِلِ رٌدَ، عَ نَشَ قَ نَادّ رَبِدٍ.

¹⁴ عَ تٌ ثِيّرِ شُي مّ، عَ نَشَ حّلّشِن هَن عَ نَشَ نّيمُ نَادّ رَبِقٍ مَ. عَ نَشَ عَ فِ عَ شَ سَ عَ قَلَ بٌورٍيٍ بّ ثِيّرِ نَ نَادّ رَ.

¹⁵ عٍ نَشَ عَ قَلَ عَ بّ، «عِ بَرَ دَشُ.» كْنْ عَ تٌ عٍ كَرَشَن، عٍ نَشَ عَ قَلَ، «عَ شَ مَلٍكّ نَ عَ رَ.»

¹⁶ نَ تّمُي بِرِن ثِيّرِ نُ نَ نَادّ كْنكْنقٍ. عٍ تٌ نَادّ رَبِ، عٍ نَشَ كَابَ عَ تٌقٍ مَ.

¹⁷ ثِيّرِ تٌ عٍ مَسَبَرِ عَ بّلّشّ رَ، عَ نَشَ عَ يَبَ عٍ بّ مَرِفِ عَ رَ مِنِشِ فٍيلِ كُي كِ نَشّ. عَ نَشَ عَ قَلَ، «وٌ يِ قٍ رَفبِلٍن يَكِ نُن نفَشَكٍرٍنيِيٍ مَ.» نَ شَنبِ، عَ نَشَ مِنِ، عَ شَ سِفَ يِرٍ فبّتّ.

¹⁸ كُيٍ تٌ عِبَ، سْورِيٍ نَشَ لُ مَءِمَشّ شُنفبٍ كُي، عَ كٌلٌنقٍ رَ ثِيّرِ شَ قٍ نِيَشِ كِ نَشّ.

¹⁹ هٍرٌدٍ نَشَ عَ قٍن، كْنْ عَ مُ عَ تٌ. عَ نَشَ سْورِيٍ مَكِيتِ، عَ نَشَ يَامَرِ قِ عَ عٍ بِرِن شَ قَشَ. نَ شَنبِ، عَ نَشَ كٍلِ يُدَيَ، عَ نَشَ فٌرٌ سٍسَرٍ، عَ شَ سَشَنيِ رَدَنفِ مّننِ.

²⁰ تِرٍكَيٍ نُن سِدْنكَيٍ نُ نَ لَنتَرٍيَ كُي عٍ نُن هٍرٌدٍ رَ نَ تّمُي. عٍ نَشَ لَن عٍ بٌرٍ مَ، عٍ شَ سِفَ هٍرٌدٍ يِرٍ، عٍ شَ وْيّن. عٍ تٌ بَرَ بِلَسِتُ مَسْتْ، مَنفّ شَ بَتُلَ كُنتِفِ، عٍ نَشَ هٍرٌدٍ مَيَندِ لَنيِ شِرِقٍ رَ عٍ تَفِ، بَرِ مَ عٍ شَ بْشِ شَشِلِ نُ تِشِ هٍرٌدٍ شَ بْشِ بَلٌي نَن نَ.