Tang Ko Pitang 1:4-14

⁴Mu fekeg nggu un ngom, ngad milgow nga darow; ngam mmang pilung rog ma ga fekeg nga senggil rom. Gadow ra felfelan’ u ta’bang, ngad unumew ngad talubgow nga aer, ngad li’ew gadow ko adag. Arfan ngay ni urngin e ppin ma ba adagem!

⁵Pi’in ppin nu Jerusalem, gu ba lumor machane gub pidorang, ni gub lumor ni bod e pi tent u daken e ted u Kedar, machane fel’ngig e bod e kateng ko naun rok Solomon ni tafen e pilung.

⁶Dab mu lik’ath ngog ni bochan rama’eg, ya yal’ e ke butbut’ nigeg. Pi pumo’on ni walageg e ra damumuwgad ngog ra tedgag ko maruwel u milay’. Ni dakriy e ngiyal’ ni nggu aywegneg.

⁷Adag rog, mog ngog, Bu uw e gin ni ngam waliy e gamanman rom ngay ngar abichgad? Uw e gin yad ra gif ngay ko yal’ ni msiw’? Mang ni ngar gu changar nigem u fithik’ e yu ran’ i gamanman rok boch e tagafal gamanman?

⁸Th’abi pidorang u fithik’ e ppin, mog damnang ko uw? Mman ngam lek fa ran’ i gamanman; ngam pir’eg e gin nge abich e kaming rom riy u charen fapi tent ko pi tagafal gamanman.

⁹Gur, adag rog, e gama pug e fan ko pi pumo’on ni bod ba os ni bpin nma tu’langnag e pi os ni pumo’on nma girengiy e chariot rok Farao.

¹⁰Piyan lolgem e rib fel’usun u daken linglingim ma ke puf nga daken bilel’ugnam ni bod e churwo’.

¹¹Machane bay da ngongoliyew bikiyi chen ni fakam nib gol ni bay e nunuw riy ni silber.

¹²Pilung rog e kethig nga daken e sofa rok, ma florida rog e ke sugnag fithik’ e nifeng ko fel’ bon.

¹³Adag rog e bfel’ bon dugun ni bod e myrrh nib thig nga daken ngarngoreg.

¹⁴En ni adag rog e bod e floras u mapan ni be puf u lan e milay’ ni grape u Engedi.