1 Salɔmɔn ná-tɛnɛ faalaaliiti. Ɠima loun zunui ɠa ɗa ɠɛ ga kɛɛɠɛ ná-koozunɛɛi, faaɠaaɠaalala loun zunui ɠɛ ga dee ná-ziizoolɛi.
2 Naavoloi sɔlɔɔ pelei ɲɔuɗai, é la faa ʋaa eyɛsu pɛ, kɛlɛ nii é ná-eteai ziɛzu telebogi zu, naa ɠa ɗa ɠizo saai ma.
3 Ɠɔoɠɔ GALAGI la telebo nui yɛgana, é ʋa ɓɔlɔ ga pului, kɛlɛ toɠa ɠɛlɛ nu ɲɔi yiima vaiti ba.
4 Zɔi é la yeeʋɛa faa ʋa, naa ɠa ɗa ɠɛ ga bala nu, kɛlɛ zeemaleʋebogi ɠa ɗa nu ɓɛtɛ.
5 Nii é ani ɠaalɛɛzu ba, foɠo undaaɠulazuʋɛ, naa ɠa ga doun zunui, nii keleɠelegai, kɛlɛ zɔi é ɲiizu molo leʋe ziɛgi zu, doun zunui ɠa ga naa, nii ɓaa ɠa ɠula ma.
6 Tuyaiti ta ʋuuni telebo nui unmaʋɛ, kɛlɛ nu ɲɔi laawooiti ta ɗa tooma vai maalɔɔɠu.
7 Telebo nui ná-kizɛsui ɠa ɗa ɠɛ ga tuyai taɠiligaani bɛ, kɛlɛ zeemai ɠa ɗa wo nu ɲɔiti daaseigi ma.
8 Zɔi ɠigi ma ziimaʋɛ, naa ɠa ɗa deveiti so, kɛlɛ nui é kpɔɛzuɠula ɲakaiti bosu, naa ɠa ɗa ɓɔɠɔ loo ya.
9 Zɔi é ziɛzu sɔledai zu, naa ɠa ziɛzu ziilɛigi zu, kɛlɛ zɔi é ziɛzu ga pele zuzeigiti, naa ʋolu ɠa ɠula.
10 Nii é gaamai lɔɔɠuzu bɔɔlaiti ba, naa ɠa ti ɓɔlɔzu, kɛlɛ zɔi é zelii losu ti ma gaamai zu, naa ɠa ʋaazu ga ziilɛigi.
11 Telebo nui laawooiti ta ga zɛnvu ɗɛungi, kɛlɛ nu ɲɔi laawooiti ta ɗa tooma vai maalɔɔɠu.
12 Wɔinzeɠemai ɠa ɗa sakpegi ɠaazo, kɛlɛ nɛɛbɛi ɠa ɗa faaɠaazagi pɛ suvaayɛ.
13 Keleɠele nui laawooi ɠa ɗa ɠɛ ga ɠima ɓɔɛi, kɛlɛ faaɠaaɠaalala nui ʋoluʋɛ nɔnɔi ɠa ga kpakɔi.
14 Ɠima nuiti ta ɗa faaɠwɛgi ɠaalɛ ba, kɛlɛ siɛgi zu faaɠaaɠaalala nui ɓɔɛzu la, maanɔɠɔi maa la mɔ ɠoozani ba.
15 Kpɛtɛ nui yeaɠɔligi ɠa bɛ ga taa wolai siɠigi ma, kɛlɛ bala nui ná-maawɔin ɠa ɗa koloɠolo.
16 Telebo nui ná-tɔnɔgi ɠa ɗa lo tuɠɔ, é zɛnvui wo, kɛlɛ nu ɲɔi zɔlɔɔgi ɠa ɗa ɠɛ ga faa ɲɔu ɠɛ anii.
