Solomon 6:6-13

⁶Ol tit bilong yu i wait tru olsem gras bilong waitpela sipsip ol i bin wasim ol nau tasol. I no gat wanpela tit bilong yu i lus. Nogat. Olgeta i stap gut.

⁷Laplap i haitim pes bilong yu tasol mi lukim pes bilong yu i lait.

⁸King i gat planti meri. 60 i stap kwin, na 80 ol i namba 2 lain meri. Em i gat planti arapela yangpela meri tu.

⁹Tasol mi, mi gat wanpela pren tasol. Em i namba wan tru na mi laikim em tumas. Mama bilong en i laikim em tumas na i amamas tru long em. Olgeta yangpela meri i lukim em na ol i save litimapim nem bilong en. Ol kwin na ol arapela meri bilong king i save singim song na amamas long em.

¹⁰Husat tru i lukluk i kam long mi? Pes bilong en i olsem san i laik kamap na i lait olsem biksan, na pes bilong en i klia tru olsem lait bilong mun. Mi lukim em na tingting bilong mi i pas olsem man i lukim bikpela lain soldia i kam wantaim ol plak bilong ol.

¹¹Mi kam daun pinis na mi stap long gaden i gat ol gutpela diwai i save karim kaikai. Mi kam bilong lukim ol nupela kru bilong ol diwai samting i kamap long ples daun. Mi laik lukim ol nupela lip bilong diwai wain na ol plaua bilong diwai i gat gutpela kaikai.

¹²Pren bilong mi, mi lukim yu na mi seksek long yu. Mi pilim olsem mi stap long karis bilong wanpela bikman tru.

¹³Meri bilong Sulam, kam bek, kam bek. Yu kam bek na mipela i lukim yu. Yangpela meri i singim song olsem Bilong wanem yupela i laik lukim mi, taim mi danis long ai bilong ol man?