5 Medik ľikerenas le Peter andre bertena, o manuša andre khangeri pes vaš leske na preačhenas te modľinel.
6 Andre odi rat, sar imar les kamľa o Herodes te anel anglo nipi, sovelas o Peter maškar o duj slugaďa. Ov sas zaphandlo duje lancenca a anglo vudar sas mek o slugaďa, save stražinenas e bertena.
7 A jekhvareste o aňjelos le Rajeskero avľa andre bertena a ačhiľa paš leste. Švicinelas avke sar kham. Demaďa le Peter andre sera, uštaďa les a phenďa: “Sigo, ušťi!” A pal o vasta leske pele o lanci.
8 O aňjelos leske phenďa: “Phand pašal tu o sirimos a uri o sandalki!” O Peter oda kerďa a o aňjelos leske paľis phenďa: “Čhiv pre tu tiro plašťos a av pal ma!”
9 O Peter džalas pal leste a aňi na džanelas, hoj oda, so pes ačhel prekal o aňjelos, hin čačes. Gondoľinelas peske, hoj džal suno.
10 Sar pregele ešebne (perše) slugaďen the dujtone, doavle paš e trastuňi brana, savaha pes džal andro foros, a phundraďa pes lenge korkori pestar. Sar avle avri, pregele jekh uľica a o aňjelos lestar takoj odgeľa.
11 O Peter avľa ke peste a phenďa: “Akanake čačes džanav, hoj o Raj bičhaďa peskere aňjelos a iľa man avri andral e Herodesiskere vasta the andral oda savoro, so mange kamle o Židi te kerel.”
12 Sar imar savoreske achaľiľa, avľa paš o kher la Mariakero. Oj sas e daj le Janoske, saves vičinen the Marek. Ode sas zgele but manuša a modľinenas pes.
13 O Peter durkinďa pre brana a avľa e čhajori, savi pes vičinelas Rode, te phučel, ko oda hin.
14 Sar prindžarďa le Peteriskero hangos, avke pes radisaľolas, hoj leske na phundraďa, ale denašľa te phenel, hoj o Peter ačhel angle brana.
15 Ale on lake phende: “So, diliňi sal?” No oj ačhelas furt pre peskero lav a phenelas, hoj oda hin čačo. On paľis phende: “Oda leskero aňjelos hin.”
16 O Peter mek furt durkinelas. Sar phundrade, dikhle les a igen pes čudaľinenas.
17 Ov lenge sikaďa le vasteha, hoj te čhiten a chudľa lenge te vakerel, sar les o Raj iľa avri andral e bertena a phenďa: “Den ada te džanel le Jakoboske the le phralenge.” Paľis geľa pre aver than.
18 Sar vidňisaľiľa, daranas pes o slugaďa a chudle pes maškar peste te vesekedinel, bo na džanle, so pes ačhiľa le Peteriha.
19 O Herodes les diňa te rodel. Sar les na arakhľa, vičinďa peske le slugaďen, hoj lendar te phučel, so pes ačhiľa. Paľis len diňa te murdarel. Paloda odgeľa andral e Judsko te bešel andre Cezarea.
20 O Herodes chalas choľi pro Tirčana the pro Sidončana, ale on pes savore jekhetane sthode a avle pal leste, bo lenas o chaben le kraľiskera phuvatar. Sar imar prevakerde le Blastus, le kraľiskere nekbaredere manušes a dochudle les pre peskeri sera, mangle le Herodes vaš o smirom.
