Sion 19:2-34

²Sakini, meatin tavaeen keil onen akur Iesu uva. Avil vatluvoluv en viau koa sin tetaveah mul ien ka alingi en vatin. Akav koe en kaliko tai koa vilhili suval omon asuv houlu tai.

³Evus, keil umai amumon tohtohien eni avit, “!O asuv houlu onen Siu keil, mevouhou minuk!” Ka umai veni ka amumuasi en vatin.

⁴Evus, Paelet va ris ven vangi Siu keil hatte tamun ka viteni min keil vit, “Milesi. Namul nakur meatin ekek emai ven kami keke mivailea en lesien onak, inau narvotin etai tounah vatisa vahit kei voumoni.”

⁵Ka amulamun Iesu va en mete, vatluvoluv koa sin tetaveah mul ien mul en vatin ka musin en kaliko tai koa vilhili suval omon asuv houlu tai. Evus, Paelet viteni min keil vit, “Milesi. !Kei keiek!”

⁶Navong asuv houlu keil onen pris keil ka meatin taleikokoeien keil ten Eim Votut alesi, avisohiso keih avit, “!Ti kati en aiveave! !Ti kati en aiveave!” Sakini, Paelet viteni min keil vit, “!Kami varei mihekuri ka miheti kati en aiveave! Veni, en lesien onak, inau narvotin etai tounah vatisa vahit kei voumoni.”

⁷Ka hetetamen onen Siu keil avit kesi avit, “Musil mengkatien onomai, mal keke hemat, veni kei vise kei sasen en Natin Ahi.”

⁸Navong Paelet raengoni, metau houlu mok.

⁹Va ris en teim onen ka vis Iesu vit, “?Keik koka en out kave varei?” Ka Iesu roviten etai tounah.

¹⁰Ka Paelet selus eris mini vit, “?Mukave? ?Kirselustei minau? ?Koreingeingeni keke inau nakur keihoen keke masakinuk kovamaluv, vuo mamaeni avati katuk en aiveave?”

¹¹Iesu vit kesi vit, “Keik kokur keihoen en moulien onak veni Ahi ten out nesa varei sani minuk. Sakini, meatin koa mae lat inau maha en hem, asa koa kei mumoni tisa mok mulin asa koa keik komul komumoni.”

¹²Navong Paelet longe mukok, sak visi vahotin sise keke vamaen Iesu vamaluv vaha, ka Siu keil avisohiso va ris min Paelet avit, “!Munak kilokovein meatin enek hemaluv heha, kitie lati keke korvitei anatin ven Sisa, mari asuv houlu onami ten out Rom! !Veni meatin koa vati lat kei sasen vit vi asuv houlu mul tisa kat Sisa!”

¹³Navong Paelet raengon selusien one, viso avakur Iesu vamai veni, rondan en vulin ten kot onen keke kilea vasa kor en rendemien onen en usite onen Iesu. Out enek avise en ‘Kabata’ en selusien ten Hibru koa aneite teni vi ‘Uteral ten Ahat.’

¹⁴Avong koanek vesesal vahi taviai en avong koa amul asak mesein tounah ten Anien ten Mul Laui ien. Ka Paelet viteni min Siu keil vit, “!Keiek, asuv houlu onami!”

¹⁵Ka keil avisohiso keih avit, “!Uasi! !Uasi! !Ti kati en aiveave!” Paelet vis ris keil vit, “?Anatin? ?Emi vat inau mati kat asuv houlu onami en aiveave?” Ka asuv keil onen pris keil avit kesi avit, “!Sisa, kei sasen enges vi asuv houlu onomai!”

¹⁶Sakini, Paelet sa lat Iesu va min meatin tavaeen keil onen keke avalamuni ka avati kati en aiveave. Sakini, meatin tavaeen keil amulamun Iesu

¹⁷vina en ‘Out ten Asi ten Avat,’ koa avise en ‘Kolkota’ en selusien ten Hibru. Ka akeih kat Iesu vous sasen en aiveave onen.

¹⁸En out enek amuti kat Iesu. Amuti kati luhu en meatin elu emun, koa lumul en usite keilu onen.

¹⁹Evus, aling tisien tai nesa en aiveave onen koa Paelet mutisi vit, “Koanik Iesu ten out Nasaret, asuv houlu onen Siu keil.”

²⁰Selusien enek amutisi en selusien etel: Hibru, Latin, ka Grik. Meatin keil houlu avuli selusien enek, veni out koa amuti kat Iesu eni romultei soutin ran taon.

²¹Navong asuv keil onen pris keil avuli, uva ris ven Paelet ka aviteni mini avit, “Konatistei konahit, ‘Asuv houlu onen Siu keil,’ ka mal keke kitisi kihit, ‘Meatin enek viteni keke vi asuv houlu onen Siu keil.’”

²²Ka Paelet vit kesi vit, “Asa koa namutisi heles.”

²³Navong meatin tavaeen keil amuti kat Iesu evus, keil akur eisin keil omon ka ariti keil hatte ehat, mal en meatin tavaeen ehat ekek. Ka more eisin tetaveah tai omon mules koa avili en rop koa amumoni en hili sipsip koa voneite tovuol ien.

²⁴Sakini, meatin tavaeen keil enek aviteni min keil eris avit, “Ronatali vastei. Reheson daes keke rehehotin isei en ir hekuri.” Koanek kur out keke vasakin asa koa Tus Votut vit luvati vamai vahi anatin koa vit, “Keil ariti vas eisin keil omak ven keil, ka ason daes ven eisin tetaveah omak.” Ka koanik vi sakien kati koa meatin tavaeen keil amumoni.

²⁵Rovitei soutin ran aiveave koa Iesu mul ien, ahin ehat (4) amul amulomal: mama onen, tunahin mama onen, Meri (ason Klopas), ka Meri ten out Makdela.

²⁶Navong Iesu les mama onen ka lesi keke meatin onen koa envatien onen mul ien mul mulomal vesesal veni, Iesu viteni min mama onen vit, “Mama, meatin ekek vi natmali.”

²⁷Evus, viteni min meatin onen enek vit, “Keiek mama onom.” Sakini, en avong enek va, meatin onen enek kur mama onen Iesu va vato en teim sen suval mama onen.

²⁸En avong enek, Iesu kilea keke tounah koa mita keke voumoni mai rokol keite teni. Sakini, keke vasakin asa koa Tus Votut viteni vamai vahi anatin, kei viteni vit, “Maroro kat inau.”

²⁹Veite tai mul ekonek koa vilelau en uaen takon. Sakini, tai en keil kur hati kaliko tai, kasi en uaen takon enek, lingi en kele ai tai, ka sani vina ven Iesu vasimi.

³⁰Navong mun hati uaen enek, Iesu viteni vit, “!Evus tuai!” Evus, vatin mapus vita netan ka mat.

³¹Avong Iesu emat, vi avong kati koa amul asak mesein tounah keil ven Sabat, ka Sabat enek vi votut imok veni umon Anien ten Mul Laui ien. Sakini, Siu keil avis Paelet keke vameng kat meatin tavaeen keil onen avaha avou vulvul aleatel koakeitel telmurur en aiveave one keke telhemat hekalah. Hemukonek, akilea avakulat teiai oneatel vamita netan ran aiveave keil keke telherpuruntei mari anien one.

³²Sakini, meatin tavaeen keil uva, amu vulvul alen meatin koa mulamu. Ka evus, amu vulvul alen meatin sav emun koa amuti kati vesesal ven Iesu.

³³Ka navong umai ven Iesu, alesi keke kei mat tuai. Sakini, keil armu vulvultei alen.

³⁴Ka meatin tavaeen tai rili usiven Iesu en metas onen. Ka hatte tas, ara ka ririven mue rani.