Sinik Abem 13:37-43

³⁷Kata kinim mak Got fom lung kal dafose, be aka fomongin banim keise.

³⁸Kala kaleyo, nalam nikil fikal adikum kiba, Yesus kim ban keimin kukan keimin umi sung uta bakayabuw ka. Bela atin kal keidin kala.

³⁹Kale kan ata Yesus aket afan kalokaba, ata kuw Got bakodaw, ‘kaba keno,’ akokaba, kata Mosus am weng sawa be ken kanokamu Got kin dim ken keidolaw banim.

⁴⁰Be kiba kidasu ata bom nadiwo masi lum senin Kinim weng kale bakosiw uyo tad kim dim so abomu kala.

⁴¹Kale lum senin weng uyo bako, ‘Got atafimin kinim kiba, kiba bo utamin. Kiba mada aket fukanin seng kuw fukanom fikalin. Naka kibilim tein bidiw am dánámin kabadákal kukuw mak kanoyamokabi, kata kiba kim aket uyo atin afan kaloliw banim ade alo kinim mak tad bakoyamoma, kata atin afan so kaloliw banim ko.’ Kalesano.” Yakeisa.

⁴²Faul so Bánabas so iyo weng banima, kawed am kudá matami unumo kanamiwe, wanang so kinim so iyo bakoyam, “kiba ayo yak Finuyámin am mak ayo tad umi sung uyo makso kukuyamino!” Yakeisiw.

⁴³Yanol kinim wanang ika kawed am kudá tam abe uniwe, Yu kayak seng keidiwe, Mifiw kinim seng Yu Kayak kukuw kudusiw keidiw iyo iliso Faul so Bánabas so leiw ei bom nadiwe alew ika im kitid sánin weng bakoyam, “kiba ulum kano Got aket kudaw bidiwano.” Yakansiw.